Matta 26

Yuda ma ga̰l ma ɓyare viya̰ ge wan Jeso

(Mar 14:1-2, Luk 22:1-2, Yoh 11:45-53)

1Swaga ge Jeso ne á ne na fare mbe ma pe wanna go, jan na naa ge ame hateya ma go: 2«Aŋ kwa kwa go, gá dam azi naa ke vḛso Paska. A mbo ɓyan Vya ge ndu ne naa tok go, ne da pe, a pé na uwara kaŋgre pal#Wat 12:1-27..»

3Naa ge tuwaleya ma ga̰l ma ne ga̰l ge ɓase ma ne ma kote ya kep tuwaleya Kayafa yapul go. 4A za̰ ta go bama wa̰ Jeso ɗimil jyan bama ba hun na. 5A ka jan ta go: «Na ka dam vḛso go to, na kaage iigiya ka ɓase ma buwal zi to.»

Gwale a̰me kan idir Jeso pala digi

(Mar 14:3-9, Yoh 12:1-8)

6Jeso ne suwal Betaniya go, Siman bage ne kṵ swama yadiŋ, 7gwale a̰me mbo ya na ta ne kolbo ge albatre ne, wiya ne idir ge yé gḛ. Kan na na pala digi, na sḛ ne swaga zam kaŋzam go. 8Swaga ge naa ge ame hateya ma ne kwa no, nama laar vḛne, a jan go: «A ma kaŋ vḛneya ne go ɗaa? 9Mbya a yat na te uzi ne yé gḛ, a hon a̰se ma na bware mbe.» 10Swaga ge Jeso ne kwa, jan nama go: «Aŋ te iigi gwale mbe go gyana ɗaa? Ke temel ge kwaɗa ne mbi pe. 11Ago aŋ da ne naa ge a̰se ma ɗaɗak, amma mbi mbo kat ne aŋ ɗaɗak to#Dwa 15:11.. 12Kanna ge ne ka̰ idir mbi pal mbe no, nṵsi mbi duur ne mbulla pe. 13Fareba, mbi jan aŋ, swaga ge daage go pet ge a ne mbo katɗa ka oy fare ge kwaɗa mbe no dunya zi mwaɗak, a mbo ka wan fare ge gwale mbe ne ke pe, a mbo ka dwat ne na.»

Yuda ɓyare viya̰ ge ɓyan Jeso naa tok go

14Ɗu ne nama ge wol pare azi ma buwal zi, na ge a ne tol na Yuda Iskariyot, mbo ɓol naa ge ke tuwaleya ma ga̰l ma, 15jan nama go: «Mbi ma̰ ɓyan na ya aŋ tok go ɗe, aŋ hon mbi ma̰ da ɗaa?» A isi bware sile tapolɗu a hon na#Zak 11:12.. 16Ne swaga mbe ya day, ka ɓyare viya̰ ge kwaɗa ge na ba ɓyan na nama tok go.

Kaŋzam ge Paska ne nṵsiya

(Mar 14:12-21, Luk 22:7-14,21-23, Yoh 13:21-30)

17Dam ge zḛ ge ge vḛso ge katugum ge be jiya̰l hore ne go, naa ge ame hateya ma mbo ya Jeso ta, a jan na go: «Mo ɓyare go i nṵsi mo kaŋzam ge Paska ne da ɗaa?» 18Jan nama go: «Mbo me suwal diŋ ya, ndu ge no diŋ, jya̰ me na go: ‹Bage hateya jan go: Mbi swaga ga gwa, i ne mbi naa ge hateya ma mbo ke vḛso Paska mo diŋ›.» 19Naa ge ame hateya ma ke dimma ne Jeso ne ho̰ bama wak go, a nṵsi kaŋzam ge vḛso Paska ne.

20Swaga ge swaga ne ke gasamal, Jeso ma ne naa ge ame hateya ge wol para azi ma kat swaga zam kaŋzam go. 21Swaga zam kaŋzam go, Jeso jan nama go: «Fareba, mbi jan aŋ, ɗu ne aŋ buwal zi mbo ɓyan mbi naa tok go.» 22A ke laar pisil gḛ ge be to, ndu ge daage ɗage ele na go: «Bageyal, a mbi ya’a?» 23Jan go: «A ndu ge ne pá na tok seɗe go poseya ne mbi, a na mbo ɓyan mbi naa tok go ne. 24Vya ge ndu ne mbo su, dimma ne a ne njaŋge ne na pal maktub zi go#Kmb 22:2-19, Isa 53., amma woo ne ndu ge ne ɓya̰ Vya ge ndu ne naa tok go pe! Golgo ndu mbe no a tol na dana to!» 25Yuda, na ge ne ɓya̰ na naa tok go, jan go me: «Rabbi, a mbi’a?» Jeso jan na go: «Mo jan go!»

Kaŋzam ge go̰r dab: Pe dolla ge ba̰a̰n ne

(Mar 14:22-25, Luk 22:15-20, 1Kor 11:23-26)

26Swaga zam kaŋzam go, Jeso he katugum, swaga ge ne e wak busu na pal, siɗi na se, hon naa ge ame hateya ma, jan nama go: «Ame me, aŋ zam, no a mbi duur ne.» 27He kop me, swaga ge ne e wak busu na pal, hon nama, jan go: «Aŋ pet njó me na, 28ago, no a mbi swama ne, swama ge wak tuli ne, na ge ne ka̰ se ne naa gḛ pe, ne pore sone ma pe#Wat 24:8, Irm 31:31-34.. 29Mbi jan aŋ, mbi mbo gwan njot oyo̰r jiya̰l ne go̰r go to bat, ɗiŋ mbi mbo gwan njot na poseya ne aŋ muluk ge mbi Bá ne zi ya.» 30Swaga ge a ne mbá kaŋ, a zut mbo njal olive pala digi ya.

Wak njuɗiya ge Bitrus ne

(Mar 14:27-31, Luk 22:31-34, Yoh 13:36-38)

31Jeso jan nama go: «Ɗaal mbe no zi, mbi ma̰ gá kaŋ syal koo ne aŋ pe pet. Ago a njaŋge go: ‹Mbi mbo iyal bage koy tame ma, vog ge tame ma ne mbo ɓarse se#Zak 13:7..› 32Amma swaga ge mbi ne mbo tan’a digi, mbi mbo mbo aŋ ndwara zḛ Galile ya.» 33Bitrus gwan ne na janna go: «Ko mo ka kaŋ syal koo ne naa pe pet puy, mo mbo kat kaŋ syal koo ne mbi pe to bat.» 34Jeso jan na go: «Fareba, mbi jan mo, ɗaal mbe no zi, ge baare tó fyaso, mo ma̰ njuɗi mo wak go mo kwa mbi to ndwara ataa.» 35Bitrus jan na go: «Ko na ka go mbi su poseya ne mo puy, mbi ne pool njuɗi mbi wak go mbi kwa mo to to bat.» Naa ge ame hateya ma pet a jan go no me.

Kaɗeya ge Jeso ne Jetsemani go

(Mar 14:32-42, Luk 22:39-46)

36Jeso ma ne na naa ge ame hateya ma mbo ya swaga a̰me ge a ne tol na Jetsemani go, jan nama go: «Ká me go go, mbi mbo yago, ke kaɗeya.» 37Abe Bitrus ma ne Zebede vya ma jwak na pe go, ɗage ɓol laar pisil ma ne iigiya ge be to. 38Ɗage jan nama go: «Mbi sḛ wanna kḭḭmi ɗiŋ mbo siya zi. Ka me go go, ka me yaŋyaŋ poseya ne mbi.» 39Abe tene uzi kaal nde, gur cwageya se, ke kaɗeya go: «O Báá, kadɗa na day day, hé kop mbe ne mbi pal uzi nde. Na ka be laar ɓyareya ge mbi ne to, amma laar ɓyareya ge mo ne!» 40Gwan’a naa ge ame hateya ma ta, set nama ne fi dam, jan Bitrus go: «Aŋ ne pool wan ta kat ndwara swak poseya ne mbi to’a? 41Ka me yaŋyaŋ, ke me kaɗeya, ne da pe, na kaage aŋ dé pe herra zi to. O̰yom vḭ vin, amma duur taŋgay.» 42Gwan abe tene uzi ya ge ndwara azi, ke kaɗeya go: «O Báá, kadɗa kop mbe no da ne pool kale ne mbi pal uzi be ge mbi njot na, ya̰ laar ɓyareya ge mo ne na ke ne!» 43Gwan’a, set nama ne fi dam, nama ndwara fa̰ ma kat ge be ge hage digi to. 44Yá̰ nama, gwan mbo ke kaɗeya ge ndwara ataa, ka dwage na fare ge zaŋgal mbe janna. 45Gwan’a na naa ge ame hateya ma ta, jan nama go: «Fi me dam, ɗigli me ta ɗaŋ! Ndi, ler ge a ɓyan Vya ge ndu ne naa ge sone ma tok go yan ja gwa. 46Ɗage me digi, mbo me nee! Ndi, bage ne ɓyan mbi naa tok go ne yan ja no!»

47Ne swaga jan fare go gale, ndi Yuda, ɗu ne nama ge wol para azi ma buwal zi, yan’a poseya ne naa gḛ na pe go, ne kasagar ma ne calaŋ ma bama tok go. A naa ge ke tuwaleya ma ga̰l ma ne ga̰l ge ɓase ma ne ma teme nama ya ne. 48Na ge ne ɓyan Jeso naa tok go, jya̰ nama zḛ tek go: «Ndu ge mbi ma̰ abe na ya zi ne so̰meya, a na ne! Wá̰ me na!» 49Yuda mbo ya Jeso ta, jan go: «Rabbi, mbi sa̰ mo wak!» Abe na zi ne so̰meya. 50Jeso jan na go: «Kondore, ke kaŋ ge mo ne mbo ya ne na pe kerra!» Swaga mbe go, naa mbe ma mbo ya zi, a wan Jeso. 51Ndi, ndu a̰me ɗu ne nama ge a ne ka dagre ne Jeso ma buwal zi, par na tok, pwat na kasagar, fete kep tuwaleya dore togor uzi#Yoh 18:26.. 52Jeso jan na go: «Gwa̰ ne mo kasagar na byalam zi, ago nama ge a ne he kasagar ma pet, a mbo su siya kasagar. 53Mo dwat go mbi ne pool ge tol mbi Bá ɗo, teme mbi maleka ma ya waɗe dubu ma wol para azi to’a#26:53 Ne wak grek zi «Legion» waɗeya wol para azi, Legion ɗu a asagar ma ɓase, mbo kaŋ ge asagar ma dudubu wol go. 54Fare ge ne njaŋge ne maktub zi ma wak te wi gyana zo, a jya̰ go nama mbo ke mbe go no.»

55Swaga mbe go, Jeso jan ɓase ma go: «Aŋ zu ya ne kasagar ma ne calaŋ ma mbo ya wan mbi dimma ne naa ne yan syala pe go. Mbi te va ya go dam ne dam katɗa aŋ zok ge mbegeya zi hate naa, aŋ te wa̰ mbi to kyaɗa? 56Kaŋ mbe ma pet a dé ya kerra, ne da pe fare ge anabi ma ne njaŋge wak wi.» Swaga mbe go, naa ge ame hateya ma pet, a ya̰ na, a syat bama pe so.

Jeso, Yuda ma ga̰l ma ndwara se

(Mar 14:53-65, Luk 22:54-55,63-71, Yoh 18:13-14,19-24)

57Nama ge ne wa̰ Jeso ma, a gene na ya kep tuwaleya Kayafa diŋ, ago naa ge njaŋgeya ma ne naa ga̰l ma kote swaga mbe go. 58Bitrus ka kare na pe ne kaal ya, mbo ya ɗiŋ kep tuwaleya yapul diŋ, kat dagre ne dore ma ndwara ndil kaŋ ge ma̰ ne mbo kerra. 59Naa ge tuwaleya ma ga̰l ma ne Yuda ma naa ga̰l ge kun sarya ma a ɓyare fare a̰me, ko ge hale ndwara é na pal, ne da pe bama ba hun na. 60Amma a ɓol to bat, ko ne jo̰ naa gḛ a ka mbo ya kun fare na pal#Kmb 27:12, 35:11.. Go̰r go dab, naa azi a mbo ya, a jan go: 61«Ndu mbe no jya̰ go: ‹Mbi da ne pool mbi gul zok ge Dok ne se, mbi gwan sin na digi dam ge ataa ma pul zi#Yoh 2:19.›.» 62Kep tuwaleya ɗage digi, jan na go: «Mo gwan ne fare janna ge fare ge naa mbe ma ne jan mo pal to’a?» 63Amma Jeso zane wak ɗamal. Kep tuwaleya jan na go: «Mbi guni mo ne dḭl ge Dok ge ndwara ne zi, jya̰ i: Mo Kris, Dok vya ne’a?» 64Jeso jan na go: «Mo jya̰ ne. Mbi jan aŋ, ne gá ne zḛ no, aŋ mbo kwa Vya ge ndu ne katɗa Bage pool pet tok matoson pal, ka mborra ya pḭr ge digi pal me#Kmb 110:1, Dan 7:13..» 65Kep tuwaleya taabe na ba̰r ne na ta uzi, jan go: «Sal Dok go! Nee gwan ɓyare naa ge sayda ge ɗogle ma iya ɗaa? Aŋ za̰ na sáso salla ge ne sal Dok ya go. 66Aŋ dwat gyana?» A jan na go: «Mbya suya#Lev 24:16.!» 67A ɗage sen waktwara na ndwara zi, a ka sil na, a̰me ma a ka yar na me#Isa 50:6.. 68A ka janna go: «Kris, jya̰ i gale, a wuɗi iya mo ne ɗaa?»

Bitrus njuɗi na wak na kwa Jeso to

(Mar 14:66-72, Luk 22:56-62, Yoh 18:15-18,25-27)

69Swaga mbe go, Bitrus ne katɗa yapul zum, kale a̰me mbo ya na ta, jan na go: «Mo me, mo ka da ne Jeso, ndu ge Galile ne mbe no.» 70Amma na sḛ njuɗi na wak naa ndwara go pet, jan go: «Mbi wan fare ge mo ne jan na mbe pe to!» 71Ɗage mbo viya̰ ga̰l zum ya, ge ɗogle kwa na, jan naa ge ne ka swaga mbe go ma go: «Ndu mbe no ka dḛ ne Jeso ge Nazaret.» 72Gwan njuɗi na wak ne guniya janna go: «Mbi kwa ndu mbe to!» 73Go̰r go ɓorom, naa ge ne mḛ swaga mbe go ma mbo ya Bitrus ta, a jan na go: «A fareba, mo ya nama buwal zi me, ago mo wak farra ben mo pe ne.» 74Swaga mbe go, ɗage guni tene ne kaŋ tolla na pal, ka janna go: «Mbi kwa ndu mbe to!» Swaga mbe go juju baare tol fyaso. 75Bitrus dwat ne fare ge Jeso ne jya̰ na go: «Zḛ ge baare tó fyaso, mo ma̰ njuɗi mo wak go mo kwa mbi to ndwara ataa.» Bitrus wat ya zum, fyal fyaso ge zwala.

Currently Selected:

Matta 26: FGN2013

Highlight

Copy