Matta 22

Fare sḭ ge kaŋzam swaga sanna go ne

(Luk 14:15-24)

1Jeso gwan ke nama fare sḭ a̰me, jan nama go: 2«Muluk ge digi ya di da ne gan a̰me ge ne ke vḛso sanna ge na vya ne go. 3Teme na dore ma nama mbo tol naa ge a ne tó nama ne vḛso sanna pe ma ya, amma a vin mborra ya to. 4Gwan teme na dore ge ɗogle ma ne ka̰l janna go: ‹Jya̰ me naa ge a ne tó nama ya ma go: Ndi, mbi kaŋzam ma ke go, mbi vya̰ mbi nday pool ma ne mbi gii ge sḛ so̰o̰l ma, kaŋ ma pet a nṵsi nṵsi, mbo me ya vḛso sanna go.› 5Amma a ndil na solom, a hé bama viya̰ bama pal. Ge ɗu mbo na kaŋ kyarga zi, ge may mbo ke na suk, 6ge may ma a wan na dore ma, a ke nama yál, a hun nama uzi. 7Gan saŋge pore, teme na asagar ma, a mbo burmi naa ge hun siya mbe ma uzi, a til nama suwal uzi me. 8Swaga mbe go no, jan na dore ma go: Kaŋzam ge vḛso sanna ne nṵsi nṵsi, amma nama ge a ne tó nama ya ma a be kat mbyatɗa to. 9Mbo me viya̰ ga̰a̰r ma go, tó me naa ge aŋ ma̰ ɓol nama ya ma ya pet swaga vḛso sanna go. 10Na dore ma mbo viya̰ ma go, a kote naa ge bama ne ɓó nama ma ya, naa ge kwaɗa ma ne naa ge sone ma pet. Zok ge vḛso sanna ne pul wi. 11Swaga ge gan ne wa ya zi ndwara ndil naa ge ne ka swaga zam kaŋzam go ma, kwa ndu a̰me ge ne ka̰ ba̰r vḛso to. 12Jan na go: ‹Kondore, mo te wá ya zi gyana be ge ba̰r vḛso mo ta to ɗaa?› Ndu mbe zane wak ɗamal. 13Swaga mbe go, gan jan naa ge ne var naa kaŋ ma go: ‹Vwá me na tok ma ne na koo ma, dó me na zum tṵ zi ya. Yago mbo gá fyalla ne sul na kiya̰r ma›. 14Ago tolla ma gḛ, amma talla ma ŋgeɗo.»

Kaŋ tyareya ge gan ga̰l ne

(Mar 12:13-17, Luk 20:20-26)

15Farisi ma mbo ke koteya ne da pe, bama ba wan na ne fare ge ne ndage ne na wak zi. 16A teme bama naa ge ame hateya ma poseya ne naa ge Herodus ne ma ya na ta, ne ka̰l janna go: «Bage hateya, i kwa kwa go mo jan fare ge fareba, mo hate naa viya̰ ge Dok ne, ge fareba zi, be pá mo ne fare ge naa ne zi to, ago mo ndil be naa ndwara to. 17Jya̰ i dwatɗa ge mo ne gale: Da ne na viya̰ go ge ndu tyare kaŋ hon Kaysar#22:17 Kaysar: A gan ga̰l ge Roma ma ne dḭl ne., ko to ɗaa?» 18Ne jo̰ Jeso kwa dwatɗa ge nama ne ge sone kwa ɗe, jan nama go: «Naa ge mbuɗi naa ndwara ma, aŋ te he mbi pe gyana ɗaa? 19Ŋgay me mbi bware ge a ne tyare kaŋ ne na.» A hon na sile a̰me. 20Jan nama go: «A wuɗi pala ma ne na kaŋ njaŋgeya no ne ɗaa?» 21A gwan ne na janna go: «A ge Kaysar ne ne.» Gwan ne nama janna go: «Ho̰ me Kaysar kaŋ ge Kaysar ne, ho̰ me Dok kaŋ ge Dok ne me.» 22Swaga ge a ne za̰ fare mbe no, a ke ajab, a ya̰ na, a mbo bama mborra.

Fare eleya tanna ge siya ma ne pal

(Mar 12:18-27, Luk 20:27-40)

23Dam mbe go, Saduki a̰me ma, nama ge a ne jan go tanna to ma, a mbo ya na ta, a ele na go: 24«Bage hateya, Musa jya̰ go: ‹Kadɗa ndu su ya be ge ya̰ vya, na ná vya mbo hé na gwale kumur, ndwara ke na ná vya mbe hir.›#Dwa 25:5-6. 25Ndi, naa a̰me ma ɓyalar, ná ge ɗu vya ma, a ka i buwal zi. Ge ga̰l kat yàl, su. Ne jo̰ be ya̰ hir to, ya̰ na gwale na ná vya. 26Ge azi su go no me, ne ge ataa, ɗiŋ mbo ya ge ɓyalar go. 27Nama go̰r go dab, gwale mbe su me. 28Dam tanna go, ne nama ge ɓyalar mbe ma no buwal zi, gwale mbe kat ma̰ wuɗi ne ɗaa? Ne jo̰ nama sḛ ma mwaɗak a ka yàl ne na.» 29Jeso gwan ne nama janna go: «Aŋ ya̰me ya̰me, ago aŋ kwa fare ge ne njaŋge ma ko pool ge Dok ne to. 30Ago dam tanna go, ndu san gwale, ko san obe to, amma naa gá dimma ne maleka ma ne digi zi ya go. 31Ne fare tanna ge siya ma ne pe ɗe, aŋ be isi fare ge Dok ne jya̰ aŋ to’a? Jya̰ go: 32Mbi Dok ge Abraham ne, Dok ge Isaku ne, ne Dok ge Yakub ne. Mbi be Dok ge naa ge siya ma ne ne to, amma mbi Dok ge naa ge ndwara ma ne#Wat 3:6..» 33Swaga ge ɓase ma ne za̰ fare mbe no, a ke ajab ne hateya ge na ne pe.

Eya ge ne waɗe ge may ma

(Mar 12:28-34, Luk 10:25-28)

34Swaga ge Farisi ma ne za̰ go Jeso dibi Saduki ma wak ɗe, a kote. 35A̰me ɗu ne nama buwal zi, bage ne kwa eya ma tyatyat, he na pe ne fare eleya go: 36«Bage hateya, eya ge daage waɗe ne ga̰l ne ɗaa?» 37Jeso jan na go: «‹Mo laar wa̰ Bageyal Dok ge mo ne ne dulwak ɗu, ne mo sḛ mwaɗak, ne dwatɗa ge mo ne mwaɗak me.› 38No a eya ge zḛ ge ge ne waɗe ne ga̰l ne. 39Ge azi ge ne mbya ne na go no: ‹Mo laar wa̰ mo kon dimma ne mo sḛ go#Lev 19:18..› 40Eya ge Musa ne ma ne hateya ge anabi ma ne ma a ya eya ge azi mbe ma no zi.»

Kris, Dawda vya

(Mar 12:35-37, Luk 20:41-44)

41Farisi ma ne swaga koteya go, Jeso ele nama fare, 42jan nama go: «Aŋ dwat Kris pal gyana ɗaa? A wuɗi vya ne ɗaa?» A jan na go: «A Dawda vya ne.» 43Jan nama go: «Te gyana ɗo, Dawda wiya ne O̰yom ba tol na ‹Bageyal› ɗaa? Dawda jya̰ go:

44Bageyal jya̰ mbi Bageyal go:

‹Ka mbi tok matoson pal,

ɗiŋ mbi gwan ne mo naa ge ho̰l ma mo koo pul se#Kmb 110:1..›

45Kadɗa Dawda tol na Bageyal ɗe, kat na vya ma̰ gyana ɗaa?» 46Ndu a̰me ge gwan ɓol pool ge jan na fare kat to bat. Ne dam mbe ya day, ndu ge ele na fare a̰me gwan kat to bat.

Currently Selected:

Matta 22: FGN2013

Highlight

Copy