Fare sḭ ma 18
18
1Ndu ge ne ɓyare kwaɗa ge na ne ɗeŋgo, abe tene uzi ne naa ta,
saŋge pore naa ge ne hon na yuwaleya ge kwaɗa ma pal.
2Ndu ge daal ɓyare fare ge jwap to,
amma ɓyare wan na dwatɗa ma pe zum.
3Swaga ge ndu ge sone ne mbo ya saaso kare na pe ya go me,
sáso gene ya saaso.
4Fare janna ge naa dasana ma ne a ɗugul helek ne maŋgaɗam ga̰l yuwam go,
amma fare ge zwama a dimma ne mam ge ne so so̰o̰l go.
5Be ke kwaɗa mo ɗeŋgre ndu ge sone pe digi ɗo,
mo kuri be ge kun ndu ge dosol fare fareba pal to to.
6Ndu ge daal fare janna ma tol gool,
na fare janna ma e naa fol ta.
7Fare janna ge ndu ge daal ne hun na ne,
na fare janna ma wan na ne fare ne.
8Ndu ge or naa fare janna ma da ne kaŋzam ge tuli go,
det ɗiŋ mbo dulwak zi#26:22..
9Ndu ge ne kan na tok ne temel ta a ne ndu ge ne vḛne kaŋ uzi ná vya.
10Dḭl ge Bage ɗiŋnedin ne a gulum ga̰l ne,
ndu ge dosol sya na zi, a̰me ge gwan ke na to.
11Kaŋ ɓolla ge ndu ge gan ne
a dimma ne suwal ga̰l ge ne ve ne gulum ga̰l go,
dwatɗa ge na ne zi go, na ve ver zi ne gulum ga̰l#10:15..
12Detɗa ndwara zḛ, ndu dasana jegre jegre,
Pala gwanna se ya hormo ndwara zḛ.
13ndu ge ne gwan ne fare janna fare za̰ya ndwara zḛ,
ŋgay dale ne saaso ge na ne.
14Ndu ge ne dwatɗa ge ɗage digi ne na tukɗi se yan moy yan,
amma kadɗa na duur su su leɗet ɗe, a wuɗi mbyat zon na digi ne ɗaa?
15Dulwak ge ɗalla ame kwarra,
togor ge naa ge zwama ma ne ɓyare kwarra pe.
16Bobo hage naa viya̰ wak,
gene naa mbo ga̰l ma ndwara se ya.
17Ndu ge ne her fare zḛ janna na fare ndil dosol,
a swaga ge na kon ge gaage ne her fare janna go gale, ba ɗage gage na.
18Baare uusiya wan gool,
var naa ge pool ma buwal.
19wat suwal ge ne ve ne gulum ga̰l diŋ a nde nde
ge mo wat ná vya ge mo ne vḛne na laar diŋ.
Gool dimma ne viya̰ wak ga̰l go.
20Ndu da ne pool ɓol kaŋzam ne na fare janna ta,
na fare ge ne jan da ne pool ka wal na.
21Siya ma ne ndwara ya ɗel tok go
ndu ge ne ke na pe ame ge na ne.
22Ndu ge ne ɓo gwale ɓo kaŋ ge kwaɗa,
a bobo ge Bage ɗiŋnedin ne ho̰ na ne.
23Fare janna ge a̰se ma ne suul,
fare gwanna ge gan ma ne ndaar kaka.
24Kondore a̰me ma da ne vḛne ta pe,
amma kondore ge fareba waɗe ná vya waɗe.
Currently Selected:
Fare sḭ ma 18: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
