Mattêuse 16
16
Jônasib nalunaikutanganik. Pêtrusib kigligiutijininganik, angervioninganiglo. Kristûsib âniajomârninganik. Kappiasutiksanik malingnerme Jêsusemik.
1Tagva Farisêerit Saduzêerillo tikipât; tâpkoa ôktorpât, takotitserᴋojomavlugo nalunaikutamik ᴋilangmit.
2Kiovaille oᴋautivlugit: Unnugangat oᴋarpakpose: ᴋaukpat silaᴋilârpok, ᴋilak aupallulermat.
3ᴋaujarangalle oᴋarpakpose: Akᴋunaliomidlarniarpok, ᴋilak aupallulilarmelo nuvujalermat. Ilipse takkormôrtose, ᴋilaub ᴋanoelijarianga ᴋaujimavase, sôkle naliutub tamattoma nalunaikutangit ᴋaujimanginivisigîk?
4Ukkua uivêtut assiniartut nalunaikutamik takojomavut; nalunaikutamigle assianik tunitjivioniangilat, nalautaijub Jônasib nalunaikutanganik kissianik. Tâva ᴋemakpait aularlunalo.
5Ilinniartingillo akianut ikâramik, ᴋakᴋôjanik neksangilat, puigulauramik.
6Jêsusible oᴋautivait: Nâlagitse, udjertorluselo Farisêerit Saduzêerillo ᴋakᴋôjangita pudjusautinganik.
7Tagva issumertorpât ingmingnullo oᴋarlutik: Taimâk pivâtigut, ᴋakᴋôjamik neksalaunginapta.
8Jêsusib tamanna tukisigamiuk, oᴋautivait: Okpernikitose, sôk siaklerutigivisiûk ᴋakᴋôjamik neksanginisê?
9Sulle tukkisingilasê? Erᴋaumangilase ᴋakᴋôjanik tallimanik ipkoninga, 5,000 inût? Amârgaujat ᴋapsit tattalaukpisigîk torᴋorlugillô?
10ᴋakᴋôjaniktauk ipkoninga 7 nik? Amârgaujat ᴋapsit tattalaukpisigîk torᴋorlugillô?
11Sôkle tukkisingilasê, ᴋakᴋôjamik oᴋautinginapse, oᴋarama: Udjertoritse Farisêerit Saduzêerillo ᴋakᴋôjangita pudjusautinganîk?
12Tagva tukkisilerput, oᴋangimat, udjertoriaᴋarmatta ᴋakᴋôjat pudjusautinganik, Farisêerille Saduzêerillo ajoᴋertûtinginik.
13Jêsuselo Zesarêab, Filippusib iglugasaksoangita erᴋânut pivok, ilinniartinalo aperivait, oᴋarlunalo: Inuit ᴋanok oᴋarᴋât, Inûb Erninga kinaunasugivatsûk?
14Oᴋarput: Ilangita Johanneseonasugivâtit baptiterijok; assingita Eliaseonasugivâtit; ilangita Jeremiaseonasugivâtit, nalautaijullônêt ilangat.
15Aperivait: Ilipsele kinaunasugivisingâ?
16Tagva Sîmonib Pêtrusib kiovâ oᴋarlunalo: Kristûseovotit, Gûdib ômajub erninga.
17Jêsusiblo kiovâ oᴋautivlugolo: Pilorikpotit, Sîmon, Jônasib erninga; uvingub aublônêt mattominga nalojungnaitingilâtit, Atâtamale ᴋilangmêtub.
18Oᴋaupagillotauk: Pêtruseovotit, ᴋairtomullo mattomunga illagêktoᴋotikka tungatitsomavakka, taᴋtoksûblo pitsartuningata sâlaginiangilait.
19Tunitjivigijomavagittauk nâlegauviub ᴋilangmêtub pêrutânik. Nuname ᴋelaksorniartatit ilûnatik, ᴋelaksorimajomârivut ᴋilangme; ᴋelarutjârniartatillo nuname ilûnatik, ᴋelarutjârsimajomârivut ᴋilangme.
20Tagva ilinniartine inerterpait, oᴋarᴋonagit kimullônêt Kristûseonerminik.
21Mattoma kingorngagut Jêsusib ilinniartine oᴋautivait Jerusalemut aijariaᴋarnerminik, angajoᴋânullo, ajoᴋertuijoksoarnullo, aglangnik ilisimajunullo âniatitaujariaᴋarnerminik angijomik, toᴋotaujariaᴋarnerminiglo, makitjariaᴋarnerminiglo uvluk pingajuangne.
22Pêtrusiblo ingminut pitipâ inerterlugolo oᴋautivâ: Nâlegak, anajagilerit, taimailiorvioniarnak!
23ᴋeviardlunalo Pêtruse oᴋautivâ: Tunumnut pît, Sâtanase! Sinaungasaramga; Gûdib pingit issumaginginangne, inuit pingit kissêta.
24Tagva Jêsusib ilinniartine oᴋautivait: Uvamnik maligomajoᴋarpat, issumaminik piniarane, seningajoliksaminik (kappiasûtiksaminiglônêt) nangmarle, maliklungalo!
25Inôserminik ivlersijomajub assiojijomârmago; inôserminiglo assiojijub pivlunga, nagvâromârpâ.
26Inûb suksarivaûk, silaksoak ilûnât piksarsiarigalloaruniuk, tarninga asserorpat? Ubvalo, sumîk inuk tunijijungnarᴋâ tarnime satûtiksanganîk?
27Inûb Erninga tikitsomârmat Atâtame ânanauningane Engeleᴋotine illagivlugit; tagvalo ilûnaita akkiniarvigijomârpait piniarningit maliklugit.
28Âhamarik oᴋautivapse: Nangertut ovane ilangita toᴋo ôngniangilât, Inûb Erninga nâlegaunermine aggertok takoᴋârnago.
Currently Selected:
Mattêuse 16: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
