Markus 8

Jeso wal naa dudubu anda

(Mat 15:32-39, Mar 6:30-44, 2Gan 4:42-44)

1Dam mbe ma pul zi, ɓase ma gwan kote ya. Ne jo̰ a be ɓol a̰me ge zamma to, Jeso tol na naa ge ame hateya ma, jan nama go: 2«Mbi da ne dulwak kwa a̰se ne ɓase mbe ma pe, ndi dam ma̰ no ataa, a ya mbi ta, a ne kaŋzam ge zamma to. 3Kadɗa mbi ma̰ ya̰ nama ya mbo di ne kyamal, nama ndwara ma̰ piibi nama viya̰ zi. Ago naa a̰me ma ɗage da ne swaga kaal ya.» 4Na naa ge ame hateya ma gwan ne na janna go: «Nee ɓol kaŋzam ge huri naa mbe ma ful mbe no pul zi ma̰ da ne da ɗaa?» 5Jeso ele nama go: «Aŋ katugum ne go gyana ga ɗaa?» A jan go: «Ɓyalar.» 6Hon ɓase ma wak nama ka se. Abe katugum ge ɓyalar mbe ma, swaga ge ne gwa̰ ne gugu, siɗi nama se, hon nama na naa ge ame hateya ma, nama va ɓase ma. A var ɓase ma nama. 7A ka ne sii ma kwaɗa lwak me. Swaga ge ne e wak busu nama pal, jan na naa ge ame hateya ma go, nama va nama me. 8A zam, a huri, a kote pe ge ne gá ma ya digi wi gum ɓyalar. 9A ka mbo naa dudubu anda go. Ya̰ nama mborra. 10Swaga mbe go juju, a ne na naa ge ame hateya ma ndé fak go, a mbo suwal Dalmanuta ya.

Farisi ma ɓyare kaŋ ŋgayya

(Mat 12:38-39, 16:1-4, Luk 11:16-29, 12:54-56)

11Farisi ma mbo ya, a ne Jeso ma ɗage ɗaŋgre ta fare, ndwara kugi na, a jan na go na ke bama kaŋ ŋgayya a̰me ge ne mbo ne digi zi ya. 12Jeso ndage o̰yya, jan nama go: «Doŋ pe mbe no te ɓyare kaŋ ŋgayya kyaɗa ɗaa? Fareba, mbi jan aŋ, a mbo ke kaŋ ŋgayya a̰me hon doŋ pe mbe no to bat.» 13Ya̰ nama, gwan ndé fak go, a har mbo le may ya.

Jiya̰l hore ge Farisi ma ne Herodus ne

(Mat 16:5-12, Luk 12:1)

14Naa ge ame hateya ma vyale be ge mbo ne katugum ya bama tok go, a ka da ne katugum ɗu kikit fak go. 15Jeso jan nama go: «E me aŋ ndwara kwaɗa, ke me haŋgal ne jiya̰l hore ge Farisi ma ne Herodus ne!» 16Naa ge ame hateya ma ɗage jan ta fare, ne bama ne mbo ne katugum ya bama tok go to pe. 17Swaga ge Jeso ne za̰ nama fare jan ta, jan nama go: «Aŋ te jan ta fare gyana ne aŋ ne mbo ne katugum ya to pe ɗaa? Ɗiŋ ne se no, aŋ gale wan fare pe to, ko aŋ gale kwa fare pe to ba’a? Aŋ dulwak ma togreya ɗaa? 18Aŋ da ne ndwara fa̰r ma, aŋ kwa swaga to ɗaa#Irm 5:21, Eze 12:2.? Aŋ da ne togor ma, aŋ za̰ fare to ɗaa? Aŋ dwat ne 19katugum ge anuwa̰y ma, ge mbi ne siɗi nama se hon naa dudubu anuwa̰y ma to ɗaa? Aŋ gwan abe pe ge ne ga ma ya digi wi gum gyana ga ɗaa?» A jan na go: «Wol para azi#6:35-44..» 20«Swaga ge mbi ne siɗi katugum ge ɓyalar ma se hon naa dudubu anda, aŋ gwan abe pe ge ne ga ma ya digi wi gum gyana ga ɗaa?» A jan na go: «Ɓyalar.» 21Jan nama go: «Aŋ gale kwa fare to ba’a?»

Jeso zon ɓaal suwal Betsayda go

22A mbo ya Betsayda go. A gene na ɓaal a̰me ya, a kaɗe na go, na tá na. 23Wan ɓaal mbe tok, gene na suwal go̰r zum ya, swaga ge ne sḛ́ waktwara na ndwara zi, e na tok ma na ndwara go, ele na go: «Mo kwa swaga ya go’a?» 24Ɓaal hage na ndwara digi, jan go: «Mbi kwa naa dasana ma ya go, a dimma ne uwara ma go, amma a mbo ne go viya̰.» 25Jeso gwan e na tok na ndwara ma go, swaga ge ɓaal mbe ne ndi swaga tyatyat, ɓol zonna, gá kwa yaɗat. 26Ya̰ na mbo na diŋ ya, jan na go: «Gwa̰ suwal diŋ to.»

Bitrus jan go Jeso Kris ne

(Mat 16:13-20, Luk 9:18-21)

27Jeso ma ne na naa ge ame hateya ma mbo suwal ma ge Sezare ge Filibus ne ya. Swaga mborra go, ele na naa ge ame hateya ma go: «Naa jan go, mbi wuɗi ne ɗaa?» 28A gwan ne na janna go: «Naa a̰me ma jan go mo Yohanna bage ke naa baptisma ne, a̰me ma jan go, mo Iliya ne, ge may ma jan go mo anabi a̰me ne.» 29Na sḛ gwan ele nama go: «Aŋ sḛ ma ɗe, aŋ jan go mbi wuɗi ne ɗaa?» Bitrus jan na go: «Mo Kris ne.» 30Jeso zwal nama togor na kaage nama jya̰ ndu a̰me fare mbe to.

Jeso waage na siya ma ne na tanna

(Mat 16:21-23, Luk 9:22)

31Ɗage hate nama go: «A ŋgat Vya ge ndu ne njot yál gḛ ge be to, naa ga̰l ma, ne ga̰l ge naa ge ke tuwaleya ma ne ma, ne naa ge njaŋgeya ma a mbo kuri na, a mbo hun na, dam ataa go̰r go, mbo tan digi.» 32Jya̰ nama fare mbe zum waŋ. Bitrus wan na uzi ya hini jyan, ɗage mḛre na. 33Saŋge tene se ndil na naa ge ame hateya ma, mḛre Bitrus go: «Saytan, gwa̰ mbi go̰r’a! Ago dwatɗa ge mo ne ma a be ge Dok ne ma ne to, amma a naa dasana ma dwatɗa ne!» 34Tol ɓase ma poseya ne na naa ge ame hateya ma ya, jan nama go: «Kadɗa ndu a̰me ɓyare mbo ya mbi pe go, na dwá tene pal to, na hé na uwara kaŋgre, na kare mbi pe ya. 35Ndu ge ne ɓyare koy na sḛ, mbo ban tene, amma ndu ge ne mbo ban na sḛ ya ne mbi pe, ko ne fare ge kwaɗa pe, mbo má tene. 36A ma kaŋ mam ne ge ndu ɓol dunya mwaɗak, amma ban na sḛ uzi ɗaa? 37Ndu hon ma kaŋ ɗo, ba er na sḛ ne na ɗaa? 38Ndu ge ne mbo ke mbi saaso ya, ko ke saaso ne fare ge mbi ne doŋ pe ge ke zina ma ne ge sone mbe ma no buwal zi, Vya ge ndu ne mbo ke na saaso swaga ge ne mbo gwan ja hormo ge na bá ne zi, poseya ne maleka ge harcal ma me.»

Currently Selected:

Markus 8: FGN2013

Highlight

Copy