Matta 23

Ke me haŋgal ne hateya ge Farisi ma ne

(Mar 12:38-40, Luk 11:39-52, 20:45-47)

1Jeso jan ɓase ma ne na naa ge ame hateya ma go: 2«Naa ge njaŋgeya ma ne Farisi ma a naa ge ne wan aŋ eya ge Musa ne ma pe ne. 3Ke me kaŋ ge daage pet ge a ne jan aŋ, koy me nama kerra, amma bole me nama kaŋ kerra ma to bat, ago a jan fare, a ke temel na pal to bat. 4A vwal kaŋ dṵṵl ma, a ba ka e nama naa ka̰l ma pal, amma nama sḛ ma a vin ge moɗege nama ne bama tok vya ma to bat. 5Kaŋ ge a ne ke ma pet, a ke nama ndwara ŋgay ta. A go no a so̰me bama laya̰ ge vwal bama sḭ́ḭ́l ma, ko bama tok ma go ma fiyal, a ka fyaɗe bama ba̰r ga̰l ma wak ma se a̰a̰l me. 6Nama laar wa̰ swaga katɗa ge hormo swaga kaŋzam vḛso ma go, a ɓyare swaga katɗa ge zḛ ge Sinagog ma zi, 7ne wak sanna ge hormo swaga ɓase ma go, a ɓyare go naa tó bama Rabbi. 8Amma aŋ ɗe, kaage aŋ é naa tol aŋ Rabbi to, ago bage hate aŋ ɗu kikit, aŋ pet aŋ ná vya ma ne. 9Tó me ndu a̰me ge ne suwar pal aŋ bá to, ago aŋ Bá ɗu kikit, na ge ne digi zi ya. 10É me naa tol aŋ ‹bage ɗame naa› to, ago aŋ da ne bage ɗame aŋ ɗu kikit, a Kris. 11Ndu ge ga̰l ne aŋ ndwara zḛ mbo kat aŋ mo̰r. 12Amma ndu ge daage pet ge ne he na pala ya digi, a mbo gwan ne na pala se, ndu ge daage pet ge ne gwan ne na pala ya se, a mbo he na pala digi.

13Woo ge aŋ ne, aŋ naa ge njaŋgeya ma ne Farisi ma, aŋ ge mbuɗi naa ndwara ma! Aŋ dibi muluk ge digi ya wak naa ndwara zḛ, aŋ sḛ ma mbo wat zi to me, aŋ ya̰ naa ge ne ɓyare wat zi ma viya̰ ge wat zi to.

14[Woo ge aŋ ne, aŋ naa ge njaŋgeya ma ne Farisi ma, aŋ ge mbuɗi naa ndwara ma! Aŋ maŋge kaŋ ma ne kumur ma tok go, aŋ ka ke kaɗeya ma twala ne da pe naa kwa aŋ. Ne no pe, a mbo kun sarya aŋ pal ndaar kaka.]#23:14 Swaga mbe no ne maktub ge zaŋgal a̰me ma zi to, a he na ma̰ da ne Mar 12:40.

15Woo ge aŋ ne, aŋ naa ge njaŋgeya ma ne Farisi ma, aŋ ge mbuɗi naa ndwara ma! Aŋ á swaga ma aŋ pal, suwar ne maŋgaɗam ga̰l yuwam pul ndwara ɓol ndu ge saŋge tene Yuda aŋ pe go ɗu. Swaga ge aŋ ne ɓol na, aŋ saŋge na banna vya gwan waɗe aŋ ndwara azi.

16Woo ge aŋ ne, aŋ ge ɗame naa ge ɓaal ma! Aŋ jan go: ‹Kadɗa ndu guni tene ya ne zok ge mbegeya, ke a̰me to, amma kadɗa na guni tene ya ne dinar ge zok ge mbegeya ne, a ŋgat na wi na fare ge ne jya̰ wak.› 17Dale ma, ɓaal ma! A ma kaŋ waɗe ne ga̰l ne ɗaa? A dinar, ko zok ge mbegeya ge ne hat dinar mbegeya ne Dok pe ɗaa? 18Aŋ jan go uwale: ‹Kadɗa ndu guni tene ya ne twal tuwaleya, ke a̰me to, amma kadɗa na guni tene ya ne kaŋ ge a ne tyare na ne twal pal, a ŋgat na wi na fare ge ne jya̰ wak.› 19Ɓaal ma! A ma kaŋ waɗe ne ga̰l ne ɗaa? A kaŋ tyareya, ko twal tuwaleya ge ne mbege kaŋ tyareya ne Dok pe ɗaa? 20Ago ndu ge ne guni tene ne twal tuwaleya, guni tene da ne twal tuwaleya ma ne kaŋ ge ne na pal ma pet. 21Ndu ge ne guni tene ne zok ge mbegeya, guni tene da na zok ge mbegeya ma ne Bage ne kat ne na zi me. 22Ndu ge ne guni tene ne digi, guni tene da ne hool ge Dok ne ma ne Bage ne kat ne na pal me.

23Woo ge aŋ ne, aŋ naa ge njaŋgeya ma ne Farisi ma, aŋ ge mbuɗi naa ndwara ma! Aŋ hon kaŋ wak ɗu ne wol zi ge nana ma, ne anis ma, ne kumin#23:23 Nana, anis, kumin: Kaŋ mbe ma no mwaɗak a kaŋ ge hur tuli ma ne dimma ne grumful ma ne jemjembre ma go. ma ne, amma aŋ ya̰ kaŋ ge ne waɗe ne ga̰l ge ne eya zi ma uzi: dosol kerra, ne kwa a̰se, ne fareba honna. No a kaŋ ge ne mbya kerra ma ne, be ge ndil ge may ma solom to. 24Naa ge ɗame naa ge ɓaal ma! Aŋ kol susu ma uzi, aŋ ka uɗi jambal ma.

25Woo ge aŋ ne, aŋ naa ge njaŋgeya ma ne Farisi ma, aŋ ge mbuɗi naa ndwara ma! Ago aŋ usi aŋ kop ma ne aŋ seɗe ma go̰r ne zum kwaya̰l, amma nama pul ma ne zi kat wiya ne kaŋ ge aŋ ne sel ma ne kaŋ ge aŋ ne maŋge ne naa tok go ma. 26Farisi ge ɓaal’o! Usi gale seɗe pul ɓya, na go̰r ba hat kwaya̰l me.

27Woo ge aŋ ne, aŋ naa ge njaŋgeya ma ne Farisi ma, aŋ ge mbuɗi naa ndwara ma! Aŋ dimma ne siim pala ge a ne tal nama saal ma go. Nama go̰r ne zum siŋli, amma nama pul ma ne zi a wiya ne kal ma, ne kaŋ ge seŋgre hir ge daage ma. 28Aŋ go no me, ne go̰r zum, naa ndil go aŋ dosol, amma ne pul zi, aŋ wiya ne mbuɗiya ne ya̰l kerra.

29Woo ge aŋ ne, aŋ naa ge njaŋgeya ma ne Farisi ma, aŋ ge mbuɗi naa ndwara ma! Aŋ sin táál ge anabi ma ne, aŋ ka pét siim pala ge naa ge dosol ma ne, 30aŋ ka jan go: ‹Te go i ka zaman ge i bá ma ne zi ya, i te ya ɓan i pe dagre ne nama ndwara hun anabi ma to.› 31Ago aŋ sḛ ma kaŋge ta, aŋ naa ge a ne hṵ anabi ma vya ma ne. 32Aŋ ɗe, aŋ wi aŋ bá ma puwa̰l wak. 33Bom ma, maŋgay vya ma! Aŋ mbo ke gyana aŋ ba ndage ta ne mḛreya ge Jahanama ne zi ya uzi ɗaa? 34Ne da pe no ɗe, ndi, mbi teme aŋ ya anabi ma, ne naa ge zwama ma, ne naa ge njaŋgeya ma, aŋ mbo hun a̰me ma, aŋ mbo pel a̰me ma uwara kaŋgre pal, aŋ mbo fol a̰me ma ne bol aŋ Sinagog ma zi, aŋ mbo ka yan nama ne suwal ge no mbo suwal ge may ya. 35Ne da pe, swama ge naa ge dosol ma ne pet ge a ne ka̰ nama suwar pal, ne swama ge Habila, ndu ge dosol ne ya day ɗiŋ mbo ya swama ge Zakariya ge Barakiya vya, na ge aŋ ne hṵ na twal tuwaleya ma ne swaga ge harcal buwal zi go, nama gwa̰ aŋ pal#Pe 4:8, 2Maa 24:20-22.. 36Fareba, mbi jan aŋ, kaŋ mbe ma no pet a mbo gwan doŋ pe mbe no pal.»

Sun tene ge Jeso ne Ursalima pal

(Luk 13:34-35)

37«O Ursalima! O Ursalima! Mo ge ne hun anabi ma, mo ge ne mbal naa ge a ne teme nama ya mo ta ma uzi ne njal! Ndwara gyana ga ge mbi ne ɓyare kote mo vya ma dimma ne baare ná ne kote na vya ma na fápul zi go, amma aŋ be ɓyare to bat! 38Ndi, aŋ zok gá ya pṵṵl. 39Ago mbi jan aŋ: Ne gá ne zḛ no, aŋ mbo gwan kwa mbi to bat, ɗiŋ aŋ jan go: ‹Uwareya na ge ne mbo ya dḭl ge Bageyal ne zi pal!›»

Currently Selected:

Matta 23: FGN2013

Highlight

Copy