Matta 25

Fare sḭ ge vya kale ma wol ne

1Muluk ge digi ya mbo kat dimma ne vya kale ma wol, nama ge a ne he bama ɗuli ma, a ne zut mbo kun gwale giya̰l obe go. 2Anuwa̰y ne nama buwal zi a dale ma ne, ge anuwa̰y ma zwama me. 3Ge dale mbe ma, swaga ge a ne he bama ɗuli ma, a be he num bama tok go to. 4Amma ge zwama ma he bama ɗuli ma, a he num fáál ma zi bama tok go me. 5Ne jo̰ gwale giya̰l obe ke dṵṵl be ge mborra ya, a ɗage mbwat dam, a fi dam mwaɗak. 6Ɗaal ga̰l, a za̰ ka̰l oyya go: «Ndi me gwale giya̰l obe no! Wá me ya zum kun na!» 7Swaga mbe go no, vya kale mbe ma mwaɗak a kore digi, a ɗage nṵsi bama ɗuli ma. 8Ge dale ma jan ge zwama ma go: «Hó̰ me i aŋ num ma nde, ago i ɗuli ma piri piri.» 9Ge zwama ma gwan ne nama janna go: «Ne go gḛ ge mbyat nee ne aŋ mwaɗak to! Mbo me naa ge yat uzi ma ta, aŋ yat ne aŋ sḛ ma pe!» 10Swaga mborra mbo yatɗa go gale, gwale giya̰l obe yan’a, nama ge a ne ka jejew ma wat zok vḛso sanna zi poseya ne na, a dibi zok wak ya digi. 11Ne go̰r go, vya kale ge may ma yan’a, a jan go: «Bageyal, Bageyal, hage i zok wak!» 12Amma na sḛ gwan ne nama janna go: «Fareba, mbi jan aŋ, mbi kwa aŋ to!» 13Ne pe no ɗe, ka me yaŋyaŋ, ne jo̰ aŋ kwa dam ko ler to.

Fare sḭ ge mo̰r ge a ne va nama talent ma ne

(Luk 19:1-27)

14Mbo kat dimma ne ndu ge ne ɓyare mbo gwasal, ba tol na mo̰r ma ya se, ba var nama kaŋ kwaɗa ma go. 15Hon ge ɗu talent anuwa̰y, hon ge may azi, ge may ɗu me, ndu ge daage pool ge na ne pal, mbo gwasal. 16Se se no, na ge ne ɓó talent anuwa̰y, mbo saŋge na tok, ɓol mam ya pal anuwa̰y. 17Bage ne ɓó azi, ɓol mam ya ta pal azi me. 18Amma bage ne ɓo ɗu mbe mbo al swaga, woy bware ge na bageyal ne suwar zi.

19Swaga ma kale bergetek, mo̰r mbe ma bageyal yan’a, e nama nama ho̰ na isiya ge na kaŋ ma ne. 20Na ge ne ɓó talent anuwa̰y mbo ya, gene talent ge ɗogle ma ya anuwa̰y pal me, jan go: «Bageyal, mo ho̰ mbi talent anuwa̰y, ndi, mbi ne gwan ɓol ge ɗogle ma ya ta pal no anuwa̰y.» 21Na bageyal jan na go: «A kwaɗa! Mo̰r ge kwaɗa, ge ɗeŋger, mo ka ɗeŋger kaŋ ge ŋgeɗo zi, mbi é mo kaŋ ge gḛ ma pal, wá laar saal ge mo bageyal ne zi.» 22Na ge ne ɓó talent azi mbo ya me, jan go: «Bageyal, mo ho̰ mbi talent azi, ndi, mbi ne gwan ɓol ge ɗogle ma ya ta pal no azi.» 23Na bageyal jan na go: «A kwaɗa! Mo̰r ge kwaɗa, ge ɗeŋger, mo ka ɗeŋger kaŋ ge ŋgeɗo zi, mbi é mo kaŋ ge gḛ ma pal, wá laar saal ge mo bageyal ne zi.» 24Na ge ne ɓó talent ɗu mbo ya me, jan go: «Bageyal, mbi kwa kwa go mo ndu ge ndaar ne, mo syat swaga ge mo ne zare go to, mo kote kaŋ ge mo ne iya̰le na to. 25Mbi sya vo, mbi mbo woy mo talent suwar zi no. Ndi, mo kaŋ no.» 26Na bageyal gwan ne na janna go: «Mo̰r ge sone, ge uwal! Mo kwa kwa go mbi syat swaga ge mbi ne zare go to, mbi kote kaŋ ge mbi ne iya̰le na to me. 27Ke te ya kwaɗa, mo te ya hon mbi bware mbe naa ge er bware ma tok go, gwanna ge mbi ne ya no, mbi te ya ame mbi bware ne mam pal. 28Ame me na talent mbe, ho̰ me na bage ne talent wol.

29Ago ndu ge daage pet ge ne kaŋ, a mbo gwan hon na pal ta, mbo ɓol gḛ ceɗed, amma ndu ge ne a̰me to, a mbo gwan maŋge kaŋ ge go na ge na ne uzi ne na tok go. 30Dó me mo̰r ge be hamba mbe zum tṵ zi ya. Yago mbo gá fyalla ne sul na kiya̰r ma.»

Sarya kunna ge dam pe aya go

31Swaga ge Vya ge ndu ne mbo gwan ja hormo ge na ne zi poseya ne maleka ma pet, mbo kat na hool ge hormo pal. 32Pehir ma pet a mbo kote ya na ndwara se, mbo caɗe nama se dimma ne bage koy gii ma ne caɗe tame ná ma ne bemjere ma go. 33Mbo kan tame ná ma na tok matoson pal, bemjere ma na tok magul pal me. 34Gan mbo jan nama ge ne na tok matoson pal ma go: «Mbo me ya, aŋ ge mbi Bá ne e aŋ wak busu ma, za me muluk ge a ne nṵsi na ne aŋ pe ne dunya pe dolla ya day joo. 35Ago mbi ka kyamal, aŋ ho̰ mbi kaŋzam, mam njuwal ke mbi, aŋ ho̰ mbi mam njotɗa, mbi ka gwasal, aŋ ame mbi aŋ yadiŋ, 36mbi ka swala, aŋ lá mbi pe, mbi ka moy, aŋ mbo ya ndil mbi, mbi ka daŋgay zi, aŋ mbo ya mbi ta.» 37Swaga mbe go no, naa ge dosol ma mbo jan na go: «Bageyal, i kwa mo ne ke kyamal da ɗo, i ho̰ mo kaŋzam no ɗaa? Ko mam njuwal ke mo da ɗo, i ho̰ mo mam njotɗa no ɗaa? 38I kwa mo go mo gwasal da ɗo, i ame mo i yadiŋ no ɗaa? Ko mo ka swala da ɗo, i lá mo pe no ɗaa? 39I kwa mo ke moy, ko daŋgay zi da ɗo, i mbo ndil mo no ɗaa?» 40Gan mbo gwan ne nama janna go: «Fareba mbi jan aŋ, swaga ge aŋ ne ke kaŋ mbe ma no ne ndu a̰me ɗu ne mbi ná vya ge jyale mbe ma no pe, aŋ ke da ne mbi.»

41Uwale, mbo jan nama ge ne na tok magul pal ma go: «Mbo me uzi ya ne mbi ta, aŋ ge wak vḛneya ne aŋ pal ma, mbo me ol ge ɗiŋnedin ge a ne nṵsi na ne Saytan ma ne na maleka ma pe zi ya. 42Ago mbi ka kyamal, aŋ be hon mbi kaŋzam to, mam njuwal ke mbi, aŋ be hon mbi mam njotɗa to, 43mbi ka gwasal, aŋ be ame mbi aŋ diŋ to, mbi ka swala, aŋ be lar mbi pe to, mbi ka moy ne daŋgay zi, aŋ be mbo ndil mbi to.» 44Naa mbe ma mbo gwan ne na janna go: «Bageyal, i kwa mo kyamal ne ke mo, ko mam njuwal, ko mo ka gwasal, ko swala, ko moy, ko daŋgay zi da ɗo, i mba mo to no ɗaa?» 45Mbo gwan ne nama janna go: «Fareba mbi jan aŋ, swaga ge aŋ ne ke kaŋ mbe ma no ne ndu a̰me ɗu ge ne naa jabso mbe ma no buwal zi pe to, aŋ ke to da ne mbi.» 46Nama mbe ma no, a mbo mbo mḛreya ge ɗiŋnedin zi, amma naa ge dosol ma mbo ɓol ndwara ge ɗiŋnedin me.

Currently Selected:

Matta 25: FGN2013

Highlight

Copy