Mattêuse 8
8
Kristûsib tatamnartulininginik. Jêsusemik malingnerub ilingajuksauninganik ᴋanok.
1ᴋakᴋamit atersârmat, inugasatsuit malikpât.
2Ahâglo, angut kalaktoᴋ tikitok, tuksiarvigivlugo oᴋarpok: Nâlegak, pijomaguvit kalagungnaititsungnaralloarparma.
3Jêsusiblo aggane issakpait, aktorlâllo, oᴋarlune: Pijomavunga, kalagungnairit. Tagvainarlo kalagungnaisârpok.
4Jêsusiblo oᴋautiva: Udjertulerit, assingnut tamattominga oᴋarniarnak; ainiarille ajoᴋertuijomullo takotilutit; tunergutiksarlo, Môsesib tunerᴋojanga tunivlugo, nalojungnairᴋovlugit kalagungnainernik.
5Jêusele Kapernaumut itermat, sorsuktuksat angajoᴋângata tikipâ, tuksiarvigivlugo,
6Oᴋarlunalo: Nâlegak, kivgara iglumne nalavok, tumângajôvlunalo ânilakteradlarpok.
7Jêsusib oᴋautivâ: Aᴋijartoromavara.
8Sorsuktuksat angajoᴋângat kiovok oᴋarlunalo: Nâlegak, nalopᴋotivunga ilingnik itertitsinermik iglumnut; oᴋarille oᴋautsemik atautsemik, tagva kivgara pijungnainiarpok.
9Uvangatauk inôvunga atanilik, kivgaᴋarlarmalo sorsuktuksanik; ilanganullo oᴋaruma: Ailerit, aivok tâva: assianullo: ᴋait, ᴋaivok tâva; kivgamnullo: Sanalauruk una, sanavâ tâva.
10Jêsusible tamanna tussaramiuk, tataminiarivâ, maliktinalo oᴋautivait: Âhamarik oᴋaupapse, taimâk angitigijomik okpernermik nagvâlaungilanga Israêlitine.
11Oᴋautivapsele: Inugasaksuit unangat pângallo tikitsomârput, Abrahalo, Isaarlo Jâkolo iksivaᴋatigijomârlugit nâlegauvingme ᴋilangmêtome.
12Nâlegauvingme ᴋitorngaujulle ajaktortaujomârput tâktokso armut ungardlerpâmut, tagvane ᴋeavaksoadlarneᴋaromârpok aglerulârneᴋaromârlunalo.
13Jêsusiblo sorsuktuksat angajoᴋângat oᴋautivâ: Ailerit, okperijarnik pilârpotit. Kivgangalo stundeme tâpsomane pijungnairpok.
14Jêsuselo Pêtrusib iglunganut pivok; sakkingalo (arnak) nalajok, ôlingnartomut ᴋanimavlune takovâ.
15Aggangitigulle tigungmago, ôlingnartub ᴋemakpâ. Makidlunalo kivgartorpait.
16Unnulermallo unuktunik Sâtanasilingnik pititsivut tâpsomunga. Anerniâluillo oᴋausênarnut anitipait, sunatuinarniglo ᴋanimasilit pijungnaitipait.
17Nalautaijub Jesaiasib oᴋausingit nalautserᴋovlugit, oᴋarmat: Sangênivut ingminut pitidlugit, ᴋanimasivullo nangmarpait.
18Jêsusiblo inugasaksuit ilumajine takogamigit, tesseᴋsûb akianut ikârᴋojivok.
19Aglangniglo ilisimajok tikipok Jêsusemut oᴋautivlugo: Ajoᴋertuijok, maligomavagit, namullônêt aiguvit.
20Jêsusib oᴋautivâ: Tegianiat siteᴋarput, tingmitjallo ᴋilaub atânêtut uvloᴋarivut; Inûble Erninga peᴋangilarlônêt niaᴋorme innangaviksanganik.
21Assiatalo, ilinniartingita ilangata, oᴋautivâ: Nâlegak, aiᴋâlaulanga, atâtaga iluveriartorlugo.
22Jêsusible oᴋautivâ: Malinga, toᴋungajullo toᴋojiatik iluveriartorlitigik.
23Umiarmut ikivok, ilinniartingitalo malikpât.
24Ahâglo, ullajujaᴋsoakalerpok tesseᴋsoarme, mallillo umiak ittibjuavlugo pivât, Jêsusele sinikpok.
25Iinniartingitalo tikipât, tupârdlugolo oᴋautivât: Nâlegak piulitigut, sutailerapta.
26Tagva oᴋautivait: Ilipse okpernikitose, sôk nangiarᴋisê? Makiporlo, anorelo imarlo inerterpak; ikubliamarilerpok tâva.
27Inuille tataminiarput, oᴋarlutiglo: Kina una angut, anoriblo imablo nâlektangak!
28Tesseᴋsûblo akianut, Gergesênerit nunanganut pivok. Tagva Sâtanasilîk maggûk, iluvernit anijuk Jêsusemik naipitsivuk; erᴋsinartoksôngmaniglo, apᴋut tamanna atordlugo sapernarpok.
29Ahâglo, nipliadlarlutiglo oᴋarpuk: Jêsuse, Gûdib erninga, suniarpitigûk? Naliuterᴋârtinago kappiasuktitsartorpitigûk?
30ᴋaningitangane kuingêngigasaksoakarpok nerrijunik.
31Tagva Satanasit tuksiarvigivât oᴋarlutiglo: Anititsomaguptigut, kuingêngigasaksoarnut tâpkununga pullarᴋotigut.
32Oᴋarporlo: Aularitse! Anigamiglo, kuingêngigasaksoarnut pullavut. Ahaglo, kuingêngigasaksuit ilûnatik pangaliklutik sivinganariktomit ingmingnik ijukkâdlarput tesseᴋsoarmut, ipivlutiglo imâne.
33(Kuingênginik) mianersijullo ᴋemâvut, iglugasaksoarnullo aivlutik, tamannalo oᴋautigijartorpât, Sâtanaselîglo iliortaunîgik.
34Ahâglo, iglugasaksoarmiut ilûnatik anivut, Jêsuse pagrearlugo. Takogamitsuglo, tuksiarvigivât, nunamingnit aularᴋovlugo.
Currently Selected:
Mattêuse 8: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
