Matta 21

Watɗa ge Jeso ne Ursalima diŋ

(Mar 11:1-11, Luk 19:28-40, Yoh 12:12-19)

1Swaga ge a ne yá̰ ya Ursalima ta gwa, suwal Betfage#21:1 Betfage: Yàl ge fere ne. ziyar go, le ge njal olive go, Jeso teme na naa ge ame hateya ma azi, 2jan nama go: «Mbo me suwal ge ne aŋ ndwara zḛ mbe no diŋ ya, aŋ ma̰ set kwara ná ne vwalla, na vya na ziyar go me. Sá me na, aŋ gene nama ya mbi ta. 3Kadɗa ndu a̰me ma̰ jan aŋ fare ya, jya̰ me na go: ‹A Bageyal ɓyare nama ne!› Se se no, a ma̰ ya̰ nama mborra ya.» 4Kaŋ mbe ma dé ya kerra, ne da pe, fare ge anabi ne jya̰ wak wi, jya̰ go:

5«Jya̰ me Siyona vya ge gwale go:

Ndi, mo gan ne yan ja mborra ya mo ta no,

suul cwagat, ndwarra kwara pal,

kwara vya pal#Zak 9:9..»

6Naa ge ame hateya ma mbo, a ke dimma ne Jeso ne ho̰ bama wak go. 7A gene kwara ma ne na vya ya, a kan bama ba̰r ma nama pal, Jeso ndwar na pal. 8Naa ɓase gḛ a ka zen bama ba̰r ma viya̰ pul go, a̰me ma ka syal gaar ma ya kanna viya̰ go me#2Gan 9:13.. 9Naa ge ne ka mbo na ndwara zḛ ma, ne nama ge ne ka mbo na go̰r go ma, a ka oyya, a ka jan go:

«Hosanna#21:9 Hosanna: Na pe wanna go, má i. Ne swaga no go, Hosanna da ne pool kat uwareya. Dawda vya!

Uwareya na ge ne mbo ya dḭl ge Bageyal ne zi pal!

Hosanna swaga ge ne waɗe digi ya#Kmb 118:25-26.!»

10Swaga ge ne wa ya Ursalima diŋ, suwal iigi digi pet, a ka janna go: «A wuɗi ne ɗaa?» 11Naa ka gwan ne janna go: «A anabi Jeso ne, ndu ge Nazaret ge suwal Galile ne.»

Jeso wat zok ge mbegeya zi

(Mar 11:15-19, Luk 19:45-48, Yoh 2:13-22)

12Jeso wat zok ge mbegeya zi, yan naa ge ne ka yat kaŋ ma uzi ma, ne nama ge ne ka mbo ya yatɗa ma pet ne zok ge mbegeya zi ya zum, ɓyan tabul ge naa ge er bware ma ne ma se, ne swaga katɗa ge naa ge ne ka e tuk ma yatɗa ma ne ma se me. 13Jan nama go: «A njaŋge go: ‹Zok ge mbi ne, a mbo tol na zok kaɗeya›, amma aŋ ɗe, aŋ saŋge na ya swaga woy ta ge syala ma ne#Isa 56:7, Irm 7:11..»

14Ɓaal ma ne giɗi ma mbo ya na ta zok ge mbegeya zi, zon nama. 15Swaga ge naa ge ke tuwaleya ma ga̰l ma ne naa ge njaŋgeya ma ne kwa na kaŋ ajab ge ne ke ma, ne oyya ge naa jabso ma ne ka oyya zok ge mbegeya zi go: «Hosanna, Dawda vya» ɗe, nama laar vḛne, 16a jan na go: «Mo za̰ fare ge a ne jan’a go’a?» Jeso jan nama: «O̰, aŋ be isi go: ‹Ne naa jabso ma ne naa ge kaare ma wak zi mo ɓó uwareya› to’a#Kmb 8:3.?» 17Yá̰ nama, ɗage ne suwal diŋ ya ndwara mbo suwal Betaniya, dwam na ya.

Jeso vḛne na wak fere pal

(Mar 11:12-14,20-24)

18Cya̰wak vḛ, ɗage gwanna ya suwal diŋ, kyamal wan na, 19kwa fere a̰me ne viya̰ kiya̰r go, mbo ya na ta, set a̰me ɗu na pala digi to, ɓó gaar ma ɗeŋgo, jan na go: «Ne gá ne zḛ no, mo mbo gwan tol to bat!» Swaga mbe go juju, fere mbe fya̰. 20Swaga ge naa ge ame hateya ma ne kwa no, a ke ajab, a jan go: «Te gyana fere ba fya̰ ne se se no go ɗaa?» 21Jeso gwan nama janna go: «Fareba, mbi jan aŋ, kadɗa aŋ da ne hon fareba, aŋ kat ne tumriya to me, aŋ ke be kaŋ ge a ne ke ne fere no ɗeŋgo to, amma kadɗa aŋ jan njal mbe no ya go: ‹Ndage tene uzi ne swaga mbe no go, dó tene maŋgaɗam ga̰l yuwam se ya›, mbo ke. 22Kaŋ ge daage pet ge aŋ ne mbo kaɗe ya, aŋ hon fareba, aŋ mbo ɓol na.»

Fare eleya ge Yuda ma ne pool ge Jeso ne pal

(Mar 11:27-33, Luk 20:1-8)

23Swaga ge Jeso ne wá zok ge mbegeya zi, ne ka hateya ɗe, naa ge ke tuwaleya ma ga̰l ma, ne naa ga̰l ma mbo ya na ta, a jan na go: «Mo ke kaŋ mbe ma da ne ma pool pe ɗaa? A wuɗi ho̰ mo pool mbe ne ɗaa?» 24Jeso jan nama go: «Mbi me, mbi ele aŋ fare a̰me ɗu kikit, kadɗa aŋ ma̰ gwan ne mbi vinna ya, mbi ma̰ jan aŋ mbi ke kaŋ mbe ma da ne ma pool de. 25Baptisma ge Yohanna ne mbo da ne da ya ɗaa? Da ne digi zi ya, ko ne naa dasana ma ta ɗaa?» A ka jan ta buwal zi go: «Kadɗa nee ma̰ janna go: ‹Da digi ya›, ma̰ jan nee go: ‹Kyaɗa aŋ ba hon fareba na ta to ɗaa?› 26Amma kadɗa nee ma̰ janna go: ‹Da ne naa dasana ma ta›, nee sya ɓase ma vo, ago naa pet, a kwa kwa go Yohanna anabi ne.» 27A gwan ne Jeso janna go: «I kwa to.» Jeso jan nama go: «Mbi me, mbi ne pool jan aŋ go mbi ke kaŋ mbe ma da ne ma pool de to.»

Fare sḭ ge vya ma azi ne

28Aŋ dwat gyana? Ndu a̰me ka ne vya sonmo ma azi. Mbo ya ge zḛ ge ta, jan na go: «Mbi vya, mbo ke temel ma̰ gaaso oyo̰r zi.» 29Na vya mbe jan na go: «Mbi mbo to!» Ne go̰r go, vya mbe er fare, mbo. 30Ndu mbe mbo ge azi ta, jan na go mbe me. na vya mbe jan na go: «Báá, mbi mbo mbo». Ne go̰r go, mbo to. 31Ne nama ge azi mbe ma buwal zi, a ge daage ke laar ɓyareya ge na bá ne ne ɗaa? A jan na go: «A ge zḛ ge.» Jeso jan nama go: «Fareba mbi jan aŋ, naa ge tyare kaŋ ma, ne naa ge ke kaya ma mbo wat muluk ge Dok ne zi aŋ ndwara zḛ. 32Ago Yohanna mbo ya aŋ ta ne viya̰ ge dosol, aŋ be hon fareba na ta to, amma naa ge tyare kaŋ ma ne naa ge ke kaya ma a ho̰ fareba na ta. No iya uwale, swaga ge aŋ ne kwa kaŋ mbe ma no ne go̰r go no puy ɗe, aŋ be saŋge ya se ɗo, aŋ ba detɗa hon fareba na ta to.»

Fare sḭ ge naa ge koy gaaso oyo̰r ma ne

(Mar 12:1-12, Luk 20:9-19)

33Za̰ me fare sḭ a̰me ge ɗogle no: Zaŋgal, ndu ga̰l ge yàl a̰me gá gaaso oyo̰r, ver na zi ne gulum, al swaga ɓerse oyo̰r na zi, sin zok gulum pala digi ne koy gaaso mbe pe, wan naa ge koy gaaso oyo̰r ma kan nama na zi, mbo gwasal. 34Swaga ge swaga yel oyo̰r ne mbya, teme na dore ma mbo ɓol naa ge temel ma, ndwara abe na oyo̰r ma ya. 35Naa ge ne ke temel ne gaaso oyo̰r zi ma wan na dore ge ɗu, a iyal na, a hun ge may, a mbal ge may ne njal me. 36Gwan teme na dore ge ɗogle ma gḛ waɗe ge zḛ ge ma, a gwan ker nama mbe go no ca. 37Ne go̰r go, teme nama na vya ya, ka jan tene go: «A ma̰ hon mbi vya hormo.» 38Amma swaga ge naa ge ne ker temel ne gaaso oyo̰r zi ma ne kwa na vya, a jan ta go: «A na vya ge zam joo ne! Mbo me ya, hṵ me nee na, maŋge me nee na joo!» 39A wan na, a cigi na gaaso go̰r zum ya, a hun na.

40Swaga ge bage gaaso oyo̰r ma̰ mbo ja ɗe, ke ne naa ge ne ke temel gaaso zi mbe ma ma̰ gyana ɗaa? 41A jan na go: «Mbo ban naa ge hun siya mbe ma uzi kakaɗak be ge kwa nama a̰se, mbo hon na gaaso mbe naa ge ker temel ge ɗogle ma tok go, nama ge a mbo gá hon na oyo̰r ma na swaga ma go.»

42Jeso jan nama go: «Aŋ be isi maktub zi go: ‹Njal ge naa ge sin zok ma ne dó na uzi, gwan ja keŋ go, na ge zok dṵṵl ne ka ne na pal to’a? No da ne Bageyal ta ya. A kaŋ ajab ne, nee ndwara zi to’a?› 43Ne da pe no ɗe, mbi jan aŋ: A mbo maŋge muluk ge Dok ne ne aŋ tok go, a mbo hon na pehir ge ɗogle ma, nama ge a mbo tol vya ma. 44[Ndu ge ne mbo detɗa njal mbe pal, mbo hal kakaca, amma ndu ge njal mbe ne mbo detɗa na pal, mbo rot uzi me.]#21:44 Swaga mbe no ne maktub a̰me ge zaŋgal ma zi to, a he na ma̰ da ne maktub ge Luka ne zi, ndi Luk 20:18.»

45Swaga ge naa ge ke tuwaleya ma ga̰l ma ne Farisi ma ne za̰ fare sḭ mbe ma no, a kwa go na jan fare mbe bama pal. 46A ka ɓyare viya̰ go bama wan na, amma a ka sya ɓase ma vo, ne da pe, naa kwa go Jeso anabi ne.

Currently Selected:

Matta 21: FGN2013

Highlight

Copy