Mattêuse 5
5
Jêsusib oᴋâlaninga ᴋakᴋame.
1Inugasaksuille takogamigit, ᴋakᴋamut majorarpok; ingimallo, ilinniartingita tikipât.
2ᴋaninalo angmardlugo ajoᴋertorpait oᴋarlunalo:
3Piloridlarput aklujut anernerme: nâlegauvik ᴋilangmêtok pigileramitsuk.
4Piloridlarput kiksartut; manigortaujomârmatta.
5Piloridlarput ᴋenuêtut; nuna pigileramitsuk.
6Piloridlarput kâktut imeruktullo idluarnermik; ilumertaujomârmatta.
7Piloridlarput nâpkiniktut; nâpkigijaujomârmatta.
8Piloridlarput ivjornaitunik ômatilit; Gûde takojomaramitsuk.
9Piloridlarput ullapirsaijut; Gûdib ᴋitornganginik taijaujomârmatta.
10Piloridlarput unangmijaudlartut idluarnek pitjutigilugo; nâlegauvik ᴋilangmêtok pigileramitsuk.
11Piloridlarpose, inuit suadlarpase uvanga pivlunga, unangmikpaselo, sunatuinarniglo oᴋarnerlugvigikpase, saglovlutik.
12Alliatitse, sivôraniaraselo, akkilertautsiaromârapse ᴋilangme. Taimâktauk nalautaijut sivorlise unangmigingmatigik.
13Nunab sioraujarivâse. Sioraujak tarriornitsungnairpat, sumût tarriornititaunajarivâ? Atoraksaujungnairpok, egitaksauvlune inungnut tulleraksauvok.
14Silaksoarmiut ᴋaumanerivâse. Iglugasiat ᴋakᴋab ᴋânganêtut takuksausuerungnangilat.
15Nenergoak ikinginivât, ᴋattaujab atânut ilivlugo, nannergoarvingmulle pivok, iglomêtut ᴋaumavait tagva.
16Taimâktauk nannergoase ᴋaumatisiuk inungnut, ajungitulinipsingnik takoᴋovlugit, Atâtase ᴋilangmêtok nakorijauᴋovlugo.
17Pêjaijartorasuginiarasinga perᴋojanik, nalautaijullônêt aglanginik. Pêjariartungilakka, nâmaksitilugille piniarpakka.
18Âhamarik oᴋautivapse: ᴋilaglo nunalo nungoᴋârtinagik, perᴋojane (aglaksimajune) mingnek, tittârsuglônêt nunguniangilak, tamakkua ilûnaita nâmakserᴋârtinagit.
19Mâna perᴋojat ukkua ilanganik mingnermik nâlengitok, inuit taimâk ajoᴋertorlugit, tâmna mingnerpaunerartaujomârpok nâlegauvingme ᴋilangmêtome. Nâlektorle taimaglo ajoᴋertuijok, tâmna angijônerartaujomârpok nâlegauvingme ᴋilangmêtome.
20Oᴋautivapsele: Idluarnise nâmanersaungipat aglangnik ilisimajut Farisêerillo idluarninginit, nâlegauvingmut ᴋilangmêtomut piniatsangilase.
21Tussalaukpose, sivorlise oᴋautjaungmatta: Inuartuksaungilatit; inuartorle erᴋartuivingmut pijaksauvok.
22Uvangale oᴋautivapse: ᴋatangutiminut nâmaksingitok (pitjuteᴋarane) idluarsaivingmut pijaksautipok ingminik; ᴋatangutiminulle oᴋartok: Koinangnadlâluᴋên? kiglisiniarᴋatigêngnut pijaksautipok ingminik; oᴋartorle: Ominauteâluᴋotse, ingminik pijaksautipok ᴋôrᴋub piunginelukoviub ikomanganut.
23Tamanna pivlugo, tunergutit ilijomagungne tunerguservingmut tagvanalo erᴋaiguvit ᴋatangutingnut passijaunernik;
24Tunergutit tunerguserviub sânganut ᴋemaklugo, ᴋatangutit saimarsariartorᴋâlauruk, kingorngagullo tunergutit tunijartoruk.
25Ilingnut akkerartortok saimarsarsârniaruk, aiparêktilutik sulle apᴋome, akkerartortingnut unertûtigijauᴋonak kiglisiniartomut, kiglisiniartomullo pititaukonak kivgaminut, egitaukonaglo parngnanairsimavingmut.
26Âhamarik, oᴋautivagit: Tagvangat anititauniangilatit, akkiliksarpît kingorlerpârârsunganik akkilêrᴋârtinak.
27Tussalaukpose, sivorlise oᴋautjaungmatta: Nuliarêngnermik asseruijuksaungilatit.
28Uvangale oᴋautivapse; Arnamik takunârtub, ikligivlugo, tâpsoma ômamine nuliarêngnermik asserueᴋatigijarêrivâ.
29Ijivît talerpiub sunaungatikpatit, pêruk egilugolo. Ajunginersauvok ilingnut, timivît ilanga asserorpat, timit ilûnât egitaukonago âniatitsivingmut.
30Aggakpit talerpikpîllônêt sinaungatikpatit, nakkakit egilugillo. Ajunginersauvok ilingnut, avativît ilangat asserorpat, timit ilûnât egitaukonago âniatitsivingmut.
31Taimâktauk oᴋarsimagivok: Nuliaminik avitsijub, tunitjivigijaksarivâ aglangnik avitsitiminik.
32Uvangale oᴋautivapse: Nuliaminik avitsijub, anguniarnek pivlugo pingipat, nuliarêngnermik asseruitipâ; avitamiglo nulianiktub nuliarêngnek asserorivâ.
33Ama tussarmijose, sivorlise oᴋautjaungmatta: Gûdib atinga okpernartitsijutiksatut taivlugo angernerluktuksaungilatit; Gûdemulle angileruvit, maligaksarivatit oᴋautsitit.
34Uvangale oᴋautivapse; Angermariktuksautsangilase, ᴋilaglônêt taiᴋassiutivlugo, Gûdib iksivautaringmago;
35Nunalônêt taiᴋassiutivlugo, itigangita ikkoggaringmatsuk; Jerusalemelônêt taiᴋassiutivlugit, Atanersûb iglogasaksoaringmagit;
36Niaᴋuittauk taiᴋassiutivlugo angermariktuksaungilatit, nujak atauserlônêt ᴋaᴋorsititsungnanginangne ᴋernersititsungnanginangnelônêt.
37Oᴋausise imailerlit: Âhailâ, âhailâ, aukak, aukak; ununersat idluitomit pivut.
38Tussalaukpose oᴋalauktomik: Ije ijemik, kigut kigumik (akkeᴋariaᴋarpok).
39Uvangale oᴋautivapse: Idluitulivigikpase, akkiviginiarasigik; ullutjakulle talerpikut erᴋsârtauguvit, igluatauk manileruk.
40Akkerartoromajoᴋarpallo ilingnut, ullit tigujomavlugo, tâmna ulliksoarniktauk peᴋarle.
41Kinamut mailemik atautsemik aipauᴋojauguvit, Maggûngnik aipariuk.
42Ilingnit sumik ᴋenujok tunitjivigiuk; allarniarnagolo attartoromajok ilingnit.
43Tussalaukpose oᴋalauktomik: Inuᴋatingnik nagliktuksauvotit, ômigijillo ômigivlugo.
44Uvangale oᴋautivapse: Akkerartortise nagligisigik; ilipsingnut oᴋauserluktut saimartisigik; ômigijise ajungituliviginiarsigik; ilipsingnik kiksartitsijut unangmiklertullo tuksiarutisigik.
45ᴋitorngaulerᴋovluse Atâtapsingnut ᴋilangmêtomut. Tâpsoma seᴋinine nuerᴋongmago ajortunullo ajungitunullo, silaloᴋojilarmelo idluartunullo idluangitunullo.
46Ilipsingnigle naglingniktut kissêta nagligigupsigik, sumik tagva akkilertauniksaᴋaromârᴋisê? Pilukait taimailiunginivât?
47ᴋatangutise kissêta ilannâtuarigupsigik sumik pijarialingmik pivisê? Pilukait taimailiunginivât?
48Tamanna pivlugo nâmaksileritse, sorlo Atâtase ᴋilangmêtok nâmamaringmat.
Currently Selected:
Mattêuse 5: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
