Markus 7

Hateya ge Jeso ne hada ge Farisi ma ne pal

(Mat 15:1-9, Luk 11:37-41)

1Farisi ma ne naa ge njaŋgeya ma mbut a mbo ne Ursalima ya, a kote ya Jeso ta. 2A kwa go na naa ge ame hateya a̰me ma zam kaŋzam da ne bama tok ma dobroŋ, ndwara go be ge usiya to. 3Ago Farisi ma ne Yuda ma pet, a zam kaŋ be ge usi bama tok to to, a koy hada ge bama bá ma ne. 4Swaga ge a ne gwan ne suk zi ya, a zam kaŋ be ge usi bama tok to to. Kaŋ a̰me ma ge a ne koy nama kerra ma ya go gḛ uwale, dimma ne kop ma, ne il ma, ne fal ge a ne ɗeere na ne fool kaal ma, [ne kaŋ fiya ma]#7:4 Maktub ge zaŋgal a̰me ma jan fare ge kaŋ fiya ne to. go.

5Farisi ma ne naa ge njaŋgeya ma, a ele na go: «Kyaɗa mo naa ge ame hateya ma ba mbo hada ge bá ma ne pal to, a ba ka zam kaŋ ne bama tok ma dobroŋ ɗaa?» 6Jan nama go: «Naa ge mbuɗi naa ndwara ma, anabi Isaya waage fare aŋ pal kwaɗa. Dimma ne njaŋge go:

‹Naa mbe ma uware mbi da ne bama wak wala ma baŋ,

amma nama dulwak ma kaal ne mbi.

7A uware mbi hale pal baŋ,

hateya ge a ne hate ma,

a eya ge naa dasana ma ne ne baŋ#Isa 29:13..›

8Aŋ ya̰ eya ge Dok ne ya uzi, aŋ ga mbo hada ge naa dasana ma ne pal.»

9Jan nama go uwale: «A fareba aŋ saŋge eya ge Dok ne ma ya aŋ go̰r, aŋ gá ke mborra hada ge aŋ ne ma pal. 10Ago Musa jya̰ go: ‹Ho̰ mo bá ma ne mo ná hormo. Ndu ge ne vḛne na wak na bá, ko na ná pal a hun na uzi#Wat 20:12, 21:17, Dwa 5:16, Lev 20:9..› 11Amma aŋ ɗe, aŋ jan go: Kadɗa ndu jan na bá ko na ná ya go: ‹Kaŋ ge mbi te ya mbar mo ne na a korban, ndwara go kaŋ tyareya hon Dok›, 12a go mbe no aŋ hon nama viya̰ ge be ge mbar bama bá ma ne bama ná ma no. 13Go mbe no, aŋ gul fare ge Dok ne, aŋ ka er na ne aŋ hada ge aŋ ne hate nama. Kaŋ hir ge go mbe ma no aŋ ke nama ya go gḛ uwale.»

Kaŋ ge ne hat ndu dasana seŋgre

(Mat 15:10-20)

14Jeso gwan tol ɓase ma, jan nama go: «E me aŋ haŋgal za̰ mbi kwaɗa gale! 15Kaŋ a̰me ne zum ge wat ndu zi ɗo, ba hat na seŋgre to, amma a kaŋ ge ne ndage ne ndu zi ya hat na seŋgre ne. [16Ndu ge ne togor ge za̰ya, na za̰.]#7:16 Swaga mbe no ne maktub ge zaŋgal a̰me ma zi to.»

17Swaga ge ne ya̰ ɓase ma, ne wá ya yadiŋ ɗe, na naa ge ame hateya ma ele na fare fare sḭ mbe pal. 18Jan nama go: «Aŋ ɗe, aŋ wan fare mbe pe to me’a? Aŋ kwa go kaŋ a̰me ge ne wat ndu dasana zi ne pool ge hat na seŋgre to to’a? 19Ago wat na dulwak zi to, amma wat na laar zi ya, ɓyan bagay zum uzi ya.» Jya̰ fare mbe no ndwara ŋgay go, kaŋ zam ma pet harcal. 20Gwan jan nama go: «A kaŋ ge ne ndage ne ndu zi ya, hat na seŋgre ne. 21Ago da ne ndu dasana zi ya, ne na dulwak zi ya dwatɗa ge sone ma ndage ya zum no: kaya kerra ma, ne syala ma, ne siya hunna ma, 22ne fí ne naa ma, ne laar wan bware ma, ne kaŋ kerra ge sone ma, ne son kerra ma, ne voɗom kerra ma, ne ene kerra ma, ne sáso salla cecet ma, ne jegreya ma, ne kaŋ kerra ge dale ma. 23Kaŋ ge sone mbe ma no mwaɗak, a ndage da ne ndu zi ya, a nama hat ndu seŋgre ne.»

Gwale ge pe dew hon fareba Jeso ta

(Mat 15:21-28)

24Jeso ɗage ne swaga mbe go, mbo suwal Tir ya. Wat yàl a̰me diŋ, ɓyare go ndu a̰me kwa na to, amma day woy tene to. 25Swaga mbe go, gwale a̰me ge na vya ge gwale ge o̰yom ge seŋgre ne na zi, za̰ fare ge na ne, mbo ya gur na ndwara se. 26Gwale mbe a Grek ne, tó Fenisi ge suwal Siriya ne go. Ka kaɗe na go, na yá̰ o̰yom ge seŋgre ne na vya zi uzi. 27Jeso jan na go: «Ya̰ naa jabso zam kaŋ huriya gale ɓya. Be ke kwaɗa ge a he kaŋzam ge naa jabso ne dol gú vya ma to.» 28Gwale mbe gwan ne na janna go: «Bageyal, gú ma zam naa jabso kaŋ pe ge ne det tabul pe se ma.» 29Jeso jan na go: «Ne mo fare janna mbe no pe, mbo, o̰yom ge seŋgre ndage ya ne mo vya zi uzi.» 30Gwan na diŋ ya, ɓol na vya ne fiya saŋgal go, o̰yom ge seŋgre ndage ya ne na zi uzi.

Jeso zon gisil

(Mat 15:29-31)

31Gwan ɗage ne suwal Tir ya, gwan’a suwal Sidon pal, kale suwal Dekapol pala, det ya le maŋgaɗam Galile go. 32A gene na gisil a̰me na ge ne far wak kwaɗa to ya, a kaɗe na, na e na tok na pal. 33Swaga ge ne gene ndu mbe ne ɓase ma ta uzi ya nde ɗe, par na tok na togor ma zi, sen waktwara, tat na ɗel ne na waktwara, 34hé na ndwara digi, ndage o̰yya, jan na go: «Effata!» Na sḭ go: «Hage tene!» 35Swaga mbe go juju, na togor ma hage, na ɗel sá se, gá far wak kwaɗa. 36Jeso wan nama togor na kaage nama jya̰ ndu a̰me to. Amma swaga ge ne zwal nama togor go nama jya̰ to mbe, a ka gwan dasare fare be se waɗeya. 37A ka ke ajab ge be to, a ka jan go: «Ke kaŋ ma pet kwaɗa! E gisil ma za̰ fare, ka hage naa ge be far wak to ma wak!»

Currently Selected:

Markus 7: FGN2013

Highlight

Copy