Markus 11
11
Watɗa ge Jeso ne Ursalima diŋ
(Mat 21:1-11, Luk 19:28-40, Yoh 12:12-16)
1Swaga ge a ne ya̰ ya Ursalima ta gwa, Betfage ma ne Betaniya ziyar go, ge njal olive ta gwa, teme na naa ge ame hateya ma azi, 2jan nama go: «Mbo me suwal ge ne aŋ ndwara zḛ mbe no diŋ ya. Swaga ge aŋ ma̰ watɗa diŋ ya, aŋ ma̰ ɓol kwara vya ge ndu ne ndwa na ɗu to ne vwalla. Sá me na, gene me na ya. 3Kadɗa ndu a̰me ma̰ ele aŋ ya go: ‹Aŋ te ke da go ɗaa?› Jya̰ me na go: ‹A na Bageyal ɓyare na ne!› Ma̰ ya̰ aŋ mborra ne na ya ne se no.» 4A mbo, a ɓol kwara vya ne vwalla viya̰ wak pala zum, viya̰ go, a sá na. 5Naa ge ne ka swaga mbe go ma, a jan nama go: «Aŋ te ke da go ɗaa? Aŋ te sá kwara vya gyana ɗaa?» 6A jan nama dimma ne Jeso ne jya̰ bama go. A ya̰ nama mborra. 7A gene kwara vya ya Jeso ta, a kan bama ba̰r ma na pal, Jeso ndwar na pal#Zak 9:9.. 8Naa gḛ a ka zen bama ba̰r ma viya̰ go, a̰me ma ka kan gaar ge bama ne syá nama ne ful zi ya ma me#2Gan 9:13.. 9Naa ge ne ka mbo zḛ ma ne nama ge ne ka mbo na go̰r go ma, a ka oyya go: «Hosanna! Uwareya na ge ne mbo ya dḭl ge Bageyal ne zi#Kmb 118:25-26, Mat 21:9.! 10Uwareya muluk ge nee bá Dawda ne, na ge ne mbo ya pal! Hosanna swaga ge ne waɗe digi ya!» 11Wat Ursalima diŋ, mbo zok ge mbegeya zi. Swaga ge ne á kaŋ ma ndilla pet, ne jo̰ swaga kale ya, a ne na naa ge wol para azi ma mbo Betaniya ya.
Jeso vḛne na wak fere pal
(Mat 21:18-19)
12Dam ge kwap ge go, swaga ge a ne ɗage ne Betaniya ya, kyamal wan na. 13Ne kaal ya, kwar fere a̰me lwarra dadab, mbo ya na ta ne dwatɗa go na ma̰ ɓol a̰me ne na pala digi de. Swaga ge ne mbo ya na ta zi, ɓó gar ma ɗeŋgo, ago be kat swaga ge fere zonna go to. 14Jan na go: «Ne gá ne zḛ no, ndu a̰me mbo gwan zam mo to bat!» Na naa ge ame hateya ma za̰ na fare mbe.
Jeso yan naa ge ke tujar ma ne zok ge mbegeya zi zum
(Mat 21:10-17, Luk 19:45-46, Yoh 2:13-16)
15A mbo ya Ursalima go. Jeso wat zok ge mbegeya zi, yan naa ge ne ka yat kaŋ ma uzi ma, ne nama ge ne ka mbo ya yatɗa ma pet ne zok ge mbegeya zi ya zum, ɓyan tabul ge naa ge er bware ma ne ma se, ne swaga katɗa ge naa ge ne ka e tuk ma yatɗa ma ne ma se me. 16Yá̰ ndu a̰me viya̰ ge hé kaŋ a̰me ne zok ge mbegeya zi ya zum to bat. 17Ka hateya, ka jan nama go: «Te be njaŋge go: ‹zok ge mbi ne a mbo tol na zok ge ke kaɗeya ne pehir ma pe pet› to’a? Amma ndi, aŋ saŋge na ya swaga woy ta ge syala ma ne#Isa 56:7, Irm 7:11..» 18Naa ga̰l ge ke tuwaleya ma ne naa ge njaŋgeya ma za̰ fare mbe, a ka ɓyare viya̰ ge hunna, amma a ka siya ɓase ma vo, ne da pe naa pet a ka ke ajab ne na hateya ma pe. 19Swaga ge swaga ne ke gasamal, Jeso ma ne na naa ge ame hateya ma wat ne suwal diŋ ya zum.
Fere fya̰ya: Hon fareba ma ne kaɗeya
(Mat 21:20-22)
20Cya̰wak, swaga ge a ne ka kaleya, a kwa fere mbe fya̰ ya ne na pala digi ɗiŋ mbo na pe too se. 21Swaga ge Bitrus ne dwa fare mbe pal, jan na go: «Rabbi, ndi, fere ge mo ne vḛne mo wak na pal mbe, ne fya̰ ya no.» 22Jeso gwan ne nama janna go: «Ho̰ me fareba Dok ta! 23Fareba mbi jan aŋ, kadɗa ndu a̰me jan njal mbe no ya go: ‹Ndage ne swaga mbe no go, mbo dol tene maŋgaɗam ga̰l yuwam se ya›, kadɗa tumri ya na dulwak zi to, amma hon fareba go fare ge na ne jya̰ mbe na mbo ke, a mbo hon na na. 24Da ne pe, mbi jan aŋ no go: Kaŋ ge daage pet ge aŋ ne mbo ɓyare na ya kaɗeya zi, ho̰ me fareba go aŋ ɓol na ya go, a mbo hon aŋ na. 25Swaga ge aŋ ne mḛ digi ke kaɗeya, kadɗa aŋ da ne fare ne ndu a̰me, pore me na, go no, aŋ bá ge ne digi zi ya ba pore aŋ ya̰l ma me. [26Amma kadɗa aŋ pore naa to, aŋ Bá ge ne digi zi ya mbo pore aŋ ya̰l ma to me.»]#11:26 Swaga mbe no ne maktub ge zaŋgal a̰me ma zi to, a he na ma̰ da ne Mat 6:15 zi.
Fare eleya ge Yuda ma ne pool ge Jeso ne pal
(Mat 21:23-27, Luk 20:1-8)
27A gwan’a Ursalima go. Swaga ge ne ka anna zok ge mbegeya zi, ga̰l ge naa ge ke tuwaleya ma ne ma, ne naa ge njaŋgeya ma, ne ga̰l ma, a mbo ya na ta, 28a ele na go: «Mo ke kaŋ mbe ma da ne ma pool pe ɗaa? A wuɗi ho̰ mo pool mbe ne ɗaa?» 29Jeso jan nama go: «Mbi ele aŋ fare a̰me ɗu kikit, kadɗa aŋ ma̰ gwan ne mbi vinna ya, mbi ma̰ jan aŋ mbi ke kaŋ mbe ma da ne ma pool de. 30Baptisma ge Yohanna ne mbo da ne digi zi ya, ko ne naa dasana ma ta ɗaa? Gwa̰ me ne mbi fare janna.» 31A ka jan ta go: «Nee ma̰ jan ya go: ‹Da ne digi zi ya› ma̰ jan nee go: ‹Kyaɗa aŋ ba hon fareba na ta to ɗaa?› 32Amma kadɗa nee ma̰ jan ya go: Da ne naa dasana ma ta!» Ago a ka sya ɓase ma vo, ne da pe naa pet a kwa kwa Yohanna anabi ne. 33A gwan ne Jeso janna go: «I kwa to.» Jeso jan nama go: «Mbi me, mbi ne pool jan aŋ go mbi ke kaŋ mbe ma da ne ma pool de to.»
Currently Selected:
Markus 11: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.