Matta 17

Dir erra ge Jeso ne

(Mar 9:2-13, Luk 9:28-36)

1Dam myanaŋgal go̰r go, Jeso abe Bitrus, ne Yakub ma ne na ná vya Yohanna, a ndé njal a̰me ge haal pala digi ya hini jyan. 2Na dir er nama ndwara zi, na ndwara ka serra ne gyala go, na ba̰r ma saŋge saal taɗak ne kwaya̰l go#2Bit 1:16-18.. 3Ndi, Musa ma ne Iliya dyan nama ta, a ka sigɗi fare ne na. 4Bitrus hé fare, jan Jeso go: «Bageyal, a kwaɗa ge nee gá katɗa go go. Kadɗa mo vin’a, ya̰ mbi la gúr ataa go go, ɗu ne mo pe, ɗu ne Musa pe, ɗu ne Iliya pe me.» 5Gale ne swaga jan fare go, pḭr a̰me ge serra kulbi nama zi, ka̰l a̰me ndage ne pḭr zi ya janna go: «No a mbi vya ge laar wanna ne, na ge mbi sḛ ne ke tuli ne na, za̰ me na!» 6Swaga ge naa ge ame hateya ma ne za̰ ka̰l mbe no, vo wan nama ge be to, a kubi bama pul suwar se. 7Jeso mbo ya nama ta, tat nama, jan nama go: «Ɗage me digi, sya me vo to!» 8Swaga ge a ne ɗage digi, a kwa Jeso hini ɗu. 9Swaga ge a ne ka kan bama koo ne njal pala digi ya se, Jeso zwal nama togor, na kaage nama jya̰ ndu a̰me kaŋ ge nama ne kwa na mbe to bat ɗiŋ Vya ge ndu ne tan ne naa ge siya ma buwal zi gale ɓya.

10Naa ge ame hateya ma a ele na go: «Ne da pe naa ge njaŋgeya ma ba ka jan go Iliya mbya mbo ya zḛ ne ɓya ɗaa?» 11Gwan ne nama janna go: «A fareba, Iliya mbo mbo ya, mbo gwan ne kaŋ ma bama byalam ge zaŋgal go pet. 12Amma mbi jan aŋ go, Iliya mbo ja mbo zo, a be kwa na to, a ke ne na kaŋ ge bama laar ne ɓyare. Go no me, Vya ge ndu ne mbo njot yál nama tok go.» 13Swaga mbe go no, naa ge ame hateya ma kwa go, na jan bama da ne Yohanna bage ke naa baptisma.

Jeso zon vya ge ne su mbuɗuɗum

(Mar 9:14-29, Luk 9:37-43)

14Swaga ge ne mbo ya ɓase ma ta, ndu a̰me mbo ya na ta, gur na koo na ndwara se, 15jan na go: «Bageyal, kwa mbi vya a̰se, su mbuɗuɗum, za̰ yál gḛ ge be to, ka det ol zi, ne mam se ndwara wowol. 16Mbi gene na ya mo naa ge ame hateya ma ta, amma a be day ge zon na to.» 17Jeso jan go: «Doŋ pe ge be hon fareba ma, naa ge ya̰l ma, Mbi mbo kat dḛ ne aŋ ɗiŋ ma swaga go ga ɗaa? Mbi mbo ka in aŋ dḛ ɗiŋ ma swaga go ga ɗaa? Gene me mbi na ya.» 18Jeso mḛre o̰yom ge seŋgre, na sḛ ndage ne vya mbe zi uzi. Swaga mbe go juju, vya mbe zon. 19Naa ge ame hateya ma mbo ya Jeso ta hini jyan, a ele na go: «Kyaɗa i ba day yan o̰yom ge seŋgre mbe to ɗaa?» 20Gwan ne nama janna go: «Da ne hon fareba ge aŋ ne ŋgeɗo pe. Fareba mbi jan aŋ: Kadɗa hon fareba ge aŋ ne cecḛ dimma ne mutarde ndwara go ga puy ɗe, kadɗa aŋ jan njal mbe no ya go na zwagre tene ne swaga mbe no go uzi, mbo zwagre tene, kaŋ a̰me ge tyane aŋ mbo kat to bat. [21O̰yom ge seŋgre hir mbe ge go no ndageya ɓyare kaɗeya ne asiyam mbḛ]#17:21 Swaga ge ne kole ne zi mbe no ne maktub a̰me ma zi to..»

Jeso waage na siya ne na tanna

(Mar 9:30-32, Luk 9:43-45)

22Swaga ge a ne kote ya suwal Galile diŋ, Jeso jan nama go: «A mbo ɓyan Vya ge ndu ne naa tok go, 23a mbo hun na, dam ataa go̰r go, mbo tan digi.» A ke laar pisil gḛ ge be to.

Siyal ge zok ge mbegeya ne potɗa

24Swaga ge a ne mbo ya suwal Kafarnahum go, naa ge ne ame siyal ge zok ge mbegeya ne ma mbo ya Bitrus ta, a ele na go: «Aŋ bage hateya pot siyal ge zok ge mbegeya ne to ɗaa?» 25Jan nama go: «Pot na pot.» Swaga ge a ne wá ya diŋ, Jeso gace na fare janna go: «Mo dwat gyana, Siman? A wuɗi ma tyare gan ge dunya ne bama kaŋ siyal ma ne ɗaa? A vya twala, ko gwasal ma ɗaa?» 26Bitrus Jan na go: «A gwasal ma.» Jeso jan na go: «Vya twala ma pot to ko? 27Ge na ka kaŋ syal koo ne nama pe to, mbo maŋgaɗam wak ya, mo dol kuwa, mḭ sii ge ma̰ mbo ja zḛ he kuwa ya digi, mo hage na wak, mo ma̰ ɓol sile ɗu. Hé na, mo hon nama na, ne nee ne mo pe.»

Currently Selected:

Matta 17: FGN2013

Highlight

Copy