Fare sḭ ma 16
16
1Ndu dasana ke na dwatɗa ma,
a Bage ɗiŋnedin gwan ne vinna ne.
2Ndu dasana ndil kaŋ kerra ge na ne ma na ndwara zi kwaɗa,
amma a Bage ɗiŋnedin hale dulwak ne.
3E kaŋ ge mo ne ɓyare kerra ma Bage ɗiŋnedin ndwara se,
a mbo detɗa kerra go.
4Bage ɗiŋnedin ke kaŋ ma pet nama dé ya nama wak aya ma go,
ko ne ndu ge sone ne na dam ge haŋle pe.
5Bage ɗiŋnedin sen naa ge pala ga̰l ma sen,
a woɗege be ge ɓol mḛreya to to.
6Ndu ge ne dulwak kwa a̰se ne fareba a pore na ya̰l ma pore,
sya Bage ɗiŋnedin vo iyan naa ne sone go.
7Swaga ge Bage ɗiŋnedin ne za̰ tuli ne kaŋ kerra ge ndu ne,
ko na naa ge ho̰l ma puy, e nama ɓan ba̰a̰n dagre ne na.
8Golgo mo ɓol kaŋ ŋgeɗo dosol zi,
ge mo ɓol njwanjway mbuɗiya zi.
9Ndu dasana e na dwatɗa ma,
amma a Bage ɗiŋnedin wi nama wak ne.
10Gan jan fare da ne pool ge Dok ne,
kun sarya be vareya.
11Bage ɗiŋnedin laar wa̰ kaŋ ŋgayya ge dosol,
a na ke kaŋ ŋgayya ma ne.
12Gan sen kaŋ kerra ge sone sen,
muluk pe ɗur se da ne kaŋ kerra ge dosol ta.
13Gan ɓyare fare janna ge jwap,
naa ɓyare fare ge ne na viya̰ go.
14Juliliya ge gan ne da ne pool hun siya,
amma ndu ge zwama da ne pool iyal na laar.
15Wak maam ge gan ne, a ndwara ne,
amma kwa a̰se ge na ne a dimma ne mam swarra ge zḛ ge go.
16Golgo mo ɓol zwama ge mo ɓol dinar,
Golgo mo ɓol kwarra ge mo ɓol fool kaal.
17Naa ge dosol ma abe ta uzi ne sone ta,
ndu ge ne dol na ndwara na kaŋ kerra ma pal koy tene.
18Pala ga̰l gene naa mbo detɗa zi,
jegreya gene naa mbo burmiya zi.
19Golgo mo gwan ne mo pala se katɗa ne naa ge woɗegeya ma,
ge aŋ ne naa ge pala ga̰l ma var ta kaŋ paal.
20Ndu ge ne saare fare pal kaal, ɓol fare pe kwaɗa,
ndu ge ne kan na saareya ma Bage ɗiŋnedin pal, ɓol wak busu.
21Ndu ge zwama a tol na ɗalla
ɗel ge tuli hon kwarra.
22Fare kwarra hon na bá ndwara,
mḛreya ge naa ge daal ma ne da ne dale ge nama ne pe.
23Ndu ge zwama wak jan fare ge jwap
na ɗel hon kwarra.
24Ka̰l ge tuli da ne daaram fegem go,
det dulwak zi tuli, ke sḛ tuli me.
25Ndu dasana ndil na kaŋ kerra ma kwaɗa,
e no ɗe, gene na mbo siya zi.
26Laar e ndu ge temel ke temel ne
wak zamma e nà po̰yya ne.
27Ndu ge bernde dwat sone kerra,
na wak ol swala ne.
28Ndu ge son e naa ke gool,
ndu ge or naa e kondore ma varseya.
29Ndu ge birtiŋ boge na kaam,
é nama her viya̰ ge sone.
30Ndu ge ne dibi na ndwara, non na wak ke sone,
ke na ya ke zo.
31Pala pyasapso a balme ge siŋli ne,
da ne naa ge ne ke mborra dosol pal ma pe#16:31 Swaga mbe no jan da ne naa ge ne ke kaal gwagwa dunya zi ma..
32Golgo ndu ge ne gumi pore avun to, ge ndu ge pateya,
Golgo ndu ge ne wan tene, ge ndu ne ame suwal.
33Naa uusi baare ndwara kwa fare ma pe,
amma a Bage ɗiŋnedin gwan ne vinna fare ma pal ne.
Currently Selected:
Fare sḭ ma 16: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
