Fare sḭ ma 21
21
1Dulwak ge gan ne a dimma ne mam so̰o̰l go Bage ɗiŋnedin tok go,
ɗame na laar ɓyareya ge na ne pal.
2Ndu dasana ndil kaŋ kerra ge na ne ma na ndwara zi dosol,
amma a Bage ɗiŋnedin hale dulwak ma ne.
3Ker mborra jwap ne dosol pal,
Bage ɗiŋnedin laar wa̰ nama gḛ waɗe tuwaleya.
4Jegreya, pala ga̰l, kaŋ kerra ge naa ge sone ma ne: a no pet a ya̰l ne.
5Dwatɗa ge ndu ge temel ne e na det ɓolla zi,
ndu ge ne harge tene digi ke temel det woɗegeya zi.
6Kaŋ ɓolla ge ne hale kunna kwal uzi (wan tok go to)
naa ge ne ɓyare nama a det siya zi.
7Juliliya ge naa ge sone ma ne ban nama ban
ne jo̰ a vin ke kaŋ ge dosol to.
8Naa ge hun siya ma viya̰ waal gwagwaraŋ,
amma naa ge ɗeŋger ma kaŋ kerra dosol.
9Golgo mo fi mo zok kiya̰r digi,
ge mo dwam dagre ne gwale ge na laar ne wa̰ gool#25:24..
10Ndu ge sone laar wa̰ sone kerra,
kwa na kondore a̰se to.
11Mḛre ndu ge kalam hon ndu ge ne kwarra jwap to zwama,
yuwale ndu ge zwama hon na kwarra.
12Ndu ge dosol#21:12 Ndu ge dosol mbe no da ne pool kat Dok sḛ ne na pala, a na ge ne ɓyan ndu ge sone yál zi ne. dol na ndwara naa ge sone ma yál pal,
ka ɓyan nama det yál zi.
13Ndu ge ne dibi na togor be ge za̰ fyaso ge ndu ge a̰se ne,
na sḛ mbo fyal, ndu ge za̰ na mbo kat to me.
14Bobo honna ɗimil zi iyal laar,
Kaŋ honna ge woyya jyan iyal pore juliliya.
15Fare kerra ge jwap ke ndu ge dosol sḛ tuli,
amma hon ndu ge ya̰l sḛ vo.
16Ndu ge ne dol na pala uzi ne fare ge jwap ta,
he viya̰ mbo naa ge ne taal siya zi ma pe ya.
17Ndu ge na laar ne wa̰ vḛso mbo det woɗegeya zi,
ndu ge na laar ne wa̰ oyo̰r jiya̰l ma ne num hat gan to.
18Ndu ge sone a kaŋ pot ndu ge dosol fare ne,
ndu ge boge naa her ndu ge ɗeŋger byalam yál zi ne.
19Golgo mo kat babur go hini,
ge mo kat swaga ne gwale ge fare ge na laar ne wa̰ gool.
20Kaŋ kwaɗa ma ne kaŋ gan ma ya ndu ge zwama diŋ,
amma ndu ge dale burmi na ne ma uzi.
21Ndu ge ne yan dosol ma ne kwa a̰se pe
ɓol ndwara, dosol ne hormo.
22Ndu ge zwama da ne pool ame suwal ge naa ge pateya ma ne,
gul gulum ga̰l ge naa ge suwal ma ne e bama saareya ne na pal uzi.
23Ndu ge ne koy na wak ne fare janna ma go,
koy tene ne yál go.
24Ndu ge jegreya ge pala ga̰l na dḭl ndu ge kalam,
hufugiya ge na ne zi, cot tene da ne kaŋ ma pet.
25Ene ge ndu ge uwal ne hun na uzi,
ne da pe, na tok ma kuri be ge ke temel.
26Dam ge daage zi, ke ene ne naa kaŋ ma pe,
amma ndu ge dosol hon naa kaŋ be ge wan na tok.
27Naa ge sone ma tuwaleya kaŋ seŋgre kakatak,
amma kadɗa a tyare na da ne son, na sone kat ma gyana ga ɗaa?
28Bage ne ke sayda ge hale mbo ban uzi,
Bage ne fut fare pe ya zum, na fare mbo gá ne.
29ndu ge sone ke fare ma tele pal,
amma ndu ge dosol kwa na kaŋ kerra ma kwa.
30Zwama ge naa dasana ma ne, ko fare kwarra, ko ɗalla a̰me ne Bage ɗiŋnedin ndwara se to.
31Naa nṵsi tisi ma ne pore pe,
amma a Bage ɗiŋnedin hon halla ne.
Currently Selected:
Fare sḭ ma 21: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
