Fare sḭ ma 17
17
1Golgo mo ka fere saar fyalla za̰ ta zi,
ge mo kat ge yàl ge zuliya ne duur diŋ ne gool.
2Dore ge ɗalla er vya ge bernde er,
ɓol joo vya ma buwal zi ɓol.
3Naa ɗyage fool kaal ma ne dinar da ne ol,
amma a Bage ɗiŋnedin hale dulwak ne.
4Ndu ge sone e na haŋgal fare janna ge naa ge ya̰l ma ne pal,
ndu ge hale za̰ fare janna ge naa ge vḛne naa ma ne.
5Ndu ge ne cot ndu ge a̰se cot ndu ge ne dó na,
ndu ge ne ke laar saal ne detɗa ge na kon ne pe, mbo ban be ge ɓol mḛreya to to.
6Sabar ma balme nama báŋ ma,
laar saal ge naa jabso ne a nama bá ma.
7fare janna ge tuli a kwaɗa ne ndu ge bernde pe to,
fare janna ge hale a kwaɗa to waɗeya ne ndu ge pool pe.
8Naa a̰me ma dwat go bobo honna mbar mbar,
na hage viya̰ naa ndwara zḛ.
9Vyale sone e naa san digi,
fare pe eya varse naa.
10Mḛre ndu ge ɗalla ndwara ɗu a golgo
waɗe njarra ge ndu ge daal ne bol wak kis.
11Ndu ge ne kuri wak ɓyare sone kerra ɗeŋgo,
amma a mbo teme ndu ge ne dulwak hun siya ya na ta.
12A golgo aŋ ne yoŋyoŋ ge a ne abe na vya ma swaga ɓol ta
ge aŋ ne ndu ge daal ɓol ta na dale kerra zi.
13Yál ya̰ ndu ge ne pot kwaɗa kerra ne sone yàl to.
14E gool pe, a hal huur ya se ne,
zḛ ge go gool ɗage digi, mḛ baŋ.
15Ndu ge ne ben ndu ge sone ma ne ndu ge ne wan ndu ge dosol ne fare,
nama sḛ ma jwak a kaŋ senna Bage ɗiŋnedin ta.
16Kyaɗa ndu ge dale ba kat ne bware na tok go ɗaa?
Ne yat zwama pe ya’a? Amma na pala ne zi to.
17Kondore ŋgay laar wanna swaga ma go pet,
amma swaga yál zi, a ná vya kat ne mo ne.
18A ndu ge dale her na kon wul dṵṵl na pal ne.
19Ndu ge na laar ne wa̰ gool na laar wa̰ sone kerra,
ndu ge ne jegre ban tene.
20Ndu ge dulwak sone ɓol tuli to,
ndu ge or naa det yál zi.
21Ndu ge ne tol vya ge daal da ne tiiɗiya,
ndu ge bernde bá za̰ tuli to.
22Laar saal zon naa zon,
kḭḭmi su duur se leɗet.
23Ndu ge sone vin wak lwaɗeya sèlè jyan,
ndwara vḛne sarya kunna ge dosol.
24Ndu ge ɗalla e na haŋgal ya zwama pal,
amma ndu ge daal e na haŋgal ya kaŋ ge ndu ne mbya ɓol na to pal.
25Vya ge daal hon na bá tiiɗiya,
na ná ge ne tó na da ne kḭḭmi.
26E ndu ge dosol pot fare kwaɗa to,
Iyal ndu ge tok pool ne na viya̰ go to.
27Ndu ge ne koy na wak, a ndu ge ne kwarra ne,
ndu ge ne wan tene, a ndu ge ɗalla ne.
28Ko ndu ge dale, kadɗa na ka wak ɗamal,
naa da ne pool ndil na go na zwama.
Ndu ge ne koy na wak, a ndu ge ɗalla ne.
Currently Selected:
Fare sḭ ma 17: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
