Mattêuse 19

Nuliarêngermik avitsinermik. Sorusiârsuit saimartauninginik. Akluinerub agviarungnarninganik.

1Jêsusib oᴋautsit ukkua nâgamigit, Galilêamit aularpok, Judêab erᴋânut pivlune, Jordanib akianut.

2Inugasaksuillo malikpât, âᴋikpaillo tagvane.

3Tagva Farisêerit tikipât, ôktorlugolo oᴋautivât. Angutib nuliane, piusit nelît pivlugit, avidlugo idluarᴋâ?

4Kiovaille oᴋautivlugillo: Atuarsilaungilasê? Inungnik pingortitsijub kiglinganit pingortipak angut atausênak, arnarlo atausênak (illagêᴋovlugik).

5Oᴋarlunalo: Tamanna pivlugo angutib atâtane anânanalo ᴋemangniarpak, nuliane ungagivlugo, tâpkoalo maggûk uvinioniarpuk atautsemik.

6Tamanna pivlugo maggôjungnairlutik, uviniovuk atautsemik. Gûdib katititâgik inub avititaksaringilak.

7Tagva oᴋautivât: Suna pivlugo Môsesib tunijerᴋovâtigût aglangnik avitsitiksanik, Arnak aviniardlugo?

8Oᴋautivait: Môsesib agvialaungilâse, nuliase avidlugit, ômatise mangaidlarmatta; kiglinganille taimailaungilak.

9Oᴋaupapsele: Nuliaminik avitsijub (angunialaungipat) assianiglo nulianiklune, nuliarêngnek asserorpâ. Avitamiglo nulianiktub nuliarêngnek asserorivâ.

10Tagva ilinniartingita oᴋautivât: Angut nuliaminut taimailikpat, nuliarêgiak idluangilak.

11Oᴋautivaille: Oᴋausek tamanna ilûnatiungitok tukkisivât, taipkoale tunitjiviojut kissimik.

12Aipaitoᴋarporle ilanginik, anânamik timinganit taimaidlutik erniangomajunik; aipaitokarivorlo ilanginik, inungnut aipaitôᴋojaujunik; aipaitokarivorlo ilanginik, pijarilutik aipaitsomajunik, Gûdib nâlegauvia pivlugo. Tikkisijungnartub tikkisiliuk una!

13Taipsomane nutakᴋanik âtsivut tapsomunga, agganginut patingmijauᴋovlugit, tuksiutjauᴋovlugillo; ilinniartingitale suadlalerpait.

14Jêsusele oᴋarpok: Nutakᴋat uvamnut pilit, inerterasigiglo, tâpkoa, Gûdib nâlegauvinga pigingmatsuk.

15Aggangminullo patingmivait tagvangallo aularpok.

16Ahâglo, inuit ilangata tikipâ oᴋarlunalo: Ajungitotit ajoᴋertuijok, sumîk ajungitomik piniartuksauvîk inôtsemik nungusuitomik pilerᴋovlungâ?

17Oᴋautivâle: Sôk ajunginerarpingâ? Ajungitoᴋangilak, Gûde kissime ajungilak. Inôtsemulle iteromaguvit, perᴋojat malingniakit!

18Tâpsoma oᴋautivâ: sunât? Jêsusible oᴋautivâ: Inuartuksaungilatit. Nuliarêngnermik asseroijuksaungilatit. Tigliktuksaungilatit. Inuᴋatitit saglotigilugit oᴋartuksaungilatit.

19Atâtangnik anânangniglo nâlektuksauvotit. Inuᴋatingniglo iliktut nagliktuksauvotit.

20Tagva inôsuktub oᴋautivâ: Tamakkoa tamaita malilaukpakka sorusionimnit; suna sulle pingipigô?

21Jêsusib oᴋautivâ: Idluartôjomaguvit, perᴋutitit tamaita niorvgotigijartokit, aklujunullo piliutigivlugit, tagva perᴋuteᴋarniarpotit ᴋilangme; ᴋailerillo malinga!

22Inôsuktub oᴋausek tamanna tussaramiuk, kiksarlune ᴋemakpâ; akluiname.

23Jêsusible ilinniartine oᴋautivait: Âhamarik oᴋaupapse, akluitok nâlegauvingmut ᴋilangmêtomut pilune sapernakasakpok.

24Ama oᴋautivapse: Ajornanginarsauvok nergjutsoak kamêle merᴋutib ijingagut pilune, akluitub iterniarninganit Gûdib nâlegauvianut.

25Ilinniartingita tamanna tussaramitsuk, angijomik kakilârutigivât, oᴋarlutiglo: Kina tagva piulijaujungnarniarᴋâ?

26Jêsusible takusarlugit oᴋautivait: Inungnut ajornarpok, Gûdemulle tamaita ajornangilat.

27Tagva Pêtrusib kiovâ oᴋautivlugolo: Ahâk, tamaita ᴋemalaukpavut, malilarpillo; sumîk akkiksaᴋalârpitâ?

28Jêsusible oᴋautivait: Âhamarik oᴋaupapse, mâna malikapsinga, ilûnatik nutaujomârpatta, Inûblo Erninga iksivajomârpat iksivautamine ânanaunersoalingme, ilipsetauk iksivajomârivose iksivautane 12 ine, erᴋartorlugillo Israêlib kinguvângit ᴋitorngarêt 12 it.

29Inub iglune ᴋemakuniuk, ᴋatangutinelônêt, atâtanelônêt, anânanelônêt, nulianelônêt, ᴋitornganelônêt, perorsêvinelônêt, attera pivlugo; 100 ertorlugit pijomârivait, kingormgujivlunalo inôtsemik nungusuitomik.

30Unuktulle sivorlît kingorliojomârput, kingorlîllo sivorliojomârput.

Currently Selected:

Mattêuse 19: LIHB08

Highlight

Copy