Matta 18

Ndu ge ne waɗe ne ga̰l ge muluk ge Dok ne zi

1 # Mar 9:33-37, Luk 9:46-48. Swaga mbe go, naa ge ame hateya ma mbo ya Jeso ta, a jan na go: «A wuɗi waɗe ne ga̰l ge muluk ge digi zi ya go ne ɗaa?» 2Tol vya jyale a̰me ya, é na nama tuŋsi zi, 3jan nama go: «Fareba mbi jan aŋ, kadɗa aŋ erra, aŋ saŋge dimma ne naa jabso go to, aŋ mbo wat muluk ge digi zi ya zi to bat. 4Ne da pe no ɗe, ndu ge ne gwan tene ya jyale dimma ne vya jyale mbe no go, mbo kat ndu ge ne waɗe ne ga̰l ge muluk ge digi zi ya zi. 5Ndu ge ne mbo ame vya jyale ya dimma ne ge no mbe go ne dḭl ge mbi ne pe, ame mbi.

6 # Mar 9:42-48, Luk 17:1-2. Ndu ge ne mbo katɗa kaŋ syal koo ne vya jyale a̰me myalam ɗu ne nama ge ne ho̰ fareba mbi ta ma buwal zi pe, a golgo a vwal njal nan swara ga̰l na ka̰l zi, a dol na maŋgaɗam ga̰l yuwam pul se ya. 7Woo dunya, ne kaŋ syal koo ma pe! Ago a ŋgat kaŋ syal koo ma mbo ya. Amma woo ne ndu ge kaŋ syal koo ne mbo ne na ta ya! 8Kadɗa mo tok, ko mo koo é mo koo syalla ne, kṵ nama, mo dol nama uzi ya ne mo ta, a golgo ne mo pe ge mo wat ndwara zi ne tok duul ko koo duul, ge a te ya dol mo ol ge ɗiŋnedin zi ya ne mo tok ma jwak ko ne mo koo ma jwak. 9Uwale, kadɗa mo ndwara fa̰ é mo koo syalla ne, zwagle na, mo dol na uzi ya ne mo ta, a golgo ne mo pe mo wat ndwara zi ne ndwara fa̰ ɗu, ge a te ya dol mo ol ge jahanama ne zi ne mo ndwara fa̰ ma jwak.

10 # Luk 15:3-7. Ke me haŋgal, sḛ́ me ndu a̰me ɗu ne naa jabso mbe ma no buwal zi to bat, ago mbi jan aŋ go, nama maleka ma mḛ ya mbi Bá ge ne digi zi ya ndwara se ɗaɗak. 11[Ago Vya ge ndu ne mbo ya má naa ge ne ba̰ ma.]#18:11 Swaga ge ne kole ne zi mbe no ne maktub ge zaŋgal a̰me ma zi to. A he na ma̰ da ne maktub ge Luka ne zi, ndi Luk 19:10.

12Aŋ dwat gyana? Kadɗa ndu a̰me da ne tame ma kis, a̰me ɗu ne nama buwal zi ya̰me, yá̰ ge wara lamaɗo ne para lamaɗo ma njal pala digi, mbo ɓyare ge ne ya̰me mbe to’a? 13Kadɗa na day ya ɓol na, fareba mbi jan aŋ, ke laar saal ne na pe waɗe ge wara lamaɗo para lamaɗo ge ne ya̰me to ma. 14Go no me, aŋ Bá ge ne digi zi ya ɓyare go ndu a̰me ɗu kikit ne naa jabso mbe ma buwal zi na ba̰ to bat.»

Viya̰ ge ɓyare poreya ne

15«Kadɗa mo ná vya ke [mo]#18:15 Swaga mbe no ne maktub a̰me ge zaŋgal ma zi to. Maktub a̰me ma jan «mo» mbe no to. sone ya, mbo, aŋ ne na buwal zi azi ɗeŋgo, mo mḛre na. Kadɗa na za̰ mo ya, mo ɓol mo ná vya go. 16Kadɗa na za̰ mo ya to, ɓó ndu a̰me ɗu ko naa azi, ne da pe, fare mbe nṵsi naa azi ko ataa ndwara se#Dwa 19:15.. 17Amma Kadɗa na kuri ya be za̰ nama, jya̰ ɓase ge Dok ne ma, kadɗa na kuri ya be za̰ ɓase ge Dok ne ma, ndi me na dimma ne ndu ge dunya go, ko dimma ne ndu ge tyare kaŋ go.

18Fareba mbi jan aŋ: kaŋ ge daage pet ge aŋ ne mbo vwal na ya suwar se, mbo kat vwalla digi zi ya, uwale, kaŋ ge daage pet ge aŋ ne mbo sá na ya suwar se, mbo kat saaya digi zi ya me#16:19, Yoh 20:23.. 19Uwale, mbi jan aŋ go: Kadɗa naa azi ne aŋ buwal zi, ge dunya no zi, a za̰ ta ya kaɗe kaŋ ge daage pet, mbi Bá ge ne digi zi ya mbo hon nama na. 20Ago swaga ge naa azi ko ataa ne kote dḭl ge mbi ne zi, mbi ya nama buwal zi me.»

Fare sḭ ge mo̰r ge ne kuri pore na kon ne

21Swaga mbe go Bitrus mbo ya, jan na go: «Bageyal, kadɗa mbi ná vya ke mbi sone ya, mbi pore na ndwara gyana ga ɗaa? Ɗiŋ ndwara ɓyalar’a?#Luk 17:4.» 22Jeso jan na go: «Mbi jan mo go, ɗiŋ ndwara ɓyalar to, amma ɗiŋ ndwara wara ɓyalar ndwara ɓyalar.

23Ne da pe no ɗe, muluk ge digi zi ya di da ne gan a̰me ge ne ɓyare go na ɓó isiya ge na kaŋ ma ne ne na mo̰r ma ta go. 24Pe eya go, a gene na mo̰r a̰me ge te ya hon na talent dudubu wol ya. 25Ne jo̰ be ɓol a̰me ge potɗa to, na bageyal hon wak go a yá na uzi, poseya ne na gwale ma, ne na vya ma, ne na kaŋ ma pet, na pó na wul uzi. 26Mo̰r mbe dol tene se, gur na koo na ndwara se, jan na go: ‹He sabur, mbi mbo pot mo na mwaɗak!› 27Mo̰r mbe na bageyal kwa na a̰se, gwan isi wul na pal to, ya̰ na mborra. 28Swaga ge mo̰r mbe ne wá ya zum, ɓol na kon a̰me, na ge na wul ne na pal sile kis. Kan na tok na ka̰l zi, jan na go: ‹Pó mbi, mbi kaŋ!› 29Na kon dol tene se, gur na koo na ndwara se, jan na go: ‹He sabur, mbi mbo pot mo na!› 30Amma na sḛ kuri bat, mbo dol na daŋgay zi, ɗiŋ na pot kaŋ ge ne na pal gale ɓya. 31Swaga ge na kaam ma ne kwa kaŋ ge na sḛ ke, nama dulwak vḛne, a mbo wan bama bageyal kaŋ ge bama kon mbe ne ke ma pe mwaɗak. 32Na bageyal teme a tó na ya, jan na go: ‹Mo̰r ge sone, mbi ya̰ mo wul ge mo te ya pot na uzi pet, ne mo ne kaɗe mbi pe, 33be mbyat ge mo kwa mo kon a̰se dimma ne mbi ne kwa mo a̰se go to’a?› 34Pore juliliya ge na ne zi, na bageyal hon na naa ge pool ma tok go, ɗiŋ na pot kaŋ ge ne na pal mwaɗak. 35Mbi Bá ge ne digi zi ya mbo ke ne aŋ go no me, kadɗa aŋ pore aŋ ná vya ma ya ne aŋ dulwak ma zi ya to#6:14..»

Currently Selected:

Matta 18: FGN2013

Highlight

Copy