Matta 24

Jeso waage burmiya ge zok ge mbegeya ne

(Mar 13:1-2, Luk 21:5-6)

1Swaga ge Jeso ne wá ne zok ge mbegeya zi ya zum ndwara mborra, na naa ge ame hateya ma mbo ya na ta ndwara ŋgay na zok ge mbegeya sinna. 2Gwan ne nama janna go: «Ndi me kaŋ mbe ma no pet! Fareba mbi jan aŋ: Njal a̰me mbo ga eya na kon pala digi to bat, a mbo burmi uzi kakaɗak.»

Kaŋ ge ne ŋgay gwanna ge Jeso ne ya ma

(Mar 13:3-13, Luk 21:7-19)

3Jeso kat na pe njal olive pal, na naa ge ame hateya ma mbo ya na ta, a ele na hini jyan go: «Jya̰ i gale, kaŋ mbe ma mbo ke ma del, kaŋ ge ne ŋgay dam mborra ge mo ne ya, ma ne dam pe aya mbo kat gyana ɗaa?» 4Jeso gwan ne nama janna go: «Ke me haŋgal, kaage aŋ ya̰ ndu a̰me ya̰me aŋ to. 5Ago naa gḛ a mbo mbo ya ne dḭl ge mbi ne. A mbo jan go: ‹Mbi Kris ne›, a mbo ya̰me naa gḛ. 6Aŋ mbo za̰ fare ge pore mballa ne ma, ne ko̰r pore mballa ma: hé me aŋ dulwak digi to. A ŋgat kaŋ mbe ma mbo mbo ya, amma a be pe aya ne to gale. 7Ago pehir ma mbo ɗage ne ho̰l digi ta buwal zi, suwal ma mbo ɗage ne pore ta ta. Baktar ma ne suwar ndatɗa mbo ka kerra swaga ma go cucub. 8Kaŋ mbe ma no pet a mbo kat dimma ne yál tolla pe eya go. 9Swaga mbe go no, naa mbo e aŋ njot yál, a mbo hun aŋ, pehir ge ɗogle ma pet a mbo kwane aŋ ne dḭl ge mbi ne pe. 10Naa gḛ koo mbo syal, a mbo gá ɓyan ta naa tok go, a mbo kwane ta me. 11Anabi ge hale ma gḛ a mbo ɗage digi, a mbo ya̰me naa gḛ. 12Ne jo̰ ya̰l mbo zuli se ceɗed ɗe, naa gḛ nama laar wanna mbo iyal tiliŋ. 13Amma ndu ge ne mbo wan tene ya ɗiŋ pe aya dab, mbo má. 14A mbo oy Fare ge kwaɗa mbe no dunya zi mwaɗak, ne da pe, na ka sayda pehir ma ta pet. A go no dam pe aya ba mbo ya.»

Iigiya ge ɓaŋlaŋ

(Mar 13:14-23, Luk 21:20-24)

15«Swaga ge aŋ ne mbo kwa na ge seŋgre ge ne burmi naa pe, na ge anabi Danyel ne jya̰ fare na pal, ya ɗurra swaga ge mbegeya zi, bage ne isi maktub mbe na wa̰ na pe#Dan 9:27, 11:31, 12:11.! 16Swaga mbe go no, naa ge ne suwal Yahudiya go ma, nama sya mbo njal ma zi ya, 17bage ge ne zok jwaklak pala digi na ka̰ na koo ya se ndwara abe kaŋ ge ne na zok zi ma to. 18bage ne gaaso zi na gwa̰ ya ne go̰r na yadiŋ ndwara abe na ba̰r ga̰l to. 19Woo naa zaab ge ne mbo katɗa ne emel ma, ko ne nama ge ne mbo katɗa hon vya pam dam mbe ma pul zi ma!

20Kaɗe me, na kaage fare mbe na ɓo aŋ iyalam zi to, ko dam ɗigliya go to. 21Ago mbo kat iigiya ge ɓaŋlaŋ, na ge ne ke ɗu to ne dunya pe dolla ya day ɗiŋ ma̰ no, mbo gwan ke to bat#Dan 12:1.. 22Te da ne a ne tigri dam mbe ma ya zi pe to, ndu ge máya kat te to bat. Amma tigri dam mbe ma ya zi da ne na naa ge talla ma pe. 23Kadɗa ndu a̰me jan aŋ ya go: ‹Ndi, Kris ya go go!› Ko ‹Ya ya go› ho̰ me fareba na fare janna ma pal to. 24Ago Kris ge hale ma ne anabi ge hale ma mbo ɗage ya digi, a mbo ke kaŋ ŋgayya ge ɓaŋlaŋ ma ne kaŋ ge ajab ma ne ya̰me naa pe, ko mbyat a ya̰me naa ge talla ma. 25Ndi me, mbi waage aŋ fare ma ya zḛ tek.

26Kadɗa a jan aŋ ya go: ‹Ndi, ya ful pul zi›, mbo me ya to, ko kadɗa a jan aŋ ya go: ‹Ndi, ya zok pe hṵsi se ya›, ho̰ me fareba nama fare janna ma pal to. 27Ago dimma ne mam ne ser ne ham ya ɗiŋ det mbo sya ya go, gwanna ge Vya ge ndu ne ya mbo kat mbe go no ca. 28Swaga ge kaŋ suya ne go, boge ma kote na go.»

Dam gwanna ge Vya ge ndu ne ya

(Mar 13:24-27, Luk 21:25-28)

29Dam iigiya mbe go̰r go juju, gyala mbo saŋge tṵ, saba mbo ɗele to, guwa̰r ma mbo fage ne digi ya se, pool ge ne digi zi ya ma mbo ndat#Isa 13:10, 34:4, Eze 32:7, Juw 2:10, 3:4.. 30Swaga mbe go no kaŋ ŋgayya ge Vya ge ndu ne mbo dyan ya pḭr zi, pehir ge ne suwar pal ma pet a mbo ka sun ta, a mbo kwa Vya ge ndu ne mborra ya pḭr pal ne pool gḛ ne hormo gḛ me#Dan 7:13.. 31Mbo teme na maleka ma ya ge tṵ ge ga̰l sunna wak go, a mbo kote na naa ge talla ma ne dunya keŋ ge anda ma ya digi#Dwa 30:4, Zak 2:10, Neh 1:9..

32 # Mar 13:28-31, Luk 21:29-33. Ame me hateya ne fare sḭ ge fere ne ta. Swaga ge na tok ma ne ɗage erra, na gaar ma ne ɗage ɗufiya, aŋ kwa kwa go gyala pul gá gwa. 33Go no me, swaga ge aŋ ne mbo ɗage ya kwa kaŋ mbe ma no pet, kwa me go mborra ge Vya ge ndu ne ya gá gwa, ya zok wak go. 34Fareba mbi jan aŋ, kaŋ mbe ma no pet a mbo mbo ya be ge doŋ pe mbe no kale to gale. 35Digi ma ne suwar mbo kale uzi, amma fare ge mbi ne ma mbo kale uzi to bat.

36Ndu a̰me ge kwa dam mbe, ko ler mbe to bat, ko maleka ge ne digi zi ya ma, ko Vya, a Báá ɗu kikit kwa na ne. 37Dimma ne dam ma ge Nuhu ne go, mborra ge Vya ge ndu ne ya mbo kat go no ca. 38Ago dimma ne a ne ka kerra dam ma ge mam yḛreya ne ndwara zḛ go, naa ka zamma, a ka njotɗa, a ka san gwale, a ka hon bama vya ma sanna, ɗiŋ dam ge Nuhu ne wá fak ga̰l zi go#Pe 6:9—7:6.. 39A ka dwat a̰me pal to ɗiŋ mam yḛreya mbo ya, ban nama uzi kucup. Mborra ge Vya ge ndu ne ya mbo kat go no me#Pe 7:7-24.. 40Naa azi a mbo kat gaaso zi, a mbo her ɗu, a ya̰ ɗu, 41naa zaab ma azi swaga nan swara go, a mbo her ɗu, a ya̰ ɗu. 42Ka me yaŋyaŋ, ne jo̰ aŋ kwa dam mborra ge aŋ Bageyal ne ya to. 43Aŋ kwa kwa. Te go ndu ge yàl kwa kwa go ɗaal zi ler mbe no go tem syala ma̰ mbo ya sel na, te ya kat yaŋyaŋ, te ya ya̰ go a zú na zok to bat. 44Ne da pe no ɗe, aŋ sḛ ma me, ka me jejew, ago Vya ge ndu ne mbo ya ge ler ge aŋ ne dwat na pal to go.

Fare sḭ ge mo̰r ge zwama ma ne mo̰r ge bernde ne

(Luk 12:41-48)

45A wuɗi mo̰r ge ndwara ndaar, ne ge zwama ne, ge na bageyal ne é na ne na dore ge ne na yadiŋ ma pal ne, ne da pe, na ka hon nama kaŋzam na swaga ma go tetem ne ɗaa? 46Mo̰r ge na bageyal, swaga jyatɗa go ne ɓol na ya ne kerra go mbe no, da ne laar saal. 47Fareba mbi jan aŋ, mbo é na kaŋ ge na ne ma pal pet. 48Amma kadɗa a mo̰r ge sone ne, ka janna na dulwak zi go: «Mbi bageyal ke dṵṵl be gwanna ya», 49ɗage iyal na kaam ma, ka zamma ne njotɗa poseya ne naa ge fereya ma. 50Mo̰r mbe na bageyal mbo mbo ya dam ge na sḛ ne dwa na pal to go, ge ler ge na sḛ ne kwa na to zi. 51Mbo yan na, mbo é na njot yál ge naa ge mbuɗi naa ndwara ma ne, ge swaga ge naa ne fyal ne sul kiya̰r go.

Currently Selected:

Matta 24: FGN2013

Highlight

Copy