Pe eya 49
49
Wak busu ge Yakub ne na vya ge wol para azi ma pal
1Yakub tol na vya ma ya, jan nama go: «Kote me ta ya, mbi ba waage aŋ kaŋ ge ne mbo ɓol aŋ dḛ ya dam ge hṵsi ma zi ya.
2Kote me ta ya,
Yakub vya ma, za̰ me!
Za̰ me aŋ bá Israyela!
3Ruben, mo ge mbi vya pul soy,
mo ge mbi ne e pe tol mo,
mbi gale ne mbi pool, ne mbi ndaar jyan.
Mo waɗe mo ná vya ma waɗe ne pool ne pateya me,
4mo julili julili dimma ne maŋgaɗam go.
Mo mbo kat naa ndwara zḛ to bat,
ne da pe, mo fí ne mo bá gwale,
go mbe no, mo be hon mbi swaga fiya hormo to,
ne mo ne fí ne mbi gwale pe.
5Simeyon ma ne Levi ná vya,
nama kasagar ma da ne fare vḛneya pe.
6Na kaage mbi wá mbi wak pala ɓanna ge nama ne zi to!
Na kaage mbi wá tene koteya ge nama ne zi to!
Ago pore juliliya ge nama ne zi, a hṵ naa,
hirgil ge nama ne zi, a kṵ nday ma koo too ma.
7Wak vḛneya na ka nama pore kerra pal,
ago a kaŋ vḛne fare ne,
wak vḛneya na ka nama juliliya pal,
ago a kaŋ hun siya ne.
Mbi mbo varse nama pehir ma se Yakub vya ma buwal zi,
mbi mbo ɓarse nama pehir ma se suwal Israyela go.
8Yuda, mo ná vya ma mbo uware mo.
Mo tok mbo kat mo naa ge ho̰l ma baŋgay pe go.
Mo bá vya ma mbo gur bama koo ma mo ndwara se.
9Yuda sonne bool ne.
Mbi vya, mo jyat da ne mo swaga wan kaŋ ya!
Yuda syal na koo se fiya dimma ne sonne pool go,
dimma ne sonne ná go, a wuɗi day e na ɗage digi ne ɗaa?
10Calaŋ plando mbo maŋge ne vuwal pe ge Yuda ne tok go to bat,
calaŋ ge gan ne mbo kat ɗaɗak na vuwal pe go,
ɗiŋ bage ne mbya ame na mbo ya ne ɓya.
Pehir ma pet a mbo gwan ne bama pala na pe se.
11Vwal na kwara oyo̰r ta,
vwal na kwara vya oyo̰r ge siŋli ta.
Usi na ba̰r da ne oyo̰r jiya̰l,
usi na ba̰r ga̰l da ne oyo̰r swama.
12Na oyo̰r jiya̰l mbo zuli se bindik
ɗiŋ é na ndwara fa̰ ma cili kaal kekeŋ,
na pam mbo zuli bindik ɗiŋ saŋge na kiya̰r ma saal taɗak.
13Zabulon mbo kat maŋgaɗam ga̰l yuwam wak go,
na sḛ mbo kat mam wak ge fak ga̰l ma ne yabe go,
na suwal warbe ma mbo det ɗiŋ suwal Sidon ya.
14Isakar kwara pool ne,
ge ne fí ne ɗyagarta ma buwal zi.
15Na sḛ ndi go swaga ge na ne ɗigli tene ne na go no na kwaɗa,
suwal ge na ne na go no na siŋli.
Na sḛ só na ganwak se ne kaŋ dṵṵl pe inna,
ho̰ tene ne temel mo̰r pe kerra.
16Dan mbo kat na suwal pal,
dimma ne pehir ge may ma ge Israyela ne ma go.
17Dan mbo kat bom viya̰ go,
mbo kat maŋgay koo-pul go.
Mbo ka syal tisi ma koo pitigil,
naa ge ne tisi pal ma mbo det.
18O! Bage ɗiŋnedin,
mbi é mbi saareya ma ya mo pal ne máya ge mbi ne pe.
19Gad, naa mbo ɓan pe ya mo pal det mo,
amma mo mbo hál nama digi.
20Ne Aser ta, kaŋzam mbo zuli bindik.
Na sḛ mbo ka hon gan kaŋzam ge siŋli ne.
21Neftali a bagɗe ge suli ne,
na sḛ mbo tol vya ge siŋli ma.
22Yusuf a uwara ɗufiya ge ne ɗḭ ne mam wak go ne,
na tok ma rubi ɗiŋ gulum ga̰l pala digi.
23Naa ge mbal kajamle ma ɓyare na fare,
a mbá na ne bama kajamle ma,
a terse na.
24Amma na sḛ wa̰ na kajamle ndindiŋ,
na biyal ma ka pool ŋguŋgu,
ne pool ge Bage pool pet ge Yakub ne,
mo saŋge bage koyya,
njal ge Israyela ne.
25Tok pool ge Dok ge mo bá ne,
na só mo ko̰r,
Bage pool pet na é mo na wak busu,
na sugi mo bobo ma ne digi zi ya,
na ho̰ mo bobo ma ne suwar se digi me,
na ho̰ mo hir, na zuli mo kavaar ma se me.
26Wak busu ge mo bá ne
waɗe kwaɗa ma ge njal ge ɗiŋnedin ma ne waɗe,
waɗe kaŋ kwaɗa ma ge njal ge zaŋgal ma ne waɗe.
Ya̰ wak busu mbe ma ka Yusuf pal,
na ka ge bage a ne mbege na ne na ná vya ma buwal zi pal.
27Bayami a bagomso ge wan kaŋ ne,
cya̰wak, zam na kaŋ ge na ne wa̰,
gasamal, ka var kaŋ ge na ne hṵ.»
28Nama mbe ma no mwaɗak, a pehir ge wol para azi ge Israyela ne ma ne. No a fare ge nama bá ne jya̰ nama swaga ge ne ka é nama wak busu go ne. Ndu ge daage ɓó na wak busu ne na pala hini cat.
Siya ge Yakub ne
29Go̰r go, hon nama na wak go: «Se no, mbi jyat mbo mbi bá ma pe ya, mbu me mbi dagre ne mbi bá ma, ge taal siya ge ne gaaso pul ge Efron, ndu ge Hittitiya ne go. 30Ge njal pṵṵl ge Makpela ne zi, na ge ne Mamre ziyar go gwa, suwal Kanan go, na ge a gaaso pul ge Abraham ne yá na ne Efron, ndu ge Hittitiya ne tok go ne mbul ta pe. 31A mbu Abraham ma ne na gwale Sara swaga mbe go, a mbu Isaku ma ne na gwale Rebeka swaga mbe go, mbi me, mbi mbu Lea swaga mbe go. 32Gaaso pul ma ne njal pṵṵl ge ne na zi mbe a yá nama da ne Hittitiya ma tok go.» 33Swaga ge Yakub ne á hon na vya ma na wak siya go ɗe, abe na koo ma na saŋgal digi, ndar o̰yom, jyat na bá ma pe ya.
Currently Selected:
Pe eya 49: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
