Mattêuse 9
9
Assinginik Kristûsib tatamnartitanginik. Apostelib Mattêusib anerijaulerninganik.
1Tagva umiarmut ikivok, ama utimut ikârdlune, iglogasaksoarminullo pivlune.
2Ahâglo, tâpsomunga âtsivut tumângajomik, aumitine nelajomik. Jêsusib oᴋperningit takogamigit, tumângajok oᴋautivâ: Ernera, ᴋuviasugit, ajornitit issumagijaujungnairput.
3Ahâglo, aglangnik ilisimajut ilangit ilumikut oᴋarput: Una mitauteᴋarpok Gûdemik.
4Jêsusible issumangit ᴋaujimagamigit, oᴋarpok: Sôᴋle ômatipsingne issumaluᴋisê?
5Naliak ajornanginersauvâ, oᴋarlune: Ajornitit issumagijaujungnairput; imâglônêt: Makitit arvertarlutillô?
6Nalojungnairᴋovlusele, Inûb Erninga pitsartuneᴋarmat nuname ajortoerutjinermik, tumângajomut oᴋarpok: Makitit, aumititit pikit, angerarlutillo.
7Makidlunalo tagva iglominut angerarpok.
8Inuit tamanna takogamitsuk, tataminiarput, Gûdelo nakoridlarpât, inuit taimaitunik pitsartunernik tunitjivigilaungmagit.
9Jêsuselo tagvangat aularame, inungmik takovok, tuniorᴋaivingme iksivajomik, Mattêusemik atelingmik oᴋautivâlo: Malinga! Nikoviporlo maliklugo.
10Iglomelo nerrimârvingme iksivatilugo, ahâk, pimaklertit idluitulijullo unuktut tikiput, Jêsuselo ilinniartingillo ikterᴋatigivlugit nerrimârvingmut.
11Farisêerit tamanna takogamitsuk, ilinniartingit oᴋautivait: Sôᴋ ajoᴋertortipse pimaklertit idluitulijullo nerreᴋatigivagît?
12Jêsusib tamanna tussaramiuk oᴋautivait: Atsuilît inûlijeᴋariaᴋangilat, ᴋanimajut kissimik.
13Tamattomale tukkinga ilinniariartorsiuk: Nâpkiningneᴋ ᴋuviagivara, tunergutille pinagit. Ajortulit ᴋaiᴋojartorpakka, ablatsâmik issumaᴋarᴋovlugit, idluartut pinagit.
14Taimâk oᴋartilugo, Johannesib ilinniartingita tikipât oᴋarlutiglo: Sôk uvagut Farisêerillo nerritailivakitâ akulaitomik, ilinniartitille nerritailivangilât?
15Jêsusib oᴋautivait: Nulianiktomut tikitut ᴋanok kiksartuksauvât, uiksak illagigamitsûk? Naliutsomârporle uiksamik aᴋsârtauvingat; tagva nerritailivangniarput.
16Annorâtoᴋak illâᴋpangilât nutâmik illâksamik; nutâb aliktorniarmago nutaungitok, aliktornerlo pivallianiarpok.
17Vainalo nutâk imerᴋautinut nutaungitunut imertûtinginivât; vainib nutâb aliktorniarmagit imerᴋautit, vainalo kovituinarniarpok, imerᴋautillo asserorlugit. Vainele nutâk imerᴋautinut nutânut imertûtijaksauvok tamarmik tâva asserojuiᴋatigêkpuk.
18Taimâk oᴋautingmagit, ahâk, angajoᴋât ilangat tikipok, pâmakterlunalo sânganut oᴋarpok: Nâlegak, paniga mâna toᴋovok; aggangnulle aktoriartoruk, unûniarpok tagva.
19Jêsuselo nikovipok, maliklugolo, ilinniartine illagivlugit.
20Ahâglo, arnat ilangata jârinik 12 nik auᴋatsainartub, annorângata sinâgut aktoriartorpâ tunuanit.
21Ilumigut oᴋarame; Annorângalônêt aktorupko, pijungnainiarpunga.
22Jêsusib ᴋeviarame, takovâ, oᴋarlunalo: Paniga, ᴋuviasugit, okpernivît pijungnaitipâtit. Arnarle stundeme tâpsomane pijungnaipok.
23Jêsuselo angajoᴋâb iglunganut iterame, nipjausijartullo inuillo aulajâdlartut takogamigit,
24Oᴋautivait: Aularitse, niviarsiak una toᴋungimat, sinikporle. Ijoridlarpâllo.
25Inuille anititaungmatta, iterpok, aggangitigullo tiguvâ; niviarsiak tâva makipok.
26Tamannalo tussaumajaulerpok nuname tâpsomane ilûnâne.
27Jêsuselo tagvangat aularmat, tautungituk malikpuk tâpsominga, nipperᴋortovlutik oᴋartuk: Igvit, Davidib Erninga nâpkigitiguk!
28Iglomullo itermat, tautungituk tikipâk. Jêsusiblo oᴋautivak: Okperpitîk, taimaitomik piniarvigijungnaraptîk? Tagva oᴋautivât: Âhailâ Nâlegak.
29Ijikikullo aktorpak, oᴋautivlugiglo: Okperaptik taimaileritik!
30Tautulerpuglo. Jêsusiblo unipkârᴋongilak tamattominga, Oᴋarlunalo: Udsertuleritik, tamanna inungnut ᴋaujijauᴋonago.
31Tâpkuale unipkâriartorpuk nunamut tâpsomunga ilûnânut.
32Tâpkua aningmanik, ahâk inungmik Sâtanaselingmik oᴋarungnangitomik tâpsomunga âtsivut.
33Sâtanaselo anititaungmat, oᴋarungnangitok oᴋalerpok. Inuillo tataminialerput oᴋarlutiglo: Taimaitomik takolaungimarikpogut Israêlitine.
34Farisêerille oᴋarput: Sâtanasit anitipait Sâtanasit ataningatigut.
35Jêsuselo arvertarpok iglugasaksoatigut iglugasaktigullo ilûnaitigut, ajoᴋertuivlune katimavingine, oᴋautsillo tussarnertut nâlegauvingmik oᴋautigivlugit, inungnalo atsuiliungitut, ᴋanimajullo sunatuinait âᴋikpait.
36Inugasaksuillo takogamigit naiperᴋotigivait; perlilermatta siamangavlutiglo saugatitut mianerijeᴋangitutitut.
37Tagva ilinniartine oᴋautivait: Katersivik angijôvok, sanajuksalle ikidlarput.
38Tamanna pivlugo katitaksat inuat tuksiarvigisiuk, sanajuksanik tiliklerᴋovlugo katersivingminut.
Currently Selected:
Mattêuse 9: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
