Bage oy fare 9
9
Kaŋ a̰me ya go ɗu ne naa pe pet
1Mbi hale fare ma pe pet, mbi ɓó go, naa ge dosol ma, ne naa ge zwama ma, ne bama kaŋ kerra ma pet a ya Dok tok go. Naa dasana ma kwar go bama mbo ɓol laar wanna, ko kwaneya to, a ne nṵsiya fare a̰me pal to. 2Vareya ne ndu a̰me pe to. Ndu ge dosol ma ne ndu ge sone a da̰re kaŋ ge ɗu, ndu ge kwaɗa, ko ndu ge yaɗat, ko ndu ge seŋgre, ko ge ne tyare tuwaleya, ko ge ne tyare tuwaleya to, a da̰re kaŋ ge ɗu. Ndu ge kwaɗa, ko ndu ge sone, ndu ge ne ke wak tuli Dok ndwara se, ko ndu ge ne ke to, a da̰re kaŋ ge ɗu. 3Kaŋ ge ne waɗe haŋle gḛ ge ne ke ne suwar pal, ago naa dasana ma pet, a da̰re kaŋ ge ɗu. Da ne pe no, naa dasana ma hon ta ke sone no, a ka ke kaŋ ge bataraŋ ma, ago pe aya ge nama ne a sú sù. 4Ago ndu ge ne ndwara da ne jobreya. Gú ge ne ndwara waɗe sonne ge ne su waɗe. 5Naa ge ne ndwara ma kwa kwa go bama sú sù, amma naa ge siya ma kwa a̰me to, ne jo̰ nama sḛ ne jobreya potɗa a̰me pal to, ndu ge gwan dwat nama pal to.
6Nama laar wanna ma, ne nama kwaneya ma, ne nama yil ma pet a burmi ya swaga. A ne viya̰ ge gwan ke kaŋ a̰me ge ne ke ne suwar no pal to bat.
7Mbo, za mo kaŋzam ne mo laar ɓyare, njó mo oyo̰r jiya̰l ne laar saal, ago Dok sḛ za̰ tuli ya go ne kaŋ kerra ge mo ne ma.
8Ya̰ dam ma mwaɗak, mo ba̰r na ka saal taɗak, mo ka kan num ge hur tuli ma mo pala digi me. 9Ke tuli ne gwale ge mo laar ne wa̰ na, ge dam ma ŋgeɗo ge Dok ne ho̰ mo na katɗa suwar pal go. No a varra ge mo ne ndwara ne ne temel yál ge mo ne ho̰ tene kerra suwar pal pe ne#Frs 5:18..
10Kaŋ ge daage pet ge mo ne ɓol na ya kerra á tene ke na, ago ge táál ge siya ma ne ya, swaga ge mo ne mbo na ya, kaŋ a̰me ge kerra to, ko fare ŋgayya, ko kwarra, ko zwama a̰me to bat.
Ndu ge kwar yál ge ne ɓyare ɓol na to
11Uwale, mbi ndi kaŋ ge ne suwar pal ma, mbi ɓó go, a be naa ge sḛ fogor ma ba̰a̰re so waɗeya ne mbḛ to, a be naa ge pool ma hal pore ne mbḛ to, a be naa ge zwama ma ɓol kaŋzam ne mbḛ to, a be naa ge ɗalla ma ɓol kaŋ ne mbḛ to, a be naa ge kwar fare ma ɓol kwar a̰se ne mbḛ to. Ago swaga ge tuli ma ne ge sone ma ɓol nama ɓol mwaɗak.
12Ndu dasana kwar kaŋ ge ne mbo det na pal to. Na sḛ dimma ca ne sii ge kool ne wan na go, ko ne njoole ge faɗe ne wan na go. Yál tan naa dasana ma tan tukcuk.
Zwama ge naa ne ndil na kaŋ senna
13Uwale, ge suwar no pal, mbi kwa fare a̰me ge ne ke mbi yál gḛ ge zwama pal. 14Suwal jyale a̰me, naa ŋgeɗo baŋ ne na diŋ. Gan ge pool gḛ a̰me mbo ya det na pore, tor swaga digi ver na se. 15Ge suwal mbe diŋ, ndu a̰me ge a̰se, ge zwama ge te ya má suwal mbe ya go, amma ndu ge dwat na pal to.
16Mbi jan go: zwama golgo waɗe pool. Amma naa sen zwama ge ndu ge a̰se ne sen, na fare janna ma naa za̰ nama to.
17A golgo mo zá̰ fare janna ge suul ge ndu ge zwama ne, ge mo za̰ ba̰yya ge gan ne ba̰y naa ge dale ma.
18Zwama golgo waɗe kaŋ pore ma. Amma sone ɗu kikit vḛne kaŋ kwaɗa ma gḛ.
Currently Selected:
Bage oy fare 9: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
