Markus 10
10
Hateya ge Jeso ne saaya pal
(Mat 19:1-9, Luk 16:18)
1Jeso ɗage ne swaga mbe go, mbo suwal Yahudiya ya, maŋgaɗam Urdun le may ya, ɓase ma gwan kote ya na ta. Gwan hate nama ne na ne ha̰le kerra go. 2Farisi a̰me ma mbo ya na ta, a hé na pe ne fare eleya go: «Da ne na viya̰ go ge ndu yan na gwale ɗaa?» 3Gwan ne nama janna go: «Musa ho̰ aŋ wak gyana ɗaa?» 4A jan na go: «Musa ho̰ viya̰ go a njaŋge maktub saaya, a ba yan gwale.» 5Jeso jan nama go: «Da ne dulwak togreya ge aŋ ne pe Musa ho̰ aŋ wak mbe no. 6Amma pe dolla go, Dok dó nama ndu son ne ndu gwale#Pe 1:27, 5:2.. 7Da ne pe no ɗe, ndu son mbo yá̰ na bá ma ne na ná, mbo mbarge ne na gwale, 8nama sḛ ma jwak a mbo gá sḛ duur ge ɗu. A be gwan gá azi to#Pe 2:24., amma a gá sḛ duur ge ɗu. 9Na kaage ndu na varse kaŋ ge Dok ne ɓa̰ na to.» 10Swaga ge a ne gwa̰ ya yadiŋ, naa ge ame hateya ma ele na fare fare mbe pal. 11Jan nama go: «Ndu ge daage pet ge ne yan na gwale, gwan mbo san ge ɗogle, ke zina ne na, 12kadɗa gwale sá tene ya ne na obe, gwan mbo san ge ɗogle, ke zina.»
Jeso e wak busu naa jabso pal
(Mat 19:13-15, Luk 18:15-17)
13A gene na naa jabso ya, ne da pe na é na tok nama pal. Amma na naa ge ame hateya ma ka mḛre nama. 14Swaga ge Jeso ne kwa no, saŋge pore, jan nama go: «Ya̰ me naa jabso nama mbo ya mbi ta, tele me nama to, ago muluk ge Dok ne da ne naa ge ne nama go ma pe. 15Fareba mbi jan aŋ: Ndu ge daage pet ge ne ame muluk ge Dok ne ya dimma ne vya jyale go to, mbo wat na zi to bat.» 16Abe nama ya na ta zi, e na tok nama pal ndwara e nama wak busu.
Jeso ma ne bage bware
(Mat 19:16-30, Luk 18:18-30)
17Swaga dol tene mborra go, ndu a̰me sya ya, gur na ndwara se, jan na go: «Bage hateya ge kwaɗa, mbi ke gyana ɗo mbi ba zam ndwara ge ɗiŋnedin joo ɗaa?» 18Jeso jan na go: «Mo te tol mbi kwaɗa gyana ɗaa? Ndu a̰me ge kwaɗa to, a Dok ɗu kikit!» 19Jeso jan na go: «Mo kwa wak honna ma kwa: Mo gale hun siya baca, mo gale ke zina ɓaca, mo gale ke sayda ge hale mo kon pal ɓaca, mo gale ke mo kon fare ge sone ɓaca, mo ho̰ mo bá ma ne mo ná hormo#Wat 20:12-16, Dwa 5:16-20, Lev 19:18..» 20Jan na go: «Bage hateya, kaŋ mbe ma no pet, mbi ke mborra nama pal da ne mbi bool ya day.» 21Jeso ndil na ɗer, na laar wan na, jan na go: «Kaŋ woɗege mo ya go ɗu. Mbo yat mo kaŋ ma uzi mwaɗak, mo hon a̰se ma na, mo mbo ɓol kaŋ kwaɗa ma digi zi ya. Mbo ya, kare mbi pe ya.» 22Amma swaga ge ne za̰ fare mbe, na duur su leɗet, gwan, ne da pe ka da ne kaŋ ɓolla ma gḛ ge be to. 23Jeso ndil swaga na ziyar go, jan na naa ge ame hateya ma go: «A haŋle ge be to ge ndu ge ne kaŋ ɓolla ma gḛ wat muluk ge Dok ne zi.» 24Naa ge ame hateya ma ke ajab ne na fare janna mbe pe. Jeso jan nama go: «Naa jabso, a haŋle ge ndu wat muluk ge Dok ne zi! 25A fogor ge jambal wat libra ndwala ge ndu ge ne kaŋ ɓolla wat muluk ge Dok ne zi.» 26A gwan ke ajab gḛ waɗeya, a ka jan ta go: «A wuɗi day máya ne ɗaa?» 27Jeso ndil nama ɗer, jan nama go: «Ne Naa dasana ma ta, day to. Amma kaŋ ma pet a day day ne Dok ta.» 28Bitrus jan na go: «Ndi, i ya̰ kaŋ ma pet, i kare ne go mo pe.» 29Jeso jan go: «Fareba mbi jan aŋ: ndu ge daage pet ge ne mbo ya̰ na yàl ya, ko na ná vya ge sonmo ma, ko na ná vya ge gwale ma, ko na ná, ko na bá, ko na vya ma, ko na swaga gaaso ne mbi pe, ko ne fare ge kwaɗa pe, 30amma mbo ɓol yàl ma, ne ná vya ge sonmo ma, ne ná vya ge gwale ma, ne ná ma, ne vya ma, ne swaga gaaso ma ndwara kis pal doŋ pe mbe no go, poseya ne yál kerra ma. Doŋ pe ge hṵsi go me, mbo ɓol ndwara ge ɗiŋnedin. 31Naa ge zḛ ge ma gḛ a mbo gwan hṵsi, naa ge hṵsi ma mbo gwan zḛ me.»
Waageya ge ndwara ataa ge siya ma ne tanna ge Jeso ne pal
(Mat 20:17-19, Luk 18:31-34)
32A ya viya̰ mbo Ursalima go, Jeso ka mbo nama ndwara zḛ, vo wan nama, naa ge a ne ka kare nama pe ma, a ka sya vo me. Gwan abe ge wol para azi ma, ɗage jan nama fare ge ne mbo ɓol na. 33jan go: «Ndi, nee mbo ne go Ursalima, a mbo ɓyan Vya ge ndu ne naa ge ke tuwaleya ma ga̰l ma, ne naa ge njaŋgeya ma tok go, a mbo kun sarya ge siya na pal, a mbo ɓyan na pehir ge ɗogle ma tok go, 34a mbo cot ta ne na, a sen waktwara na ta, a dwagle na ne bol, a mbo hun na, dam ataa go̰r go, mbo tan digi.»
Kaɗeya ge Yakub ma ne Yohanna ne
(Mat 20:20-28, Luk 22:25-27)
35Yakub ma ne Yohanna ge Zebede vya ma, ndar ta ya na ta, a jan na go: «Bage hateya, i ɓyare go mo ke i kaŋ ge i ma̰ ele mo na ya.» 36Jan nama go: «Aŋ ɓyare go mbi ke aŋ da ɗaa?» 37A jan na go: «Swaga ge mo ne mbo katɗa mo hool gan pal hormo ge mo ne zi, ya̰ i ka ɗu mo tok matoson pal, ɗu mo tok magul pal me.» 38Jeso jan nama go: «Aŋ wan kaŋ ge aŋ ne ele pe to. Aŋ da ne pool njot kop ge mbi ne mbo njot na, ko ke baptisma ge mbi ne mbo ke na ɗaa?» 39A jan na go: «I da ne pool ke na.» Jeso jan nama go: «Aŋ da ne pool njot kop ge mbi ne mbo njot na, ne ke baptisma ge mbi ne mbo ke na#Tkm 12:2., 40amma katɗa mbi tok matoson pal, ko mbi tok magul pal, a be mbi hon na ne to, amma a da ne nama ge a ne nṵsi na nṵsi ne nama pe.»
41Swaga ge naa ge wol ge may ma ne za̰ fare mbe, a saŋge pore Yakub ma ne Yohanna ta. 42Jeso tol nama, jan nama go: «Aŋ kwa kwa go, ga̰l ge pehir ge ɗogle ma ne ma é bama koo ya bama naa ma pal, naa ge ne naa ndwara zḛ ma ndal bama naa ma bama pe se me. 43Amma mbo kat aŋ buwal zi go to. kadɗa ndu a̰me ne aŋ buwal zi ɓyare kat aŋ ga̰l, na gwa̰ tene ke temel hon aŋ, 44ndu ge ne ɓyare kat naa ndwara zḛ ne aŋ buwal zi, na ka aŋ mo̰r. 45Ago Vya ge ndu ne mbo ya go a ke temel hon na to, amma na ke temel hon naa, na ho̰ tene dimma ne kaŋ zurra go ndwara zur naa gḛ me#Mar 14:24, 1Tim 2:6..»
Zonna ge ɓaal Bartime ne
(Mat 20:29-34, Luk 18:35-43)
46A mbo ya Jeriko go. Swaga ge a ne na naa ge ame hateya ma, ne ɓase ma gḛ ge be to ne ɗage wat ne Jeriko diŋ ya zum, Bartime ge Time vya, na ge ɓaal, bage kaɗe kaŋ ne katɗa viya̰ kiya̰r go. 47Za̰ go na Jeso ge Nazaret kale ne, ndage na ka̰l oyya go: «Jeso ge Dawda vya, kwa mbi a̰se!» 48Naa gḛ a ka mḛre na go na zane. Amma, ka gwan oy digi go: «Dawda vya, kwa mbi a̰se!» 49Jeso mḛ se, jan go: «Tó me mbi na ya.» A tol ɓaal mbe ya, a ka jan na go: «Wa̰ mo laar, mḛ digi, tol mo ya go.» 50Cigi na ba̰r ga̰l uzi ya, za̰me digi, mbo ya Jeso ta. 51Jeso ele na go: «Mo ɓyare go mbi ke mo da ɗaa?» Ɓaal jan na go: «Rabbuni#10:51 Rabbuni: Sḭ go mbi bage hateya., mbi ɓyare mbi kwa swaga!» 52Jeso jan na go: «Mbo, hon fareba ge mo ne zon mo go.» Se se no, kwa swaga, gá kare na pe.
Currently Selected:
Markus 10: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
