Bage oy fare 8
8
Ndu a̰me ge ne kwarra mbyatɗa tap to
1A wuɗi ge dimma ne bage zwama go ne, ge ne mbya hare fare mbe no pe ne ɗaa? Zwama ge ndu ne hon na kwaya̰l, er na hal pore er me. 2Mbi jan go: gwa̰ ne mo pala gan pe se, ne guniya ge mo ne guni tene Dok ndwara se pe.
3Há tene abe tene ne na ta uzi to. Mḛ mo ko fare ge sone pal to. Ago gan da ne pool ke kaŋ ge na laar ne ɓyare. 4Ago fare ge gan ne jan da pool. A wuɗi mbyat ɗaŋgre na ne go: «Mo te ke da go ɗaa?» 5Ndu ge ne gwan ne na pala na pe se ne pool ge ke fare ge sone to. Amma ndu ge zwama kwar swaga ma, ne viya̰ ge kwaɗa ge kerra ma kwa.
6Ago, dam a̰me ɗu kaŋ ma pet a mbo det ya swaga sarya go, ne da pe, sone kerra ge naa dasana ma ne a ɓaŋlaŋ. 7Ndu a̰me ge wan kaŋ ge ne mbo kerra pe to. A wuɗi day jan ne go: kaŋ mbe ma kerra mbo kat dḛ go ɗaa?
8Ndu a̰me ge kat ne pool na o̰yom pal to, ndu a̰me ge tele tene katɗa ne na ndwara to, ndu a̰me ne pool ge na dam siya pal to me. Ndu a̰me ge ɓur ne kyarga mbe no zi to. Ndu ge sone, na sone kerra ne pool ge hon na viya̰ ge ɓurra to.
9Mbi hale kaŋ ge ne ke ne suwar pal ma pe pet, mbi kwa go, dam a̰me ma ya go, ge naa dasana ma ne ke muluk bama kaam pal ne ke nama yál pe. 10Uwale, mbi kwa mbulla ge naa ge sone ma ne. Naa ka mbo zok ge mbegeya zi ya, a ka gwan’a, a kwa uware nama suwal diŋ, a vyale nama kaŋ kerra ge sone ma. No uwale, a a̰me pe ne to.
11Ne jo̰ a kun sarya kaŋ kerra ge sone pal avun cap to, dulwak ge naa dasana ma ne wi wi ne ene ge ke sone. 12Ko ndu ge sone na ke sone ndwara kis, ko na ke kaal tata suwar pal puy, mbi kwa go, a naa ge ne sya Dok vo ma mbo zá̰ tuli ne, ne da pe, a da ne vo na ndwara se#Frs 10:27.. 13Amma tuli a̰me ne ndu ge sone pe to. Dimma ne gḭḭl ne kale go, nama dam ma mbo ndiri zḛ to bat, ne da pe, a sya Dok vo to.
14Kaŋ ge ne tiiɗi naa a̰me ke ya suwar pal. Ago naa ge dosol a̰me ma ɓol yál ge naa ge sone ma te ya ɓol na, naa ge sone ma a̰me me, a ɓol tuli ge naa ge dosol ma te ya ɓol na. Mbi jan go, no uwale a be a̰me pe no to. 15Mbi dore tuli za̰ ya, ne da pe, kaŋ ge siŋli ne ndu dasana pe suwar pal, ago na zá, na njó, na zá̰ tuli. No a kaŋ ge ne ɗame na na temel kerra ma zi ne, ge dam ma ge Dok ne ho̰ na katɗa suwar pal go#Bag 2:24..
16Swaga ge mbi ne ho̰ tene ɓyare kwar zwama pe, ne ndil temel ge naa ne hon ta na kerra ɗaal ne gyala be ge ya̰ ta viya̰ fi dam to, 17mbi ndi kaŋ ge Dok ne ke ma mwaɗak. Mbi ɓó go ndu dasana ne pool ge wan kaŋ ge Dok ne ke ne suwar pal ma pe pet to, ko na ho̰ tene ɓyare na pe lilit puy, na sḛ ne pool ge wan na pe to. Ko bage zwama jya̰ go, na da ne kwarra puy, na sḛ ne pool ge wan na pe to bat.
Currently Selected:
Bage oy fare 8: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
