Matta 19

Hateya gwale yanna pal

(Mar 10:1-12)

1Swaga ge Jeso ne á na fare ma pe wanna ɗe, ɗage ne Galile go, mbo suwal Yahudiya, maŋgaɗam Urdun le may ya. 2Naa gḛ a kare na pe ya, ka zon nama.

3Farisi a̰me ma mbo ya na ta, a he na pe ne fare janna go: «Da ne na viya̰ go ge ndu yan na gwale ne fare a̰me pe ɗaa?» 4Gwan ne nama janna go: «Aŋ be isi ne maktub zi go: ‹pe eya go, Bage dolla ke nama ndu son ne ndu gwale to’a#Pe 1:27, 5:2.?› 5Jya̰ go: Ne da pe no ɗe, ndu son mbo ya̰ na bá ma ne na ná, mbo mbarge ne na gwale, a mbo gá sḛ duur ge ɗu#Pe 2:24.. 6Nama sḛ ma jwak a be gwan gá azi to, amma sḛ duur ge ɗu. Ne pe no ɗe, kaŋ ge Dok ne ɓa̰ na, na kaage ndu na varse na to bat.» 7A gwan ne na janna go: «Kyaɗa Musa ba hon wak go, a ho̰ gwale maktub yanna, a yá̰ na ɗaa#Dwa 24:1, Mat 5:31.?» 8Jan nama go: «Ne dulwak togreya ge aŋ ne pe, Musa ho̰ aŋ viya̰ no go, aŋ yá̰ aŋ gwale ma, amma pe eya go, be kat go to. 9Mbi jan aŋ go: Ndu ge daage pet ge ne yan na gwale ya, ɗeŋgo kadɗa da ne zina kerra pe to, gwan mbo san gwale ge ɗogle, ke zina.»

10Naa ge ame hateya ma jan na go: «Kadɗa fare ge ndu son ne ge na ndu gwale ta mbe go ɗe, be ke kwaɗa ge ndu san gwale to.» 11Gwan ne nama janna go: «Naa wan fare mbe pe pet to, a nama ge a ne ho̰ nama na kwarra ɗeŋgo. 12Ago naa a̰me ma ajibaŋ ne bama ná ma laar zi ya day, a̰me ma saŋge ajibaŋ ne naa dasana ma ta, a̰me ma ke ta ajibaŋ no ne muluk ge digi zi ya pe me. Bage ne pool ge wan pe, na wa̰ pe.»

Jeso e wak busu naa jabso pal

(Mar 10:13-16, Luk 18:15-17)

13A gene naa jabso ya na ta, ne da pe na é na tok nama pal, na kaɗe ne nama pe me, amma na naa ge ame hateya ma ka mḛre nama. 14Jeso jan nama go: «Yá̰ me naa jabso, tele me nama be ge mbo ya mbi ta to, ago muluk ge digi ya da ne naa ge ne nama go ma pe.» 15E na tok nama pal go, ɗage, mbo ne swaga mbe go.

Vya dore ge tok pool

(Mar 10:17-31, Luk 18:18-30)

16Ndi, ndu a̰me mbo ya na ta, jan na go: «Bage hateya, mbi ke ma kaŋ ge kwaɗa ɗo, mbi ba ɓol ndwara ge ɗiŋnedin ɗaa?» 17Jeso jan na go: «Mo te ele mbi fare ge kaŋ ge kwaɗa pal gyana ɗaa? Bage kwaɗa ɗu kikit. Kadɗa mo ɓyare wat ndwara zi, koy wak honna ma.» 18Ele na go: «Ge daage ɗaa?» Jeso jan na go: «Mo gale hun siya baca, mo gale ke zina ɓaca, mo gale ke sayda ge hale mo kon pal ɓaca, 19mo ho̰ mo bá ma ne mo ná hormo, mo laar wa̰ mo kon dimma ne mo sḛ go#Wat 20:12-16, Dwa 5:16-20, Lev 19:18..» 20Vya dore mbe jan na go: «Kaŋ mbe ma no pet mbi ke mborra ya nama pal, a ma kaŋ woɗege mbi ne iya ɗaa?» 21Jeso jan na: «Kadɗa mo ɓyare kat hatal ɗe, mbo, yá mo kaŋ ma uzi, mo hon naa ge a̰se ma, mo mbo ɓol kaŋ kwaɗa ma digi zi ya, mbo ya, mo kare mbi pe.» 22Swaga ge vya dore mbe ne za̰ fare mbe no, na duur su leɗet, gwan, ne da pe, ka da ne kaŋ ɓolla ma gḛ ge be to.

23Jeso jan na naa ge ame hateya ma go: «Fareba mbi jan aŋ, a haŋle ge be to ge ndu ge ne kaŋ ɓolla ma gḛ wat muluk ge ne digi zi ya zi. 24Mbi gwan jan aŋ go uwale, a fogor ge jambal wat libra ndwala zi, ge ndu ge ne kaŋ ɓolla wat muluk ge Dok ne zi.» 25Swaga ge naa ge ame hateya ma ne za̰ fare mbe no, a ke ajab ge be to, a jan go: «A wuɗi day máya ne ɗaa?» 26Jeso ndil nama ɗer, jan nama go: «Ne naa dasana ma ta day to, amma kaŋ ma pet a day day ne Dok ta.»

27Swaga mbe go Bitrus her fare, jan na go: «Ndi, i yá̰ kaŋ ma uzi pet, i kare mo pe no, mbo kat gyana ne i pe ɗaa?» 28Jeso jan nama go: «Fareba mbi jan aŋ, Aŋ ge ne kare mbi pe ma, ge dunya ge giya̰l zi, swaga ge Vya ge ndu ne mbo katɗa na hool ge hormo pal, aŋ mbo kat hool ma wol para azi pal me, aŋ mbo kun sarya pehir ge wol para azi ge Israyela ne ma pal#Dan 7:14.. 29Ndu ge daage pet ge ne mbo ya̰ na yàl ya, ko na ná vya ge sonmo ma, ko na ná vya ge gwale ma, ko na bá, ko na ná, ko na gwale, ko na vya ma, ko na swaga ma ya uzi, ne dḭl ge mbi ne pe, mbo ɓol ta pal ndwara kis, mbo gwan ame ndwara ge ɗiŋnedin joo me. 30Naa ge zḛ ge ma gḛ a mbo gwan hṵsi, naa ge hṵsi ma mbo gwan zḛ me.»

Currently Selected:

Matta 19: FGN2013

Highlight

Copy