Matta 20

Fare sḭ ge naa ge ɓar wak ma ne

1«Ndi, muluk ge digi zi ya di da ne ndu ge yàl a̰me ge ne ɗage cya̰wak vḛ ndwara abe naa ge ɓar wak ma mbo ke temel na gaaso oyo̰r zi go. 2A ne nama za̰ ta go na pot bama sile ɗu dam ɗu, teme nama mbo na gaaso zi. 3Gwan wat ya zum le gyala wak horom ndaar, kwa naa a̰me ma ne mḛya suk zi baŋ, be temel. 4Jan naa mbe ma go: ‹Mbo me mbi gaaso oyo̰r zi me, mbi ma̰ pot aŋ kaŋ ge ne na viya̰ go.› 5A mbo. Gwan wat ya zum gyala pala, ne gyala tok gasamal me, ke mbe go no ca. 6Gwan wat ya zum gasamal lamay, ɓol naa a̰me ma ne mḛya, jan nama go: ‹Kyaɗa aŋ ba dim gyala mḛya go be ge ke a̰me to ɗaa?› 7A jan na go, na da ne ndu ne abe bama mbo ke temel to pe. Jan nama go: ‹Aŋ me, mbo me mbi gaaso oyo̰r zi.›

8Swaga ge gyala ne di, bage gaaso jan na bage ne ndil temel go: ‹Tó naa ge ne mbo ɓar wak ma ya, pó nama, e pe da ne naa ge ne mbo ya go̰r dab ma ta, mo ba ɗage detɗa naa ge ne mbo ya zḛ zaŋgal ma ta.› 9Naa ge ne mbo ke temel gasamal lamay ma mbo ya, ndu ge daage ɓol sile ɗu ɗu. 10Swaga ge naa ge zḛ ge ma ne mbo ya, a ka dwat go bama ɓol kaŋ ma̰ gḛ waɗeya, amma nama sḛ ma me, ndu ge daage ɓol sile ɗu ɗu. 11Swaga ge a ne ame bama bware, a ɗage ne ta̰me digi bageyal pal, 12a jan na go: ‹Naa ge hṵsi ma no, a ke temel ler ɗu baŋ, mo ke ne nama dimma ne i go ca, i ge i ne ke yál ne cya̰wak tek ɗiŋ gasamal, gyala ne tí i ma.› 13Gwan ne ndu a̰me ɗu ne nama buwal zi janna go: ‹Kondore, mbi be ke mo sone to. Nee te za̰ ta go, mbi pó mo sile ɗu dam ɗu to’a? 14Ame mo kaŋ, mo mbo mo mborra. Laar ɓyareya ge mbi ne pal, mbi hon ndu ge hṵsi kaŋ mbyatɗa ca ne ge mo ne go. 15Mbi da ne pool ke kaŋ ge mbi laar ne ɓyare ne kaŋ ge mbi ne to’a? Ker mo yál ne mbi ne ka kwaɗa pe ɗaa?› 16Go no ɗe, naa ge hṵsi ma mbo gwan zḛ, naa ge zḛ ma gwan hṵsi.»

Jeso gwan waage na siya ne na tanna ge ndwara ataa

(Mar 10:32-34, Luk 18:31-34)

17Swaga mbo Ursalima go, Jeso abe naa ge ame hateya ge wol para azi ma ya uzi hini, jan nama viya̰ zi go: 18«Ndi, nee mbo ne go Ursalima, a mbo ɓyan Vya ge ndu ne naa ge ke tuwaleya ma ga̰l ma, ne naa ge njaŋgeya ma tok go, a mbo kun sarya siya na pal, 19a mbo ɓyan na pehir ge ɗogle ma tok go, ne da pe nama có ta ne na, nama dwagle na ne bol, nama pé na uwara kaŋgre pal me. Dam ge ataa go mbo tan digi.»

Kaɗeya ge Yakub ma ne Yohanna ná ne

(Mar 10:35-45)

20Zebede vya ma ná poseya ne na vya ma, a mbo ya na ta, gur na koo na ndwara se ndwara kaɗe na kaŋ a̰me. 21Jeso ele na go: «Mo ɓyare da ɗaa?» Jan na go: «Mbi ɓyare go, ge mo muluk zi ya, mbi vya mbe ma no jwak, ge ɗu ka mo tok matoson pal, ge ɗu mo tok magul pal me.» 22Jeso jan na go: «Aŋ kwa kaŋ ge aŋ ne kaɗe na to. Aŋ da ne pool njot kop ge mbi ne mbo njot na ɗaa?» A jan na go: «I da ne pool njot na.» 23Jan nama go: «Fareba, aŋ mbo njot mbi kop#Tkm 12:2., amma katɗa mbi tok matoson, ko mbi tok magul pal ɗe, a be mbi hon na ne to. Swaga mbe ma da ne naa ge mbi Bá ne nṵsi nama nṵsi ne nama pe ma pe.»

24Swaga ge nama ge wol ma ne za̰ fare mbe, a saŋge pore ge ná vya ge azi mbe ma pal. 25Jeso tol nama, jan nama go: «Aŋ kwa kwa go, ga̰l ge pehir ge ɗogle ma ne ma é bama koo ya bama naa ma pal, naa ge ne ndwara zḛ ma ndal bama naa ma bama pe se me. 26Ke aŋ buwal zi go to, amma kadɗa ndu a̰me ne aŋ buwal zi ɓyare kat aŋ ga̰l, na gwa̰ tene ke temel hon aŋ, 27ndu ge ne ɓyare kat naa ndwara zḛ ne aŋ buwal zi, na ka aŋ mo̰r. 28A go mbe no, Vya ge ndu ne mbo ya go a ke temel hon na to, amma na ke temel hon naa, na ho̰ tene dimma ne kaŋ zurra go ndwara zur naa gḛ me.»

Jeso zon ɓaal ma azi

(Mar 10:46-52, Luk 18:35-43)

29Swaga ge a ne ɗage wat ne suwal Jeriko diŋ ya zum, naa gḛ a ka kare na pe. 30Ndi, ɓaal ma azi katɗa viya̰ kiya̰r go, swaga ge a ne za̰ go na Jeso kale ne ɗe, a ɗage oyya go: «O Bageyal, Dawda vya, kwa i a̰se!» 31Ɓase ma ka mḛre nama, nama ɗame. Amma a ka gwan oyya digi ndaar go: «O Bageyal, Dawda vya, kwa i a̰se!» 32Jeso mḛ se, tol nama ya, jan nama go: «Aŋ ɓyare go mbi ke ne aŋ da ɗaa?» 33A jan na go: «Bageyal, hage i ndwara fa̰ ma!» 34Jeso kwa nama a̰se, tat nama ndwara fa̰ ma, swaga mbe go juju, a gá kwa swaga, a kare na pe.

Currently Selected:

Matta 20: FGN2013

Highlight

Copy