Mattêuse 10

Apostelit tilijaulerninginik tatamnartulijartorᴋovlugit.

1Ilinniartinalo 12 it ingminut ᴋaiᴋovait, pitsartuneᴋartilaitalo anernernut maᴋojungnartunut, anititserᴋovlugit tamakkoninga; ᴋanimajuniglo sunatuinarnik atsuiliungituniglo sunatuinarnik pijungnaititserᴋovlugit.

2Apostelit 12 it atingit tamadja: Sivorlek Sîmon, Pêtrusemik taijak; nukâlo Andrêase; Jâkobuse, Zebedêusib erninga nukâlo Johannese.

3Filippuse, Bartolomêuselo; Tômase, Mattêuselo pimaklerte; Jâkobuselo Alfêusib erninga, Lebbêuselo, Taddêusemik atipsâlik;

4Sîmon Kanamiok, Jûdaselo Iskâriot, Jêsusib pititigijomârtanga.

5Tâpkoa 12 it Jêsusib tilivait, perᴋolaitalo oᴋautivait: Nalojut apᴋosininginut ainiarase, Samâriamiullo iglugasaksoanginut iterniarase!

6Aititsele sauganut tammarsimajunut, Israêlib iglunganit pijunut.

7Ajoᴋertuijartorlusele oᴋaritse: Nâlegauvik ᴋilangmêtok ᴋanitomut tikisimavok.

8ᴋanimajut âᴋidlarsigik, kaladlartut kalagungnaitisigik, toᴋungajut ômartisigik, sâtanasit anitisigik! Akkeᴋangitomik pigapsiuk, akkeᴋangitomik tunisiuk!

9Goldemiglônêt silberemiglônêt kanujamiglônêt tapserumiutaᴋartuksaungilase.

10Taᴋoaᴋauteᴋarniaraselo ingergaluse, annorâlijarniarasetauk maggûngnik, itigagutipsâlijarniaraselo, ajaupialijarniaraselo. Sanajok nerᴋiksanganik tunitjiviojariaᴋarpok.

11Iglogasaksoarnut iglugasangnullônêt iterupse, kiglisiniaritse, tagvane itervigijaujariaᴋartokarmangât, tâpsomanêtsainaritselo aularᴋârase.

12Iglomulle iterupse, iglub tamattoma inungit salutisigik.

13Tamattomalo iglub inungit taimailioraksaukpatta, ulapirsautise tâpkonunga piniarpok. Taimailioraksaungipattale, ulapirsautipse uterviginiarpâse.

14Ilangitalo illalioromangipase, oᴋausiselo tussaromanagit: anititse tagvangat iglomit iglugasaksoarnillônêt; itikapselo sanningit katerarsigik.

15Âhamarik oᴋautivapse: Sodomamiut Gomorramiullo nunâgik pitlartaunikinersaujomârpuk uvluksame erᴋartuivingme, iglugasaksoarnit ukkonangat.

16Ahâk, saukatitut tilivapse amarᴋut akornganut; tamanna pivlugo silatutsiaritse ᴋuglugiangojârtutitut, nalangainaselo taubititut.

17Inungnigle ilimasugitse; kiglisiniarvingmingnut âtsomârmase, issaᴋavluselo ilinniarvingmingne.

18Atanernullo atanersoarnullo âtsomârpâse pivlunga, taipkoa nalojullo nalojungnairutiksanginut.

19Atsomârpasele, sivôraniarase, ᴋanok sumiglônêt oᴋausiksaᴋarniarmangâpse; stundeme tâpsomane tunitjivioniarapse kigusiksapsingnik.

20Ilipsingnit oᴋanginapse, Atâtapsele Anerningata oᴋartipâse.

21ᴋatangutible ᴋatangutine toᴋomut pititsomârpâ, atâtablo ernine, ᴋitorngallo angajoᴋâtik ileratsautijomârpait, toᴋoᴋovlugillo.

22Ilûnatiglo ômigijomârpâse, attera pivlugo. Soᴋosijuitorle naggatiksamut piulijaujomârpok.

23Iglugâsaksuille ilangine unangmikpase, assinginut ᴋemâtitse. Âhamarik, oᴋautivapse: Israêlitit iglugasaksoangit ingergajarêrviginiangilase, Inûb Erninga tikerᴋârtinago.

24Ilinniartok ilinniartitsijiminit anginersaungilak, kivgarlônêt nâlekaminit anginersaunginivok.

25Ilinniartok ilinniartitsijimitun-ikune, kivgarlo nâlekamitunikune, nâmaksivok. Iglub inua Beelzebumik taigamitsuk; anginersamik iglomioᴋatingit taimâk tainajangilagît?

26Tamanna pivlugo erᴋsiginiarasigik. Sagvangitoᴋangilak sakᴋertitauniangitomik, angigutjuteᴋangilarlo ᴋaujijauniangitomik.

27Tâᴋtome uvamnit tussartase oᴋautigisigik ᴋaumajome. Issibjutaujut tussartase, oᴋautigisigik iglut ᴋângine.

28Erᴋsiginiarasigiglo timinik toᴋotsijut, tarninigle toᴋotsijungnangitut. Anginersamigle taimna erᴋsigisiuk, timiniglo tarniniglo asserortitsijungnartok ânianartovingme.

29Kutsertak maggûk kênaujârsungmik atautsemik akkeᴋarpangilâk? Ukkoa ilangallônêt nunamut katangniangilak, Atâtapse perᴋungipago.

30Niaᴋupse nujangille kititaumavut.

31Tamanna pivlugo erᴋsiniarase; kutsertavaksoarnit akkitugijaunersaungijaidlarpose.

32Tamanna pivlugo, uvamnik oᴋausilik inungnut, oᴋautigijomavara Atâtamnut ᴋilangmêtomut.

33Uvamniglo missiutilik inungnut, missiutigijomavaratauk Atâtamnut ᴋilangmêtomut.

34Ulapirsaijartorasuginiarasinga nunamut. Ulapirsaijartungilanga, saviksoarmigle pititsivunga.

35Tikinama, ernek akkerartortidlugo atâtaminut, paniglo anânaminut, ukuarlo sakiminut.

36Inûblo iglomioᴋatine ômigijigijomârpait.

37Atâtaminik anânaminiglônêt uvamnit naglingnersak, illaᴋarniangilak uvamnik. Ernerminiglo paningminiglo uvamnit naglingnersak, illaᴋarniangilak uvamnik.

38Saningajoliksaminiglo (kappiasutiksaminiglônêt) tigusijomangitok uvamniglo maligomangitok illaᴋarniangilak uvamnik.

39Inôserminik ivlersijub assiojijomârpâ, inôserminiglo assiojijub uvanga pivlunga nagvâromârpâ.

40Ilipsingnik illaliortub, illaliorivânga; uvamniglo illaliortub, tiliklertok uvamnik illaliorivâ.

41Nalautaijomik illaliortok, nalautaijôngmat, nalautaijotut akkilertaujomârpok. Idluartomiglo illaliortok, idluartôngmat, idluartotut akkilertaujomârpok.

42Ukkoarârsuillo ilanganik imertitsijok imermik niglinartomik, ermgusiârsub imanganik, ilinniartiongmat, âhamarik, oᴋautivapse, akkêngaivioniangilak.

Currently Selected:

Mattêuse 10: LIHB08

Highlight

Copy