Bage oy fare 10

Zwama golgo waɗe dale

1Susu ma su ya num ge hur tuli pal, a vḛne na vḛne. Go no me, fare dale ge cecḛ vḛne zwama ma ne hormo vḛne. 2Dwatɗa ge ndu ge zwama ne é na ke kaŋ ge ne na viya̰ go, amma dwatɗa ge ndu ge dale ne é na ke kaŋ ge ne na viya̰ go to. 3Swaga ge ndu ge dale ne mbo viya̰ go, ne jo̰ haŋgal ge jwap ne na zi to, naa pet a kwa kwa go, na ndu ge dale ne.

4Kadɗa mo ga̰l saŋge pore ya mo pal, kaage mo neŋge be gwan ke temel to. Ago wan ta tele naa be ke sone ge ɓaŋlaŋ ma#Frs 16:14..

5Kaŋ ge haŋle ge mbi ne gwan kwar na suwar pal, ago ndu ga̰l da ne pool ge ke kaŋ ge ne na viya̰ go to. 6Ndu ge dale da ne pool ɓol temel ge ga̰l, naa ge hamba ma ɓol temel ge be a̰me pe to me. 7Mbi kwa mo̰r ma ndwarra tisi ma pal, amma naa ga̰l ge suwal ne ma kereya ne bama koo dimma ne mo̰r ma go me.

8Ndu ge ne al tuul det na tuul mbe se, ndu ge ne gul gulum bom da ne pool cot na#Frs 26:27.. 9Ndu ge ne cer njal, njal da ne pool hon na jwaŋ. Ndu ge ne wage uwara da ne pool ɓol yál. 10Kadɗa kee wak dindil, a be fyar na to, ɓyare go mo á tene ɓya mo ba ɗage syal kaŋ ne na. Ago zwama e naa uniya temel zi.

11A ma kaŋ hamba ge ndu bwaɗe bom ne, kadɗa bom cot ndu ge ne bwaɗe na cot.

12Fare ge ne ndage janna ne ndu ge zwama wak zi, ke naa tuli, amma fare janna ge ndu ge dale ne ban na ban. 13Na fare ge ne é pe janna, jan fare ge dale, á na fare janna da ne fare ge sone kakatak ma. 14Ndu ge dale sot fare janna se yayak. Ndu dasana kwa kaŋ ge ne mbo ya na pal to. A wuɗi jan na fare ge ne mbo ke na go̰r go ne ɗaa? 15Temel ge ndu ge dale ne lwage na lwage. Viya̰ ge gwan mbo suwal diŋ koko puy, na sḛ gwan kwar na to.

16Woo, suwal ge na gan a bool ne, ge na naa ga̰l ge temel ma kun digi cya̰wak tek fere ta ne kaŋzam. 17Suwal ge na gan da ne hir ge gan ne zi, da ne laar saal, ago na naa ga̰l ge temel ma zam kaŋzam da ne na viya̰ go ndwara hon ta pool, amma ne fere ta pe to.

18Zok pala gul ge ndu ge uwal pal, ndu ge ne ndil fare solom na zok ɓul na pal ɓul. 19Naa ga̰l ma ke kaŋzam ndwara ke ta sḛ tuli, oyo̰r jiya̰l cya̰me naa sḛ cya̰me, bware e naa ke kaŋ ma pet.

20Kaage mo jan fare ge sone gan pal to, ko dwatɗa ge mo ne zi, kaage mo jan fare ge sone ndu ge pool pal to, ko mo zok dwamma zi, ago njoole ma da ne pool her mo fare mbe mbo janna zum.

Currently Selected:

Bage oy fare 10: FGN2013

Highlight

Copy