Saggaria 1

1Takᴋit 8ingane, Dariusib jâringita aippangane, Nâlekab oᴋausinga tikipok Saggariamut, Iddub erningata Berekiab erninganut, nalautaijomut, oᴋarlune:

2Nâlekab angijomik atâtagilauktase nâmaksingijutigilaukpait.

3Taimaimat oᴋautikit: Imâk oᴋarpok Nâlegak Zebaot: Uteritse uvamnut, oᴋarpok Nâlegak Zebaot, uvangalo uteromagivunga ilipsingnut, oᴋarpok Nâlegak Zebaot.

4Atâtapsetut îniarase, tâpkonunga nalautaijut sivorlit ᴋaigarsulaukput, oᴋarlutik: Imâk oᴋarpok Nâlegak Zebaot: Uteritse mâna apᴋotigijapsingnit idluitunit, piniarnipsingnillo idluitunit; tâpkoale tusângilat, nâlalungilallo uvamnik, oᴋarpok Nâlegak.

5Atâtase tâpkoa naneᴋât? Nalautaijullo inôtsainarᴋât?

6Oᴋausimale kajusijutigijamalo, perᴋolauktama kivgamnut nalautaijunut, atâtase angulaungilagît? Tâpkoalo sâput oᴋarlutiglo: Sorlo Nâlegak kajusilaurame ᴋanok piniarvigijomavluta apᴋutigijavut piniarnerijavullo maliklugit, taimak piniarvigivâtigut.

7Takᴋit 11ingata, Sebatemik taijab, uvlungita 24ingane, Dariusib jâringita aippangane, Nâlekab oᴋausinga tikipok Saggariamut, Iddub erningata Berekiab erninganut, nalautaijomut, oᴋarlune:

8Unnuarme takotitjutikut takovunga, ahâglo, angut ikimajok horsemut aupaluktamut, tâmnalo nangerpok ukpigait tipitsiariktut taggalinermêtut akorngane; tâpsomalo tunuane horseᴋarpok aupaluktanik, milaktaniglo, ᴋaᴋortaniglo.

9Oᴋarpunga tagva: Nâlegara, ukkoa suvât? Engeliblo oᴋaᴋatigijima oᴋautivânga, Unertutjivigijomavagit ukkoa sungmangâta.

10Angullo ukpigait tipitsiariktut akorngane kiovlune oᴋarpok: Makoangovut Nâlekab tilijangit arvertarᴋovlugit utitaᴋattarlutik nunakut.

11Tâpkoalo Nâlekab engelinga nangertok ikpigait tipitsiariktut akorngane kiovât, oᴋarlutiglo: Nuna ingerarvigilaukpavut utitarluta, ahâglo, nuna ilûnane nipungavok erᴋasungilarlo.

12Tagva Nâlekab engelinga kiovok oᴋarlunelo: Nâlegak Zebaot, ᴋanok sivitutigijomik sulle nâpkigosuktaililârᴋêt Jerusalemik Jûdablo iglugasaksoanginik, ningarvigijarnik jârit ukkoa 70 nâvlugit?

13Nâlekablo engele oᴋaᴋatigijiga akivâ oᴋautsinik ajungitunik, oᴋautsinik manigornartunik.

14Taimaimat engelib oᴋaᴋatigijima oᴋautivânga: Niplialerit, oᴋarlutit, Imâk oᴋarpok Nâlegak Zebaot: Jerusalem Zionelo ilungertûtigivâka ilungertornermut angijomut.

15Inôᴋatigêksuillo nipungajut angijomik nâmaksingijutigivakka: angijôngitomik nâmaksingilaurama, tâpkoa ikajorput nangminermingnik ajortomut.

16Tamanna pivlugo imâk oᴋarpok Nâlegak: Jerusalemut utilerivunga nâpkiningnelijarlunga; igluksara tagvane igloliortaujuksauvok, oᴋarpok Nâlegak Zebaot, noᴋakserpalaullo isivitaulârpok Jerusalemut.

17Nipliasârit, oᴋarlutit, Imâk oᴋarpok Nâlegak Zebaot: Iglugasaksoaᴋotikka pikuminartut aglivalialârput sulle; Nâlekablo Zione manigoromârpâ, Jerusalemelo ama annerijomârpâ.

18Ijikkalo arlortipâka takolungalo, ahâglo, nakjuit sitamat.

19Engelelo oᴋaᴋatigijiga oᴋautivara: Ukkoa suvât? Akkivângalo: Ukkoa nakjuit siamartitsilauktut Jûdamik, Israêlemiglo, Jerusalemiglo.

20Nâlekablo unertutjivigivânga sabviortinik sitamanik.

21Oᴋarpunga tagva: Sumik sulijartorᴋât tâpkoâ? Oᴋarporlo: Ukkoa nakjuit Jûdamik siamartitsilauᴋtut, niaᴋominik makititsijoᴋarᴋonago: makkoale tikiput pagvisaromavlugit, inôᴋatigêksuit nakjungit nakatsomavlugit, makititsilauᴋtut nakjumingnik Jûdab nunanganut siamartitsomavlugo.

Currently Selected:

Saggaria 1: LIHB08

Highlight

Copy