Fare sḭ ma 20
20
1Oyo̰r-jiya̰l é naa cot swaga, jiya̰l é naa ba̰y pe,
ndu ge ne fere tene ne nama hat zwama to.
2Ba̰yya ge gan ne hon naa vo dimma ne sonne pyanna go,
ndu ge ne é gan juliliya hon tene siya.
3Abe tene uzi ne gool ta, a hormo ge ndu ne ne,
a naa ge dale ma her na bama pal ne.
4Ne iyalam pe, ndu ge uwal gar kaŋ to,
swaga siyal go, mbo ɓyare syatɗa, amma mbo ɓol a̰me to.
5Dwatɗa ge naa dasana ma ne a mam ge ɗugul helek,
a ndu ge zwama ɓol na ne.
6Naa gḛ a tol ta go bama naa ge kwaɗa ma ne,
amma ndu son ge fareba, a wuɗi ɓol na ne ɗaa?
7Ndu ge dosol ge ne mbo ɗeŋger zi, na vya ma gá da ne wak busu na go̰r go.
8Swaga ge gan ne kat na hool pal kun sarya,
twat sone pe uziya cat.
9Ndu a̰me da ne pool jan go: Mbi hat tene ya harcal,
a pore mbi sone ma ya go ɗaa?
10Kaŋ ŋgay kaŋ ge ne na viya̰ go to ma,
Bage ɗiŋnedin sen nama sen.
11Ne na kaŋ kerra ma ta, bool da ne pool ŋgay go,
ko na yaɗat, ko na ɗeŋger.
12Togor da ne za̰ya pe, ndwara da ne swaga kwarra pe,
a Bage ɗiŋnedin ke nama ne jwak.
13Kadɗa mo laar wan dam fiya, mo mbo hat a̰se,
kadɗa mo ɓyare kat huriya, tya̰ mo ndwara zum.
14Bage ne yat jan go: A sone! A sone!
Swaga ge ne mbo ya uzi ya,
gá mbo uware tene, na yá na ya kwaɗa.
15Naa ɓol dinar ya go,
ne kaŋ ge siŋli ma baŋneya bindik,
amma kaŋ ge ne waɗe siŋli
a ɗel ge ne kwar fare janna.
16Kadɗa ndu dol tene ya ndu ge pe dew ndwara zḛ mbo ame wul,
wa̰ na ba̰r dwagle.
koy na ba̰r mbe ne na ne dó tene ndu ge pe dew ndwara zḛ pe.
17Kaŋzam ge syala zam wak zi tuli,
go̰r go, swaga ge ne wi ndu wak, saŋge zwala#20:17 Ne wak ibriniya zi go, swaga ge ne wi ndu wak saŋge gyaɗaŋgal..
18Kadɗa mo ɓyare ke fare a̰me, ɓyare zwama ne naa ta,
mbo pore be ge mo ndil tene kwaɗa to to.
19Ndu ge ne fut fare ma pe zum syal naa koo,
ká swaga dagre ne naa ge ne far gḛ ma to.
20Ndu ge ne vḛne na wak na bá ma ne ná pal,
mbo su uzi dimma ne ɗuli ge ne piri uzi ɗaal go.
21Ndu ge ne harge tene ɓol kaŋ digi avun cap pe eya go gale,
ne go̰r go, ɓol wak busu to.
22Jya̰ tene go: Mbi pot sone ne sone to,
é mo saareya Bage ɗiŋnedin pal, na sḛ mbo zur mo.
23Kaŋ ŋgayya ge ne na viya̰ go to,
Bage ɗiŋnedin sen na sen,
Kaŋ ŋgayya ge sone a kwaɗa to#11:1..
24A Bage ɗiŋnedin ɗame ndu dasana ne,
Ndu dasana kwa swaga ge na ne mbo go ma̰ gyana ɗaa?
25A haŋle ge mo tal tene avun cap ke wak tuli hon Dok kaŋ,
ko mo ke wak tuli be ge dwatɗa to, mo ba ɗage dwat ne go̰r go#Bag 5:3-5..
26Gan ge zwama ɓarse naa ge sone ma se,
rot nama uzi.
27O̰yom a ɗuli ge Bage ɗiŋnedin ne e na ndu dasana zi ne,
a na ben na dulwak zum ne.
28Kwa a̰se ma ne fareba koy gan koy,
in na muluk da ne kwa a̰se.
29Pool a balme ge bool ma ne ne,
amma pyasapso a hormo ge sabar ma ne ne.
30Jwaŋ da ne pool má ndu ne sone zi,
bol da ne pool ndage dwatɗa ge sone ne ndu dasana zi uzi.
Currently Selected:
Fare sḭ ma 20: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
