Luka 8

Naa zaab ge a ne ka kare Jeso pe ma

1Go̰r go, Jeso ka mbo suwal ga̰l ma, ne suwal ge jyale ma go oy fare ge kwaɗa ge muluk ge Dok ne, na naa ge wol para azi ma ka mbo dagre ne na, 2poseya ne naa zaab ma mbut, nama ge a ne ɓó zonna ne o̰yom ge seŋgre ma ne moy ma go: A Maryam na ge a ne tol na Magdala, na ge o̰yom ge seŋgre ma ɓyalar ne ndage ne na zi, 3ne Johanna ge Kuza gwale, bage koy Herodus kaŋ ma, ne Susanna, ne ge may ma gḛ ge a ne ka mbar nama ne bama kaŋ ma.

Fare sḭ ge bage zareya ne

(Mat 13:1-9, Mar 4:1-9)

4Ɓase ma gḛ a ka kote ya na ta, naa ne suwal ma ya hini hini a ka mbo ya na ta, ke nama fare sḭ mbe no: 5«Bage zareya a̰me zut mbo zare na kaŋ hir. Swaga zareya go, kaŋ hir a̰me ma kan viya̰ go, naa ndal nama bama koo zi, njoole ma cot nama uzi me. 6A̰me ma kan her pal, swaga ge a ne pya ya digi, a fya̰ uzi, ne logom gḛ to pe. 7A̰me ma a kan kore ma buwal zi, a ne kore ma don ya digi dagre, a kage nama se. 8A̰me ma a kan suwar ge kwaɗa go, a don digi, a tol hir kis.» Swaga ge ne jya̰ fare mbe no, oy digi go: «Ndu ge ne togor ge za̰ya, na za̰.»

Kyaɗa Jeso ba ka jan fare ne sḭ ɗaa

(Mat 13:10-17, Mar 4:10-12)

9Na naa ge ame hateya ma ele na go fare sḭ mbe pe wanna gyana ɗaa? 10Jan nama go: «Aŋ ɗe, a ho̰ aŋ go aŋ kwa fare ɗimil ge muluk ge Dok ne, amma naa ge may ma ɗe, a ke nama fare sḭ ma, ne da pe, nama ndi, amma nama kwa to, nama za̰, amma nama wa̰ pe to.»

Fare sḭ ge bage zareya ne pe wanna

(Mat 13:18-23, Mar 4:13-20)

11«Fare sḭ mbe pe wanna no: Kaŋ hir, a fare ge Dok ne. 12Nama ge ne ka̰ viya̰ go ma, a naa ge a ne za̰ fare, go̰r go, Saytan mbo ya abe na ne nama dulwak zi uzi, ndwara go nama ho̰ fareba ɗo, nama ba má to. 13Nama ge ne ka̰ her pal ma, a naa ge a ne za̰ fare, a ame na ne laar saal, amma nama too to. a hon fareba swak baŋ, swaga ge pe herra ne mbo ya, a gwan ne go̰r. 14Nama ge a ne ka̰ kore ma buwal zi ma, a naa ge a ne za̰ fare, amma dwatɗa ma, ne kaŋ ɓolla ma, ne tuli ge dunya ne ma ɓage fare mbe, a ya̰ na viya̰ ge ke temel nama zi to. 15Nama ge a ne ka̰ suwar ge kwaɗa go ma, a naa ge a ne za̰ fare ne dulwak ge kwaɗa ne ge jwap, a koy na, a ka tol vya ma ne wan ta zi.»

Fare sḭ ge ɗuli ne

(Mar 4:21-25)

16«A e ɗuli go, a kubi na kaŋ zi to, ko a é na saŋgal pe zi to. Amma a é na ɗuli kal pala digi, ndwara go naa ge ne mbo ya zok zi ma kwa swaga kwaya̰l. 17Ago kaŋ a̰me ge woyya ge ba dyan zum to to, kaŋ a̰me ge ɗimil ge ba dyan kwaya̰l go to to. 18Ke me haŋgal ne fare ge aŋ ne za̰. Ago ndu ge ne kaŋ, a mbo gwan hon na pal, amma ndu ge be kaŋ, ko kaŋ ge ne dwat go na na ne, a mbo maŋge na ne na tok go uzi.»

Jeso ná ma ne na ná vya ma

(Mat 12:46-50, Mar 3:31-35)

19Na ná ma ne na ná vya ma mbo ndwara ɓol na, amma a day mbo na ta zi ya to ne ɓase ma pe. 20A mbo ya waage na go: «Mo ná ma ne mo ná vya ma ya zum, a ɓyare ndil mo.» 21Amma na sḛ gwan ne nama janna go: «Mbi ná ma ne mbi ná vya ma, a nama ge a ne za̰ fare ge Dok ne, a ka ke temel na pal.»

Jeso mḛre saam

(Mat 8:23-27, Mar 4:35-41)

22Dam a̰me ɗu, a ne na naa ge ame hateya ma ndé fak go, jan nama go: «Há me nee mam le may ya,» a har zum ya. 23Swaga harra go, Jeso fi dam. Saam ɗage labreya mam pul go, mam ɗage ndar fak go, a ka ɓyare ɗimiya. 24A mbo ya na ta, a kore na digi, a jan na go: «Bage hateya, bage hateya, nee ban ne go ban.» Swaga ge ne kore digi, mḛre saam ma ne sḭḭl. A mḛ́, swaga iyal selel. 25Jan nama go: «Hon fareba ge aŋ ne ya da ɗaa?» Vo wan nama, a ke ajab, a ka jan ta go: «Na sḛ wuɗi ne ɗo saam ma ne sḭḭl ba ka za̰ na wak ɗaa#Kmb 65:8, 89:10, 107:23,32.?»

Jeso zon ndu ge ne o̰yom ge seŋgre

(Mat 8:28-34, Mar 5:1-20)

26A det ya suwal ge Gerasen ma ne go, na ge ne Galile ndwara ŋga. 27Swaga ge ne ka̰ na koo se, ndu a̰me ge ne suwal mbe diŋ, ge o̰yom ge seŋgre ma ne na zi mbo ya na ta. Ndu mbe ke ya kaal be ge kan ba̰r, be ge dwam zok zi me, amma dwam ya siim ma pal. 28Swaga ge ne kwa Jeso, á na pe fyalla, gur na ndwara se, ndage na ka̰l janna go: «Jeso, Dok ge ne digi zi ya vya, mo ɓyare da ne mbi ta ɗaa? Mbi kaɗe mo, iigi mbi to.» 29Jeso mḛre o̰yom ge seŋgre na wá ne ndu mbe zi zum. Ago o̰yom ge seŋgre mbe ka iigi na ndwara wowol, a ka fet na se ndwara koy na ne zul ma, amma ka hal nama uzi. O̰yom ge seŋgre mbe ka gene na mbo ful pul zi. 30Jeso ele na go: «A tol mo gyana ɗaa?» Na sḛ gwan ne na janna go: «Ɓase», ago o̰yom ge seŋgre ma ka na zi gḛ ge be to. 31A kaɗe na go na kaage na teme bama mbo táál ge siya ma ne se ya to. 32Swaga mbe go, kosoŋ ma ne sul zam ne njal pe go. A kaɗe na go na teme bama mbo wat kosoŋ mbe ma zi, na sḛ vin nama. 33swaga ge a ne wá ne ndu mbe zi ya zum, a mbo wat kosoŋ ma zi, kosoŋ mbe ma harge ta ne wakal wak haal digi ya, a kan ta mam se ya, a su uzi. 34Swaga ge naa ge a ne ka koy kosoŋ mbe ma ne kwa kaŋ mbe ma no, a syat bama pe so, a mbo waage fare mbe suwal ga̰l diŋ, ne suwal vya ge jabso ma go me. 35Naa mbo ya ndil kaŋ ge ne ke mbe. Swaga ge a ne dé ya Jeso ta, a ɓol ndu ge o̰yom ge seŋgre ma ne ndage ne na zi mbe ne ba̰r na ta, ne katɗa halas Jeso koo se. Vo wan nama. 36Naa ge a ne kwa kaŋ mbe ma, a wan nama viya̰ gyana ge ndu ge ne ka ne o̰yom ge seŋgre ma ne ɓo zonna. 37Naa ge suwal Gerasen ma pet a kaɗe Jeso na abe tene uzi ya ne bama suwal go, ago vo ge ɓaŋlaŋ wa̰ nama ne. Ndé fak go, gwan. 38Ndu ge o̰yom ge seŋgre ma ne ndage ne na zi mbe kaɗe Jeso go na gá kat da ne na, amma Jeso ya̰ na mborra, jan na go: 39«Gwa̰ mo ya, wa̰ kaŋ ge Dok ne ke mo ma pe pet naa ta.» Na sḛ gwan suwal diŋ ya, waage fare ge Jeso ne ke ne na naa ta pet.

Zonna ge gwale ge swama pwalla ne ma ne tanna ge Jayrus vya ne

(Mat 9:18-26, Mar 5:21-43)

40Swaga ge Jeso ne gwa̰ ya, ɓase ma mbo ya kun na, ne da pe naa pet a ka da̰re na. 41Ndi, ndu a̰me, na ndil Jayrus, a ga̰l ge Sinagog ne ne, mbo ya gur Jeso ndwara se, ka kaɗe na go na mbo ya na diŋ, 42ago da ne vya gwale ɗu kikit, ka da ne del wol para azi, ka ɓyare su su. Swaga mborra go, ɓase ma terse na zi ge be to, ka ɓyare njiya.

43Gwale a̰me ge ne pwal swama ya del wol para azi ka swaga mbe go, ago na sḛ á na kaŋ ɓolla ma mwaɗak naa ge ke naa jam ma ta, ndu a̰me be day zon na to. 44Saŋge tene ne na go̰r ya, tat na ba̰r wak, swaga mbe go juju na swama pwalla á. 45Jeso jan go: «A wuɗi tá mbi ne ɗaa?» Naa pet a é bama wak, Bitrus jan na go: «Bage hateya, ɓase ma ve mo ver, a terse mo zi no!» 46Amma Jeso jan go: «Ndu a̰me tá mbi, ago mbi kwa pool ndageya ne mbi zi.» 47Swaga ge gwale mbe ne kwa go na pe fut ya zum ɗe, mbo ya ne ndatɗa, dol tene na ndwara se. Wan ɓase ma fare ge ne e na tat Jeso pe, ne ɓolla ge na ne ɓo zonna ne se se no pe me. 48Jeso jan na go: «Mbi vya, hon fareba ge mo ne zon mo go, mbo halas!»

49Ne swaga jan fare mbe no go gale, ndu a̰me yan ne ga̰l ge Sinagog ne mbe diŋ ya, jan go: «Mo vya su ya ya. Gwan da̰a̰me bage hateya to.» 50Swaga ge Jeso ne za̰ fare mbe no, jan ga̰l ge Sinagog ne mbe go: «Sya vo to, ho̰ fareba zo, ma̰ zon!» 51Swaga ge ne ya̰ ya diŋ, be ya̰ ndu a̰me wat na pe zi to, ya̰ ɗeŋgo Bitrus, Yohanna, Yakub, vya bá ma ne na ná ɗeŋgo. 52Naa pet a ka fyalla, ne kḭḭmi ne vya gwale mbe pe. Amma Jeso jan go: «Fya me to, be su su to, fi dam.» 53A ka cot ta ne na, ne da pe, a kwa go, na su su. 54Swaga ge ne wa̰ na tok, tol na, jan go: «Vya jyale, ɗage digi!» 55Na o̰yom gwan’a, na sḛ ɗage digi, hon nama wak go, a ho̰ na kaŋ zam. 56Na bá ma ke ajab, amma wan nama togor go, na kaage nama wa̰ ndu a̰me fare ge ne ke mbe pe zum to bat.

Currently Selected:

Luka 8: FGN2013

Highlight

Copy