Temel kerra ma 5

Ananiyas ma Safira

1Ndu a̰me ge a ne tol na Ananiyas ma ne na gwale Safira, yat bama swaga uzi. 2A ne na gwale za̰ ta, a abe bware wak uzi nde, a mbo ne ge ne ga ya hon naa ge temeya ma. 3Bitrus jan na go: «Ananiyas, Saytan te ame mo dulwak gyana mwaɗak ɗo, mo ba kun O̰yom ge mbegeya hale, mo ba varse bware ge mo gaaso yé ne uzi ya ɗaa? 4Swaga ge mo gale ne ya na uzi to ɗe, be kat mo ne to ɗaa? Mo ne ya na uzi no puy ɗe, bware be te ka be mo ne to ɗaa? Dwatɗa ge go mbe te wá mo dulwak zi gyana ɗaa? Mo be kun hale naa dasana ma to, amma mo kun hale Dok.» 5Swaga ge Ananiyas ne za̰ fare mbe no, det, su. Naa ge a ne za̰ fare mbe ma pet, vo ge baŋlaŋ wan nama. 6Bool ma ɗage ya digi, a yage na, a mbo ne na mbo mbulla.

7Kaŋ ge ler ataa go go̰r go, na gwale yan’a, na sḛ be kwa kaŋ ge ne ke to. 8Bitrus ele na go: «Jya̰ mbi gale, aŋ yá gaaso mbe uzi bware go ga ɗaa?» Na sḛ jan na go: «A yé mbe ne.» 9Bitrus jan na go: «Aŋ te za̰ ta gyana ndwara kugi O̰yom ge Bageyal ne ɗaa? Ndi naa ge a ne mbo mbul mo obe ma ne viya̰ wak pal no, a ma̰ mbo ne mo me.» 10Swaga mbe go juju, det Bitrus ndwara se, su. Swaga ge bool ma ne wá ya zi, a ɓol na suya, a hé na, a mbo ne na mbo mbulla na obe ziyar go. 11Ɓase ge Dok ne ma pet, ne naa ge a ne za̰ fare mbe ma mwaɗak, vo ge ɓaŋlaŋ wan nama.

Naa ge temeya ma ke kaŋ ŋgayya ma pe gḛ gḛ

12Naa ge temeya ma ka ke kaŋ ŋgayya ma ne kaŋ ajab ma gḛ ɓase ma buwal zi. Nama sḛ ma mwaɗak a mḛ wak dagre ɗu ge viya̰ wak ge Salomon ne go. 13Ne naa ge may ma buwal zi, ndu a̰me ge mbo ya ɓan tene ne nama kat to, amma naa ka uware nama ge be to. 14Naa sonmo ma ne naa zaab ma a ka gwan hon fareba Bageyal ta, naa ge hon fareba ma ka gwan zuli se gḛ waɗeya. 15Naa ka gene moy ma ya eya viya̰ ga̰l ma go, fiya daŋ ma ne saŋgal go, ne da pe swaga ge Bitrus ne ɗage kaleya, na kḭḭm dé naa a̰me ma ta. 16Naa ka sya ne suwal ge ne Ursalima ziyar go ma ya, a ka gene naa ge moy ma ne naa ge o̰yom ge seŋgre ne iigi nama ma ya, mwaɗak a ka ɓol zonna.

Wanna, ne zurra ge naa ge temeya ma ne

17Swaga mbe go kep tuwaleya ma ne naa ge ne na pe go ma pet, ndwara go Saduki ma, a ɗage ya digi ne yil, 18a wan naa ge temeya ma, a kan nama daŋgay zi naa ndwara go pet. 19Ɗaal zi, maleka ge Bageyal ne hage zok daŋgay wak, abe nama ya zum, jan nama go: 20«Mbo me mḛ́ zok ge mbegeya zi, waage me ɓase ma fare ge ndwara mbe no ne mwaɗak.» 21A za̰ na wak, cya̰wak vḛ, a mbo zok ge mbegeya zi ya, a ka hate naa. Kep tuwaleya ma ne na naa ma mbo ya, a tol Yuda ma naa ge kun sarya ma ne naa ga̰l ge Israyela ne ma ya se pet, a dol temel mbo tol naa ge temeya ma ne daŋgay zi ya. 22Swaga ge naa ge koy zok wak ma ne mbo ya, a ɓol nama daŋgay zi to. A gwan mbo wan nama fare pe go: 23«I ɓo zok daŋgay wak dibiya ɓeret, naa ge koy zok wak ma ne zok wak go mḛya. Swaga ge i ne hage zok wak se, i be ɓol ndu a̰me zok zi to.» 24Swaga ge naa ge koy zok ge mbegeya wak ma ga̰l ma ne, ne naa ge ke tuwaleya ma ga̰l ma ne za̰ fare mbe go, a ke ajab ne naa ge temeya ma fare pe, a ka ele ta go, fare mbe pe wanna gyana de. 25Ndu a̰me mbo ya jan nama go: «Ndi, naa ge aŋ ne ka̰ nama daŋgay zi mbe ma, a mḛ ya zok ge mbegeya zi ya hate naa.» 26Naa ge koy zok wak ma ga̰l ma ne na naa ma mbo gene nama ya, amma a be ke nama da ne pool to, ago a ka sya ɓase ma vo, nama ma̰ hat mbal bama ne njal. 27Swaga ge a ne mbo ne nama ya, a gene nama Yuda ma naa ga̰l ge kun sarya ma ndwara se ya. Kep tuwaleya ele nama go: 28«I tele aŋ go aŋ gwan hate naa dḭl mbe no to bat. Ndi, aŋ wi suwal Ursalima ya ne aŋ hateya mbe, aŋ ɓyare e siya ge ndu mbe ne fare i pal ɗaa#Mat 27:25.!» 29Bitrus ma ne naa ge temeya ma ge may ma a jan nama go: «A golgo ndu gwan ne pala Dok pe se ge gwan ne na pala naa dasana ma pe se. 30Dok ge nee bá ma ne ta̰ Jeso ge aŋ ne hṵ na, pella uwara kaŋgre pala digi. 31Dok hé na digi, e na na tok matoson pal no dimma ne gan go, ko ne bage máya go, ne da pe na ho̰ Israyela viya̰ ge haseya, ne poreya ge na sone ma ne pe. 32I sayda ge kaŋ mbe ma ne, poseya ne O̰yom ge mbegeya ge Dok ne ho̰ naa ge a ne gwan ne bama pala na pe se ma.»

33Swaga ge a ne za̰ fare mbe, a ɗage juliliya, a ɓyare go bama hun nama uzi. 34Amma Farisi a̰me ge a ne tol na Gamaliyel, na sḛ ndu ge ne kwa eya ma tyatyat ne, naa pet a hon na hormo, ɗage digi Yuda ma naa ge kun sarya ma buwal zi, hon wak go a gwa̰ ne nama zum ya swak gale. 35Jan nama go: «Israyela ma, dwa me kwaɗa ne kaŋ ge aŋ ne ɓyare ke ne naa mbe ma no. 36Dḛ zaŋgal Tedas ɗage ne fare digi, ŋgay tene go na mbya mbyat, abe naa na pe go mbo kaŋ ge kikis anda go. Na sḛ su uzi, naa ge ne ka na pe go ma pet a ɓarse se no, ndu a̰me ɗu be gwan gá ne nama buwal zi to. 37Na go̰r go, Yuda, ndu ge suwal Galile ne mwale naa na pe go ge dam ma ge a ne ka isi naa zi, na sḛ a hṵ na uzi, naa ge a ne mwale na pe go ma a ɓarse nama se no me. 38Se no, mbi jan aŋ, da̰a̰me me ta ne naa mbe ma pe to, ya̰ me nama mborra. Kadɗa dwatɗa ge nama ne, ko kaŋ kerra ge nama ne mbe no da ne naa dasana ma ta ɗe, mbo burmi uzi, 39amma kadɗa na da ne Dok ta ya ɗe, aŋ ne pool ge burmi na to bat. Ke me haŋgal, naa kaage aŋ gá mbal pore ne Dok to.» A vin na fare mbe. 40A tol naa ge temeya ma ya, a fol nama, a tele nama go nama gwan jan fare ne dḭl ge Jeso ne to, a kan nama digi. 41A wat ne Yuda ma naa ge kun sarya ma ta zi ya zum, ne laar saal ne Dok ne ɓo bama mbyatɗa go bama za̰ yál ne dḭl ge Jeso ne pe. 42Dam ne dam a ka dwage hate naa, ne oy fare ge kwaɗa ge Jeso-Kris ne zok ge mbegeya zi, ne yàl ma diŋ me.

Currently Selected:

Temel kerra ma 5: FGN2013

Highlight

Copy