Temel kerra ma 7
7
Fare pe wanna ge Estefanus ne
1Kep tuwaleya ele na go: «Fare mbe fareba’a?» 2Estefanus jan go: «Ná vya ma, bá ma, za̰ me mbi gale: Dok ge hormo dya̰ tene nee bá Abraham ta, swaga ge ne ka Mesopotami go, gale ne be ge mbo ya kat Haran go to#Pe 11:31, 15:7.. 3Dok jya̰ na go: ‹Ya̰ mo suwal ne mo kon-twala ma, mbo suwal ge mbi ne mbo ŋgay mo na ya ya#Pe 12:1..› 4A go no Abraham ɗage ne Kaldeya ma suwal ya mbo ya katɗa suwal Haran go no. Go̰r siya ge na bá ne go, Dok mbo ne na ya suwal ge aŋ ne ka ne na go ma̰ mbe no#Pe 11:32, 12:5.. 5Be hon na joo a̰me suwal mbe go to, ko swaga vya go cecḛ ge na koo ba e go to bat. Amma ke wak tuli go na mbo hon na joo, na mbo gá ge na vya ma ne na go̰r go me. Swaga mbe go gale ne be vya#Pe 12:7, 13:15, 16:1.. 6Dok waage na zḛ tek go na hir ma mbo mbo kat mbay suwal ge ɗogle ya, a mbo ke nama mo̰r, a mbo ke nama yál del kikis anda#Pe 15:13.. 7Amma suwal ge a ne ka mo̰r na go mbe, mbi mbo mḛre nama, a mbi Dok jya̰ ne. Ne go̰r go a mbo wat ya zum, a mbo mbo ya uware mbi swaga mbe no go#Wat 3:12.. 8Dok ho̰ na wak tuli ge ba̰y vyanna ne no, a go no swaga ge ne tó Isaku, Abraham vya̰ na ba̰y no dam ge tiimal go. Isaku ke go no me ne Yakub, Yakub ge ne nee bá ge wol para azi ma go no me#Pe 17:10-14..
9Nee bá ma ka ké yil Yusuf ta, a yá na uzi no, a gene na mbo suwal Masar no, amma Dok ka poseya ne na#Pe 37:11,28, 39:2.. 10Zu na ne yál ge daage zi no pet, ho̰ na zwama no, e na det Faraon gan ge Masar ma ne ndwara zi kwaɗa no. A go no Faraon e na suwal Masar pal no pet, ne nà yàl pal no me#Pe 41:43, 45:8.. 11Swaga ge baktar ne dé suwal Masar ma ne suwal Kanan pal mwaɗak, naa ka njot yál ge be to, nee bá ma be ɓol kaŋ a̰me ge zamma to#Pe 41:54-57, 42:5, Kmb 37:19.. 12Swaga ge Yakub ne za̰ go kaŋzam ya suwal Masar ya, teme nee bá ma ge ndwara zḛ zaŋgal#Pe 42:1.. 13Ge ndwara azi go, Yusuf ŋgay tene na bá vya ma ta no, a go no, na hir pe dya̰ zum Faraon ta no#Pe 45:1-4, 16.. 14Yusuf teme naa mbo wan na bá Yakub ma ne na hir ma ya no mwaɗak, naa wara ɓyalar para anuwa̰y#Pe 45:9-11.. 15Yakub mbo suwal Masar ya no, na sḛ su ya go poseya ne nee bá ma pet#Pe 46:3-6, 49:33, Wat 1:6, Dwa 26:5.. 16A ḭ nama ya mbo ya mbulla ge Sichem go, táál siya ge Abraham ne yá na ne Emmor vya ma tok go ge Sichem go. 17Swaga ge wak tuli ge Dok ne ke Abraham ne gá gwa wiya ɗe, Israyela vya ma zuli ta se la̰y suwal Masar go#Pe 47:27, Wat 1:7,20, Kmb 105:24., 18ɗiŋ det ya zaman ge ndu ge ɗogle ge ne kwa Yusuf to ne ame gan suwal Masar go. 19Gan mbe boge ne hir ma, ke nee bá ma yál no, ɗiŋ ka e nama dol bama vya ge kaare ma uzi, ne da pe nama su uzi#Wat 1:9-11,17,22.. 20A swaga mbe go Musa tó no, na sḛ ka siŋli Dok ndwara zi. Na bá ma wá na saba ataa bama yadiŋ#Wat 2:2, Ibr 11:23.. 21Swaga ge a ne é na ya zum, Faraon vya ge gwale he na walla no dimma ne na vya go#Wat 2:3,5,10.. 22A go no a hate Musa zwama ge Masar ma ne no pet, na sḛ pool fare janna zi, ne temel kerra zi me. 23Swaga ge ne há ne del wara anda, ɓo dwatɗa no go na gwan mbo ndil na ná vya Israyela vya ma. 24Swaga ge ne kwa ndu ne ke na sele yál, ɗaŋge na pe no, swaga gele na go, hṵ masar a̰me no#Wat 2:12.. 25ka dwat go na ná vya ma kwa go na Dok ɓyare má bama ne ne nà ta, amma a be wan na pe go to. 26Dam ge kwap ge go, gwan mbo ya no, mbo ya ɓol nama ne fol ta no, wá nama buwal zi no, jya̰ nama no go: ‹Aŋ ná vya ma ne, aŋ te ke ta yál go gyana ɗaa#Wat 2:13.?› 27Amma bage ne ka ke na kon yál maare na janna no go: ‹A wuɗi e mo i ga̰l, ko bage kun i sarya ne ɗaa? 28Mo ɓyare hun mbi dimma ne mo ne hṵ Masar dana go ɗaa?› 29Swaga ge Musa ne za̰ fare mbe no, sya mbo woy tene suwal Madiyan ya no, tó vya ma yago no azi#Wat 2:15, 22, 18:3..
30Del wara anda go̰r go, maleka dya̰ na ta ful pul ge njal Sinay ne zi no, ge ol ɗaabeya ge uwara vya ge kḭso dadab ne zi#Wat 3:1-4.. 31Swaga ge Musa ne kwa daalam mbe, ke ajab. Swaga ge ne ka ndar tene ya na ta zi go na ba kwa na kwaɗa, za̰ Bageyal ka̰l janna go: 32‹Mbi Dok ge mo bá ma ne ne, Dok ge Abraham ne, ge Isaku ne, ne ge Yakub ne.› Vo ndatɗa zi, Musa gwan ndil na to bat#Wat 3:6, 13, 15.. 33Bageyal jan na go: ‹Fage mo tyarko ma uzi, ago swaga ge mo ne mḛ ne na go mbe no a swaga ge harcal ne#Wat 3:5.. 34Mbi kwa yál njotɗa ge mbi naa ma ne suwal Masar go, mbi za̰ nama sun ta ma, mbi mbo ya no ndwara mbi ba zur nama. Se no, ndi, mbi teme mo mbo suwal Masar#Wat 3:7-10..›
35Musa mbe ge a ne maare na ne fare janna go: ‹A wuɗi e mo i ga̰l, ko bage kun i sarya ne ɗaa›, Dok teme na dimma ne ga̰l go, ko ne bage zurra go, ne viya̰ ge maleka ge ne dya̰ tene na ta ol ɗaabeya zi mbe ta. 36A na ge ne abe nama ne suwal Masar diŋ ya zum ne kaŋ ŋgayya ma ne kaŋ ajab ma ta, ge maŋgaɗam ga̰l yuwam ge kaal go, ge ful pul zi del wara anda me. 37A Musa mbe jya̰ Israyela vya ma ne go: Dok mbo hon aŋ anabi a̰me ne aŋ ná vya ma buwal zi dimma ne mbi go. 38A na ge swaga koteya ge ful pul zi go, mḛ nee bá ma ne maleka ge ne ka jan fare njal Sinay go buwal zi ne, a na uwale ame fare ge ndwara ma ne mbo ne na ya hon nee no. 39Amma nee bá ma be ɓyare gwan ne bama pala na pe se to, a kuri na uzi, a saŋge bama dwatɗa suwal Masar pal ya no, 40a jya̰ Aaron go: ‹Ke i dok ge na ba ka mbo i ndwara zḛ, ago Musa ge ne abe i ne suwal Masar ya zum mbe, i kwa kaŋ ge ne ɓo na ne ya to#Wat 32:1,23..› 41Dam mbe go, a ɗeere nday vya, a tyare tuwaleya hon kaŋ sḭḭm no, a gá ke vḛso ne kaŋ ge bama ne ke na ne bama tok zi no. 42Ne go̰r go Dok saŋge nama na go̰r, ya̰ nama gá uware kaŋ dolla ge ne digi ziya ma no dimma ne njaŋge ne maktub ge anabi ma ne zi go: Del ma wara anda ful pul zi, Israyela vya ma, aŋ ka tyare kavaar ma ne tuwaleya ge ɗogle ma hon mbi ɗaa? 43Aŋ ḭ gur ge dok Molok ne poseya ne kḭḭm ge aŋ dok guwa̰r Rayfan ne. Aŋ ɗeere kḭḭm mbe ma ndwara go aŋ ba ka uware nama. A go no mbi e naa pál aŋ mbo suwal Babilon ndwara zḛ ya no.
44Ge ful pul zi, nee bá ma ka ne gúr swaga ɓol ta, na ge Musa ne lá na wak honna ge Dok ne pal dimma ne na sḛ ne kwa na go. 45Swaga ge a ne ɓo na, Juswa nama ndwara zḛ, nee bá ma mbo ne na ya ge suwal ge bama ne ame na ne pehir ge ɗogle ma tok, nama ge Dok ne ya̰ nama uzi nama ndwara zḛ ma, gá swaga mbe go ɗiŋ dam ma ge Dawda ne zi. 46Na sḛ ɓo kwa a̰se ge Dok ne, kaɗe Dok no go na ho̰ na viya̰ ge sin zok ge mbegeya ne pehir ge Yakub vya ma ne pe. 47Amma a Salomon sḭ na zok mbe ne#1Gan 6:1,14, 1Maa 22:6, 2Maa 3:1, 5:1.. 48Bage ne digi zi ya kat zok ge ne sḭ ne naa dasana tok zi to, dimma ne anabi ma ne jya̰ go: 49‹Digi a mbi swaga katɗa ne, suwar a mbi swaga kan koo ne. Aŋ sin mbi ma̰ ma zok ɗaa? Mbi swaga ɗigli tene kat ma̰ da ɗaa? Bageyal jan ne#Isa 66:1.. 50Te be mbi sḛ ke kaŋ mbe ma ne pet to’a?›
51Aŋ naa ge pala ndaar ma, naa ge dulwak ma ne togor ma ne ame fare ge Dok ne to ma! Aŋ kuri O̰yom ge mbegeya wak kuri ɗaɗak, aŋ ne aŋ bá ma go mbe ca. 52Aŋ bá ma ke to anabi ge daage yál ɗaa? A hṵ nama ge a ne waage mborra ge ndu ge dosol ne ya, na ge ne se no aŋ ne kuri na, aŋ ne hṵ na me. 53Aŋ ge aŋ ɓo eya ge Dok ne ne maleka ma ta, amma aŋ be gwan ne aŋ pala eya mbe pe se to.»
Siya ge Estefanus ne
54Swaga ge a ne za̰ fare mbe ma no, a ɗage julili pore, ne sul bama kiya̰r ma Estefanus pal. 55Na sḛ wiya ne O̰yom ge mbegeya, dusi na ndwara ndil swaga digi, kwa hormo ge Dok ne, kwa Jeso ne mḛya Dok tok matoson pal me. 56Jan go: «Ndi, mbi kwa pḭr ne digi ya hageya, Vya ge ndu mḛ ya Dok tok matoson pal.» 57A ndage bama ka̰l ba̰yya, a dibi ma togor ma, a njet so ya na pal, 58a ɓyan na ya suwal go̰r zum, a mbal na ne njal uzi. Naa ge sayda ma ka̰ bama ba̰r ma ge bool a̰me ge a ne tol na Sawul ndwara zi. 59A mbal Estefanus ne njal ma, na sḛ ka kaɗeya go: «Bageyal Jeso, ame mbi o̰yom.» 60Gur na koo se, oy ne ka̰l ndaar go: «Bageyal, kaage mo isi sone mbe nama pal to!» Swaga ge ne jya̰ fare mbe no, su.
Currently Selected:
Temel kerra ma 7: FGN2013
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.