Fare sḭ ma 25
25
1No uwale a fare sḭ ge Salomon ne ma ne, a naa ge ne ka katɗa Ezekel, gan ge suwal Yuda ne ziyar go ma njaŋge nama ne.
Fare sḭ ma ge Salomon ne
2Uwareya ge Dok ne da ne na fare ɗimil ge ne woy na ma pe,
uwareya ge gan ne da ne na fare pe haleya ma pe.
3Pḭr ya digi ya vew, suwar pe ya se ya ndit,
go no me, ndu ne pool ge hale gan dulwak to.
4Goole fool kaal suwam uzi,
bage ne ɗeere kaŋ da ne pool ɗeere kaŋ ge siŋli ne na.
5Abe naa ge sone ma uzi ne gan ta,
na muluk pe mbo ɗur se dosol zi.
6Uware tene gan ndwara se to,
ame swaga katɗa ge naa ga̰l ma ne to#Luk 14:8-10..
7A golgo ge a jan mo go: «Mbo ya kat swaga ge hormo digi go»,
ge mo kat ɗo, a ba gwan ne mo pala ndu ga̰l pe se.
8Kaage mo wan kaŋ ge mo ne kwa na ne mo ndwara pe avun cap swaga sarya go to,
kadɗa mo kon ge ho̰l gage mo fare mbe ya,
mo gwan ke ma̰ gyana ɗaa?
9Kadɗa aŋ ne mo kon da ne gool, jya̰ na fare ge aŋ ne na buwal zi ɗeŋgo,
kaage mo fut fare ge ndu ge ɗogle ne ya zum to.
10Na kaage na za̰ na ɗo, na sá mo to,
mo mbo gwan gwan ne mo fare mbe ya digi to.
11tub ge dinar ge bandagay ge fool kaal go,
no a fare janna ge ne na viya̰ go.
12Togor ge ne ame mḛreya ge ndu ge zwama ne
a dimma ne kyaɗa ge dinar, ko bayir ge dinar ge siŋli ne go.
13Dimma ne mam ge iyalam karcat ne iyal dulwak le gyala pul go go,
ndu ge temel ge fareba iyal na bageyal dulwak go no me.
14Ndu ge ne ke wak tuli hon ndu bobo be ge gwan hon na to,
a dimma ne pḭr ge ne in kwal uzi baŋ go.
15Wan tene kaal e ga̰l saŋge ya se.
Wak tuli hal kal.
16Kadɗa mo ɓol daaram ya, za na mbyatɗa gwa,
na kaage mo za na gḛ ɗo, mo saŋge kut na ya uzi to.
17Mbo mo kon yadiŋ gogoy to,
na kaage na hú ne mo ɗo, na saŋge sen mo to.
18Ɗuuri, kasagar, ne kajamle ge wak swama,
ndu ge ne ke sayda ge hale na kon pal go no ca.
19E saareya ge ndu ge boge naa pal dam yál ma zi
a dimma ne ndu ne sul kaŋ ne kiya̰r ge saaseya go,
ko ndu ne mḛ koo ge giɗi pal go.
20Mbal gagso ge ndu ge ne za̰ yál ziyar go, a dimma ne
ndu ne fage na ba̰r ga̰l swaga iyalam go go,
ko dimma ne ndu ne kan mam ka̰mul ge jwaŋ wak zi go.#25:20 Kan vinegre jwaŋ wak zi yaage naa yaage dimma ne ndu ne kan yuwam jwaŋ wak zi go.
21Kadɗa mo kon ge ho̰l kyamal, ho̰ na kaŋzam,
kadɗa mam-njuwal ke na ke, ho̰ na na njó#Rom 12:20..
22Go no, a dimma ne mo ne kan ol wak yeŋgel na pal go,
Bage ɗiŋnedin mbo pot mo na.
23Saam ge ne kwal ne kuu ya gene ya mam#25:23 Ne Yuda ma ta a saam ge ne kwal ne kuu ya gene mam swarra ya ne.,
Wak orra gene ya laar hotɗa.
24Golgo mo fi mo zok kiya̰r digi,
ge mo dwam dagre ne gwale ge na laar ne wa̰ gool#21:9..
25Fare ge tuli ge ne mbo ne suwal ge kaal ya,
da ne ndu ge mam njuwal ne wa̰ na ne ɓol mam iyalam go.
26Mam so̰o̰l, ko tub ge vuuɗiya,
ndu ge dosol ge ne det ndu ge sone tok go go no ca.
27Be ke kwaɗa ge ndu zam daaram gḛ to,
ko ɓyare hormo pe gḛ to.
28Ndu ge ne her tene pore pe digi
a dimma ne suwal ge be gulum ga̰l go.
Currently Selected:
Fare sḭ ma 25: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
