Mattêuse 18
18
Kristûsib ajoᴋertuininganik. Adsiujomik kivgamik kênaujanik 10,000 nik akkiliksaᴋartomik.
1Taipsomane ilinniartut Jêsusemut pivut, oᴋarlutiglo: Kina anginerovâ nâlegauvingme ᴋilangmêtomê?
2Jêsuselo nutakᴋamik ᴋaiᴋojivok ingminut, akornganullo pitipâ.
3Oᴋarlunalo: Âhamarik, oᴋautivapse: Uteromangikupse, nutakᴋatitun-ingikupse, nâlegauvingmut ᴋilangmêtomut pijomângilase.
4Ingminik tagva nutakᴋatut ôtunak miklilertok, anginerovok nâlegauvingme ᴋilangmêtome.
5Nutakᴋamik taimaitomik illaliortub atimme illaliorivânga.
6Uvamnulle okpertut ukkuararsuit ilanganik sinaungatitsijomut idluarnersauvok, serᴋalitsiviub ujaraktanganik ᴋongasingagut nivingaiviogune, ipititauvlunalo imarbingmut itinersamut.
7Kappianamêk silaksoarmiut, sinaungatitsinerit pivlugit! Sinaungatitsijoᴋatsainartuksaugalloarpok; kappianamêgle inuk taimna sinaungatitsijok.
8Aggakpîlle itikavîllo sinaungatikpatit, nakakit egidlugillo. Ilingnut ajunginersauvok, tussiaklutit, illakungorlutillônêt inôtsemut iteruvit, igluktut aggaᴋarnernit, itigaᴋarnerillônêt igluktut, ikomamullo ᴋamisuitomut egitaunernit.
9Ijivîttauk sinaungatikpatit, pêruk egidlugolo. Ilingnut ajunginersauvok, igluinarmik ijeᴋarlutit inôtsemut iteruvit, maggûngnik ijeᴋarnernit, ikomamullo ᴋamitsuitomut egitaunernit.
10Kamatsialeritse, makkoarârsuit ilangat nachoginasiuk! Oᴋaupapsele: Engelingita ᴋilangmêtut Atâtama ᴋilangmiub kênanga takotsainarpât.
11Inûb Erningata piulijartormagit tammarsimajut.
12ᴋanok issumavisê? Inuk 100 nik saugaᴋuteᴋarune, tâpkoalo ilangat tammarpat, 99 it ᴋemagajangilait ᴋakᴋanut, tammartok ᴋeneriartorlugô?
13Neniguniuglo, âhamarik, oᴋautivapse, tâmna ᴋuviasutigiluarpâ assinginit 99 nit, tammarsimangitunit.
14Taimâktauk Atâtapse ᴋilangmiub assioᴋojomanginivâ ukkuarârsuit ilangat.
15ᴋatangutivîlle idluitulivigikpatit, tagva nelipsaruk inerterlugolo kissipteolutik. Nâlekunitit ᴋatangutit âᴋigêrpok tâva.
16Tussangipatille, atautsemik maggûngniglônêt illaᴋalerit, oᴋausise okpernarᴋovlugit, maggôvlutik pinasôvluselônêt oᴋalerupse.
17Tussangipase, tamanna illagêktunut oᴋautigiuk. Illagêktullo nâlengipagit, nalojotut pimaklertotullônêt ilinganasugileruk.
18Âhamarik oᴋautivapse: Nuname ᴋelaᴋsorniartase ᴋelaᴋsorsimajomârivut ᴋilangme; ᴋelarutjârniartaselo nuname, ᴋelarutjârsimajomârivut ᴋilangme.
19Ama oᴋautivapse: Maggûk nuname illagêkunik, sumiglônêt tuksiaromavlutik, pijomajatik pilârpâk Atâtamnit ᴋilangmêtomit.
20Maggûgle pingasullônêt katimajarangata atimne, akornganêtsomavunga.
21Tagva Pêtrusib aperijartorpâ, oᴋarlunalo: Nâlegak, ᴋatangutiga idluitulijok uvamnut, ᴋapsertorlunga issumaᴋarvigijungairaksarivigô? 7 ertorlunga nâmakᴋâ?
22Jêsusib oᴋautivâ: 7 ertotuinarnernik oᴋautingilagit, 70 le 7 ertorlugit.
23Tamanna pivlugo Gûdib nâlegauvia atanertun-ipok, kiglisiniaromajotut kivgaminik.
24Kiglisinialermagillo, ilangat sakᴋerpok, akkiliksalik atanerminut kênaujanik 10,000 inik.
25Akkiksaᴋangimalle, ataningata tâmna, nuliangalo ᴋitorngangillo, perᴋutingillo tamaita pisiniutaukovait, akkilertaujomavlune.
26Tagva kivgab tâpsoma pâmakterdlune tuksiarvigivâ, Oᴋarlunalo: Atanek, ᴋenuêvigilaunga! Tamaita akkileromavakka ilingnut.
27Tagva ataniub kivgak tâma nâpkigilerpâ, aularᴋolugolo akkilêᴋojungnairivâ akkiliksanik.
28Tagva kivgak tâmna anilerpok, naipitsivlunalo kivgauᴋatime ilanganik, akkiliksaᴋarvigijiminik kênaujanik 100 inik; tiguvâ tagva, torᴋojâᴋsivlugolo oᴋautivâ: Akkiliksatit uvamnut akkilikit!
29Tagva kivgauᴋatingata pâmakterdlune tuksiarvigivâ oᴋarlunalo: ᴋenuêvigilaunga, tamaita akkileromavakka ilingnut.
30Pijomangilarle, parngnanairsimavingmulle itertitsartorpâ, akkiliksangit tamaita akkilertauᴋârtinagit.
31Kivgauᴋatingitale tamanna takogamitsuk, kiksadlalerput, tamaitalo takojatik oᴋautigijartorpait atanermingnut.
32Tagva ataningata ᴋaiᴋovâ, oᴋautivlugolo: Kivgakullôjotit, akkiliksatit uvamnut tamaita issumagijungnaipakka, tuksiarvigigamga.
33Kivgauᴋatille nâpkigijaksaringiniviûk, sorlo nâpkigilaurapkît?
34Ataningalo ᴋaningaumajâlerpok, pitilugolo âniatitsijunut, akkiliksangit tamaita akkilertauᴋârtinagit.
35Taimâktauk Atâtama ᴋilangmiub pijomârivâse, ômatipsingne ᴋatangutipse tammarningit issumagijungnainiangikupsigik.
Currently Selected:
Mattêuse 18: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
