Mattêuse 17

Kristûsib ânanausijauninganik. Issumairsimajomik pijungnaititsininganik. Aniaminik oᴋauteᴋarninganik. Kenaujanik nunaliksiutauᴋojanik tunijininganik.

1Uvlullo pingasujortut kingorngatigut Jêsusib Pêtruse, Jakôbuselo, nukâlo Johannese ingminut pitipait, majorarᴋatikumavlugit ᴋakᴋamut kingiktomut.

2Ananausijauvorlo sângane, kênangalo seᴋinertut ᴋaumatigilerpok, annorângillo ᴋaᴋorsidlarput ᴋaumaneᴋtut.

3Ahâglo, Môsesiblo Eliasiblo sakᴋervigivait, oᴋâlavlutik tâpsomunga.

4Pêtrusele Jêsusemut oᴋarpok: Tamâne-itsainarominarpok; pijomaguvit, tamâne pingasunik iglolioromavogut, ilingnut atautsemik, Mosesemullo atautsemik, Eliasemullo atautsemik.

5Sulle taimâk oᴋartilugo, ahâk nuvujab ᴋaumajub ullikpait. Ahâglo, nippe nuvujamit oᴋarpok: Tagga ernera nagliktara, ᴋuviagijara, tâmna nâleksiuk!

6Tamanna ilinniartingita tussaramitsuk, pâmakterput ᴋoaᴋsârlutiglo.

7Jêsusible tikipait, aktorlugillo oᴋautivait: Makititse, erᴋsinaselo!

8Uitaleramigle, inuksingilat, Jêsuse kissiat takovât.

9ᴋakᴋamillo atersâramik, Jêsusib inerterpait oᴋarlunalo: Takojase taimna oᴋautiginiarasiuk inungnut, Inûb Erninga toᴋungajunit makerᴋârtinago.

10Ilinniartingitale aperivât oᴋarlutiglo: Sôk aglangik ilisimajut oᴋarᴋât Eliasemik sivorliovlune tikitsomârtomîk?

11Jêsusib kiovait oᴋautivlugillo: Ilâ, Eliase sivorliojuksauvok, tamaitalo idluarsitilugit.

12Oᴋaupapsele: Eliase tikitsarêrpok; ilitaringilâllo, issumamingnulle piniarvigilaukpât. Taimâk Inûb Erninga âniatitaujomârivok tâpkonunga.

13Tâva ilinniartingita tukkisivât, Johannesemik baptiterijomik oᴋautingmagit.

14Tikingmattalo inugasaksoarnut, inuk Jêsusemut tikipok, itiganginullo pâmakterpok,

15Oᴋarlunalo: Nâlegak ernera nâpkigiuk, ilisimailingajok âniadlarlune; ikomamut imermullo ochoᴋattarame.

16Ilinniartingnullo âlaukpara, âᴋigungnangilâlle.

17Jêsusible kiovâ oᴋarlunalo: Tata ukkua okpingitut mumiksimajut kinguvângoᴋatigêt, ᴋanok sivitutigijomik najoriaᴋarpapsê? ᴋanok sivitutigijomik ᴋenuêvigijariaᴋarpapse? Kaisiuk uvamnut.

18Jêsusiblo Sâtanase inerterpâ, anivorlo tâva tâpsomangat, nukapiarlo stundeme tâpsomane pijungnairpok.

19Tagva ilinniartingita kissimiovlutik tikipât oᴋarlutiglo: Sôk uvagut anititsungnangilavût?

20Jêsusible kiovait oᴋautivlugillo: Okpinginise pivlugo. Âhamarik oᴋautivapse: mustardib karngasûtiksatangatut okperneᴋarupse, ᴋakᴋamut ômunga oᴋatuinariaᴋarpose: Tagvangat nûtit taikunga, nûniarpok tâva, ajugaᴋarniaraselo.

21Taimaitulle (Sâtanasit) aniniangilat, kissiane tuksiarnermullo nerritailinermullo.

22Galilêamele piniarveᴋartilugit, Jêsusib oᴋautivait: Inûb Erninga pititaujomârpok inuit agganginut.

23Tâpkoalo toᴋotsomârpât, uvluglo pingajuângne makitsomârpok. Kiksadlalerpullo.

24Kapernaumulle pingmatta, kênaujanik ataniub Nunaliksiutauᴋojanganik katersijut Pêtruse tikipât oᴋarlutiglo: Ajoᴋertortipse kênaujak nunaliksiutauᴋojak tunivangilaûk?

25Oᴋarpok: Aukak. Iglomullo itermat, Jêsusib ingiarpâ oᴋarlunalo: ᴋanok issumavêt, Sîmon? Kikunit atanît nunamêtut kênaujat akkitûtaukojaujut nunaliksiutauᴋojaujullônêt pivakpatigîk? ᴋitorngamingnit takorngartanillônêt?

26Tagva Pêtrusib oᴋautivâ: Takorngartanit. Jêsusib oᴋautivâ: ᴋitorngat tâva tunijijariaᴋangilat.

27Ningaijauᴋonagille uvaptingnut, tesseᴋsûb sinânut ainiarit, ᴋargjuksârniglo ningitsilutit; sivorlerlo mingeriak ᴋaᴋitat tiguguk. ᴋaningalo aitartikungne, kênaujamik nagvâlârpotit; tâmna tiguguk, tunilugolo tâpkonunga pivlunga pivlutillo.

Currently Selected:

Mattêuse 17: LIHB08

Highlight

Copy