Pe eya 48

Yakub é na wak busu Yusuf vya ma pal

1Go̰r kaŋ mbe ma no go ɗe, a mbo ya jan Yusuf go: «Mo bá ne go moy.» Abe na vya Manasa ma ne Efrayim jwak, a mbo. 2Swaga ge a ne jya̰ Yakub go, mo vya Yusuf yan ja ndil mo ɗe, wan tene digi, kat na saŋgal wak go. 3Yakub jan Yusuf go: «Dok ge pool pet dya̰ tene mbi ta Luz, ge suwal Kanan go, é mbi wak busu no.» 4Na sḛ jya̰ mbi go: «Ndi, mbi mbo hon mo hir, mbi mbo zuli mo se lala̰y, mbi mbo saŋge mo pehir ma ɓase gḛ, mbi mbo hon suwal mbe no mo pehir ma, mbo gá nama joo ɗiŋnedin#Tkm 7:5.. 5Se no, mo vya ge a tó suwal Masar go, mbi gale ne be mbo ya mo ta suwal Masar go ma, a mbi vya ma ne. Mo vya Efrayim ma ne Manasa jwak a mbi ne ma ne, dimma ne Ruben ma ne Simeyon go. 6Amma vya ge mo ne tó nama nama go̰r go ma, a mo ne ma ne. A mbo ɓol bama joo dagre ne bama ná vya ma. 7Swaga ge mbi ne ka gwan ne Paddan-Aram ya, Rachel su mbi tok go, Kanan go, viya̰ mbo suwal Efrata go. Mbi mbu na swaga mbe go, viya̰ mbo suwal Efrata go, na ge a Betlehem.»

8Israyela kwa Yusuf vya ma, ele go: «Naa mbe ma no, a wuɗi ma ne ɗaa?» 9Yusuf jan na bá go: «A vya ge Dok ne ho̰ mbi nama go go ma ne.» Israyela jan na go: «Gene mbi nama ya, mbi ba e nama wak busu.»

10Ne jo̰ Israyela hatɗa sabar, na ndwara ma dameya, gá ya be kwa swaga ɗe, Yusuf gene nama ya na ta, bur nama na sḛ zi, ka komre nama. 11Israyela jan Yusuf go: «Mbi be dwat go mbi mbo kwa mo ndwara to, ndi Dok é mbi ya gwan kwa mo hir ma.» 12Yusuf abe nama ne na bá koo ya uzi, gur na koo suwar se. 13Go̰r go, Yusuf abe na vya ma jwak, wan Efrayim ne na tok matoson go, ago na sḛ ka Israyela tok magul go, wan Manasa ne na tok magul me, ago na sḛ ka Israyela tok matoson go me. Abe nama ya na ta. 14Israyela é na tok matoson ge Efrayim, na ge jyale pal, é na tok magul ge Manasa pal. Ne jo̰ Manasa ka vya pul soy puy ɗe, kaŋgre na tok ma kaŋgre nama pal. 15E na wak busu Yusuf pal go:

«Dok ge mbi bá Abraham ma ne Isaku

ne ka mborra na ndwara se,

Dok ge ne koy mbi ne go ɗiŋ ma̰ no,

16maleka ge ne zu mbi ne sone ge daage zi

na é wak busu naa jabso mbe ma pal!

Ne nama ta mbi dḭl gá tolla,

mbi bá Abraham ma ne Isaku dḭl ma tó me.

Nama ɓó hir, nama zuli se la̰y suwar pal.»

17Swaga ge Yusuf ne kwa go na bá é na tok matoson ya Efrayim pal go ɗe, na sḛ za̰ tuli to. Wan na bá tok ne Efrayim pal, é na Manasa pal. 18Yusuf jan na bá go: «Báá, a go to, a bage no vya pul soy ne, é mo tok matoson na pal.» 19Na bá kuri, jan go: «Mbi vya, mbi kwa kwa, na sḛ me, na pehir mbo saŋge ɓase, mbo hat ɓaŋlaŋ me, amma na ná vya ge jyale mbo kat ga̰l waɗe na, na pehir ma mbo saŋge pehir ma gḛ suwar pal.» 20Dam mbe go, é na wak busu nama pal go:

«Ne aŋ ta, Israyela vya ma mbo gá é wak busu ta pal go:

Dok ke mo kwaɗa dimma ne na ne ke Efrayim ma ne Manasa go!»

A go no, Israyela e Efrayim Manasa ndwara zḛ no. 21Israyela jan Yusuf go: «Se no mbi su su! Amma Dok mbo kat ne aŋ, mbo gwan ne aŋ mbo suwal ge aŋ bá ma ne ya. 22Amma mo ɗe, mbi hon mo joo waɗe mo bá vya ma, mbi ho̰ mo suwal Sichem, na ge mbi ne ame na ne Amoriya ma tok go ne mbi kasagar ma ne mbi kajamle.»

Currently Selected:

Pe eya 48: FGN2013

Highlight

Copy