Luka 9

Temeya ge naa ge ame hateya ma ne

(Mat 10:5-15, Mar 6:7-13)

1Swaga ge ne kote na naa ge wol para azi ma ya, hon nama pool ge o̰yom ge seŋgre ma pal pet, hon nama ge zon moy ma me. 2Teme nama mbo oy fare ge muluk ge Dok ne, ne zon moy ma me. 3Jan nama go: «Hé me a̰me ne viya̰ pe to, ko calaŋ, ko galam, ko kaŋzam, ko bware. Ndu a̰me na abe ba̰r kap to. 4Yàl ge daage pet ge ne ame aŋ ya, ka me na go, ɗiŋ aŋ ɗage mborra ne swaga mbe go. 5Kadɗa a ame aŋ ya to, swaga wat ne suwal mbe diŋ zum go, pé me aŋ koo kuci ma uzi na pal, mbo kat sayda ne nama pe.»

6A kan ta mborra, a mbo suwal ge daage diŋ pet, a ka oy fare ge kwaɗa, a ka zon moy ma swaga ge daage go pet.

Tumriya ge Herodus ne

(Mat 14:1-12, Mar 6:14-29)

7Herodus, bage ne dó na ndwara ne suwal Galile pal, za̰ fare ge ne ke mbe ma mwaɗak, gwan kwa kaŋ ge kerra to. Ago naa a̰me ma ka jan go: «A Yohanna tan ne siya ma buwal zi ne», 8a̰me ma ka jan go: «A Iliya gwa̰ ya ne», a̰me ma uwale, a ka jan go: «A anabi ge zaŋgal a̰me ta̰ ne.» 9Amma Herodus jan go: «Mbi kṵ Yohanna pala, a wuɗi ne iya ɗo, mbi ba ka gwan za̰ fare mbe ma no ɗaa?» Ka ɓyare go na kwa Jeso.

Jeso wal naa dudubu anuwa̰y

(Mat 14:13-21, Mar 6:30-44, Yoh 6:1-14)

10Swaga ge naa ge temeya ma ne gwa̰ ya, a wan na kaŋ ge bama ne ke ma pe mwaɗak. Abe nama, a ne nama mbo uzi ya nde, suwal ge a tol na Betsayda ziyar ya. 11Amma swaga ge ɓase ma ne kwa, a kare na pe ya. Ame nama, ka wan nama fare ge muluk ge Dok ne pe, ka zon naa ge a ne ka ɓyare zonna ma me. 12Swaga ge gyala ne ɗage dimma, na naa ge wol para azi ma mbo ya ta, a jan na go: «Ya̰ ɓase ma, nama mbo suwal ma diŋ ya, ne suwal vya ge jyale ma ge ne nama ziyar go ma ya, mbo ɓyare swaga dwamma ne kaŋzam ge zamma. Ago ne go go no, nee ya ful pul zi.» 13Na sḛ jan nama go: «Aŋ sḛ ma ho̰ me nama kaŋzam.» A jan na go: «I da ne katugum ma anuwa̰y ne sii ma azi baŋ. I sḛ ma ta mbo ma̰ mbo yat kaŋzam ya ne, ne ɓase mbe ma pe pet kyala?» 14Ago naa ka swaga mbe go mbo kaŋ ge dudubu anuwa̰y go. Jan na naa ge ame hateya ma go: «E me nama katɗa se naa wara anunuwa̰y.» 15A ke mbe go tem, a e naa katɗa se pet. 16Abe katugum ge anuwa̰y ma ne sii ge azi mbe ma, hé na ndwara digi, e wak busu nama pal, siɗi nama se, hon na naa ge ame hateya ma, nama va ɓase ma. 17A zam, a huri mwaɗak, a abe pe ge ne ga ma ya digi gum wol para azi#2Gan 4:42-44..

Bitrus jan go Jeso Kris ne

(Mat 16:13-19, Mar 8:27-29)

18Dam a̰me ɗu, ne swaga ke kaɗeya uzi ya hini go, na naa ge ame hateya ma kat ne na me, ele nama go: «Naa jan go mbi wuɗi ne ɗaa?» 19A gwan ne na janna go: «Naa a̰me ma jan go mo Yohanna bage ke naa baptisma ne, ge may ma jan go mo Iliya ne, ge may ma me go anabi ge zaŋgal a̰me ta̰ ne.» 20Jan nama go: «Aŋ sḛ ma ɗe, aŋ jan go mbi wuɗi ne ɗaa?» Bitrus he fare, janna go: «Mo Kris ge Dok ne ne.»

Jeso waage na siya ma ne na tanna

(Mat 16:20-28, Mar 8:30—9:1)

21Jeso wan nama togor na kaage nama jya̰ ndu a̰me fare mbe to bat. 22Gwan jan go: «A ŋgat Vya ge ndu ne njot yál gḛ, naa ga̰l ma ne ga̰l ge naa ge ke tuwaleya ma, ne naa ge njaŋgeya ma kuri na, a hun na, dam ataa go̰r go mbo tan digi.»

23Jan naa pet go: «Kadɗa ndu a̰me ɓyare mbo ya mbi pe go, na kuri tene, na ka in na uwara kaŋgre dam ne dam, na kare mbi pe ya. 24Ndu ge ne ɓyare koy na sḛ, mbo ban tene. Amma ndu ge ne mbo ban tene ya ne mbi pe, mbo má tene. 25A ma kaŋ mam ne ge ndu ɓol dunya mwaɗak, amma ban na sḛ uzi, ko burmi tene uzi ɗaa? 26Ago, ndu ge ne mbo ke mbi saaso ya, ko ke saaso ne fare ge mbi ne, Vya ge ndu ne mbo ke na saaso swaga ge ne mbo gwan ja hormo ge na ne zi, ne ge na Bá ma ne maleka ge mbegeya ma ne zi. 27Fareba mbi jan aŋ, naa a̰me ma ge a ne mḛ ne swaga mbe no go go ma buwal zi, a mbo su zḛ be ge a kwa muluk ge Dok ne to to bat.»

Dir erra ge Jeso ne

(Mat 17:1-8, Mar 9:2-8)

28Dam tiimal go̰r ge ne jya̰ fare mbe go, abe Bitrus, ma ne Yohanna ma ne Yakub mbo njal pala digi ya mbo ke kaɗeya. 29Swaga ke kaɗeya go, na dir er, na ba̰r saŋge saal taɗak. 30Ndi, naa azi a ka sigɗi fare ne na. A Musa ma ne Iliya 31dya̰ ta ya hormo zi ne, a ka jan ta fare ge mborra ge na ne, ge na wak ne mbo wi Ursalima ya. 32Bitrus ma ne na kaam ma son dam ya vop. Swaga ge a ne kore digi, a kwa hormo ge na ne, ne naa ge azi ge a ne nama ne mḛ mbe ma me. 33Swaga ge naa mbe ma ne ka ɓyare gwanna go, Bitrus jan Jeso go: «Bage hateya, a kwaɗa go nee ka me go go. Ya̰ i ɗū gúr ataa, ɗu ne mo pe, ɗu ne Musa pe, ɗu ne Iliya pe me.» Ago be wan fare ge na ne jan pe to. 34Swaga ge ne ka jan fare mbe go, pḭr mbo ya kulbi nama zi, vo wan naa ge ame hateya ma ge be to, swaga ge pḭr ne ka kulbi nama zi go. 35Ka̰l a̰me ndage ne pḭr zi ya janna go: «Ndu mbe no, a mbi vya ge talla ne, za̰ me na!» 36Swaga ge ka̰l mbe ne ɗage farra, Jeso gá ya hini. A zane wak ɗamal, dam mbe ma pul zi ya, a wan ndu a̰me kaŋ ge bama ne kwa na mbe pe to.

Jeso zon vya ge ne o̰yom ge seŋgre

(Mat 17:14-18, Mar 9:14-27)

37Dam ge kwap ge go, swaga ge a ne ka̰ bama koo ne njal pala digi ya se, ɓase ma gḛ a mbo ya na ta. 38Ndi, ndu a̰me ne ɓase ma buwal zi ndage na ka̰l digi oyya go: «Bage hateya, mbi kaɗe mo, ndi mbi vya, a na ne myalam ɗu kikit. 39Ndi, swaga ge o̰yom ge seŋgre ne wan na, ka e na fyalla, ka pil na, na wak ka zam hore, kan na avun to, lwage na lwage kakatak. 40Mbi kaɗe mo naa ge ame hateya ma nama ndage na uzi, a be day to.» 41Jeso jan go: «Doŋ pe ge be hon fareba ma, naa ge ya̰l ma, Mbi mbo kat dḛ ne aŋ ɗiŋ ma swaga go ga ɗaa? Mbi mbo ka in aŋ dḛ ɗiŋ ma swaga go ga ɗaa? Gene mbi mo vya mbe ya.» 42Swaga ge vya mbe ne mbo ya, o̰yom ge seŋgre mbe dol na se, ka pil na. Jeso mḛre o̰yom ge seŋgre, zon vya mbe, hon na na bá. 43Naa pet a ke ajab ne pool ge ɓaŋlaŋ ge Dok ne pe.

Jeso gwan waage na siya

(Mat 17:22-23, Mar 9:30-32)

Ne jo̰ ndu ge daage ka ke ajab ne kaŋ ge ne ka kerra pe, jan na naa ge a̰me hateya ma go: 44«Wa̰ me fare ge mbi ne jan aŋ mbe no aŋ pala zi kwaɗa: A mbo ɓyan Vya ge ndu naa tok go.» 45Amma a wan fare mbe pe to. Ago woy woy ne nama ta, ne da pe, na kaage nama wa̰ na pe to. A ka sya vo ge be gwan ele na fare, fare mbe pal to.

A wuɗi waɗe ne ga̰l ne

(Mat 18:1-5, Mar 9:33-37)

46Fare ɗaŋgreya wat nama buwal zi go, na wuɗi waɗe ne ga̰l ne bama buwal zi ne de? 47Ne jo̰ Jeso kwa nama dwatɗa ma kwa ɗe, wan vya jyale ya na ta zi, 48jan nama go: «Ndu ge ne ame vya jyale mbe no ya dḭl ge mbi ne zi, ame mbi. Ndu ge ne ame mbi, ame bage ne teme mbi ya. Ndu ge ne waɗe ne jyale ne aŋ buwal zi pet, a na waɗe ne ga̰l ne.»

Ndu ge ne ke ho̰l ne aŋ to a aŋ ndu ne

(Mar 9:38-40)

49Yohanna her fare, jan na go: «Bage hateya, i kwa ndu a̰me ne yan o̰yom ge seŋgre ma ne dḭl ge mo ne, i ɓyare no go i tele na, ne da pe na sḛ kare mo pe dagre ne i to.» 50Jeso jan na go: «Tele me na to, ago ndu ge ho̰l ne aŋ to, a aŋ ndu ne.»

Suwal a̰me ge Samariya ne kuri be ame Jeso

51Swaga ge na dam ge mbo digi ne ga gwa, vin tene go na mbo Ursalima. 52Teme naa na ndwara zḛ ya. A mbo wat suwal ge Samariya ne a̰me diŋ ndwara nṵsi swaga ne na pe. 53Amma a ame na to, ne da pe ka mbo Ursalima. 54Swaga ge na naa ge ame hateya ma, Yakub ma ne Yohanna ne kwa no, a jan go: «Bageyal, mo ɓyare go i tó ol ne digi ya, na ti nama uzi ɗaa?» 55Saŋge tene nama ta se, mḛre nama: 56A kale mbo suwal ge ɗogle ya.

Naa ge ne ɓyare kare Jeso pe ma

(Mat 8:19-22)

57A ya swaga mborra go, ndu a̰me jan na go: «Mbi mbo kare mo pe swaga ge daage ge mo ne mbo go.» 58Jeso jan na go: «Bole ma da ne tuul ma, njoole ma da ne vum ma, amma Vya ge ndu ne swaga ge pá na pala go to.» 59Jan ndu ge may go: «Kare mbi pe ya.» Na sḛ gwan ne na janna go: «Ya̰ mbi mbo mbul mbi bá ya gale ɓya.» 60Amma Jeso jan na go: «Ya̰ siya ma nama mbú ta, mbo ne fare ge muluk ge Dok ne pe oyya.» 61Ge may jan na go: «Mbi mbo kare mo pe, Bageyal, ya̰ mbi mbo san mbi naa ge yàl ma wak ya gale ɓya.» 62Amma Jeso jan na go: «Ndu ge ne wan na tok ya sa̰a̰l ta gar kaŋ, saŋge na ndwara na go̰r go ndil swaga, be mbyat ne muluk ge Dok ne pe to.»

Currently Selected:

Luka 9: FGN2013

Highlight

Copy