Temel kerra ma 6
6
Naa ge temeya ma tal naa ɓyalar ne mbar bama pe
1Dam mbe ma pul zi, ne jo̰ naa ge ame hateya ma zuli se ceɗed, ta̰me ɗage naa ge ne far wak grek ma ne naa ge ne far wak ibriniya ma buwal zi, ne da pe a ka jan go nama ndil bama kumur ma solom swaga var kaŋzam ge dam ge daage zi ne go. 2Nama ge wol para azi ma kote ɓase ge naa ge ame hateya ma ne ya se pet, a jan nama go: «Be ke kwaɗa ge i ya̰ fare ge Dok ne uzi, i gá ne temel ge kaŋzam ne pe to. 3Ná vya ma, tá me naa ɓyalar ne aŋ buwal zi, nama ka naa ge a ne ke sayda ge kwaɗa nama pal ma, wiya ne O̰yom ge mbegeya, ne zwama me, go no i ba é nama ne temel mbe pe. 4I ɗe, i ba gá hon ta ne kaɗeya ma ne fare ge Dok ne pe ɗaɗak.» 5Fare mbe ke ɓase ma sḛ tuli, a tal Estefanus, ndu ge ne hon fareba mbyatɗa tap, wiya ne O̰yom ge mbegeya me, ne Filibus, ne Prokor, ne Nikanor, ne Timon, ne Parmenas, ne Nikolas, ndu ge ne uware Dok ge Yuda ma ne ge suwal Antiyokus ne. 6A mbo ne nama ya naa ge temeya ma ndwara se. Swaga ge a ne ke kaɗeya, a é tok nama pal.
7Fare ge Dok ne ka dasare se naa ta, naa ge ame hateya ma ka gwan zuli se gḛ Ursalima go, naa ge ke tuwaleya ma gḛ a hon fareba.
Wanna ge Estefanus ne
8Estefanus, wiya ne kwa a̰se ge Dok ne, ne pool me, ka ke kaŋ ge ajab ma ne kaŋ ŋgayya ma gḛ ɓase ma ta. 9Naa a̰me ma ne Sinagog ge a ne tol ta «Naa ge suli ma» poseya ne naa ge suwal Siren ma, ne naa ge suwal Alezandre ma, na naa ge suwal Kilikiya ma, ne naa ge suwal Asiya ma, a ne Estefanus ma ɗage ɗaŋgre ta fare. 10Amma a day pili ta ne na to, ne da pe ka jan fare da ne zwama ge O̰yom ne ka hon nà. 11A pot naa a̰me ma nama jya̰ go: «I za̰ na ne sal Musa ma ne Dok.» 12A cuci ɓase ma, ne naa ga̰l ma ne naa ge njaŋgeya ma a mbo ya wan na ne pool, a gene na Yuda ma naa ge kun sarya ma ndwara se, 13a ka e fare na pal janna go: «Ndu mbe no jan fare ge sone kakatak ma swaga mbe no pal, ne eya ma pal me. 14I za̰ na ka janna go, Jeso ge Nazaret mbe no mbo gul zok mbe no uzi, mbo er hada ge Musa ne ho̰ nee nama me.» 15Yuda ma naa ge kun sarya ma mwaɗak a ka ndil na na ndwara zi, a kwa na ndwara kat dimma ne maleka ndwara go.
Currently Selected:
Temel kerra ma 6: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
