Mattêuse 14
14
Johannesib baptiterijub niaᴋoertauninganik. 5,000 it nerrititauninganik. Imiub ᴋângagut Jêsusib pisungninganik.
1Taipsomane Herôdese, nunab illainangane atanek tussaumalerpok Jêsusemik.
2Kivganalo oᴋautivait: Tagva Johannese baptiterijok! Toᴋungajunit makisimagame, taimaitunik tatamnartulivok.
3Herôdesib Johannese tigulaungmago, ᴋelaksorlugolo, itertilugolo parngnanairsimavingmut, Herôdiase, nukame Filippusib nulianga pivlugo.
4Johannesib oᴋautilaungmago: Idluangilak nuliarigangne.
5Toᴋotsomagalloarpâlo, inuille erᴋsigivait, nalautaijônasugingmatsuk.
6Herôdese inûlervingminik uvloᴋsormat, Herôdiasib paninga oᴋigêserpok tâpkoa sângane. Tamanna Herôdesib ᴋuviagivâ.
7Tamanna pivlugo oᴋautimariklugo oᴋarpok, tunitjivigijomavlugo pijomajanganik.
8Anânaminulle ajoᴋertortaulaukârdlune oᴋarpok: ᴋaitsilerit uvamnut Johannesib baptiterijub niaᴋoanik, pôgutamut ilimajomik.
9Atanerlo kiksalerpok; oᴋamaringninele pivlugo nerreᴋatinalo pivlugit, tâpsominga tunitjivioᴋovâ.
10Johanneselo parngnanairsimavingmêtok niaᴋoêrtaujartorᴋovâ.
11Niaᴋoalo pôgutamut ilimajoᴋ ᴋaitaulerpok, tunijaularmelo niviarsiamut; tâpsomalo âpâ anânaminut.
12Tagva ilinniartingit tikiput, timingalo tiguvât, iluveriartorlugo; tamannalo oᴋautigijartorpât Jêsusemut.
13Jêsusib tamanna tussaramiuk, aularpok tagvangat umiakut inuᴋangitomut, inutôjomavlune. Inuille tamanna tussaramitsuk, ᴋutterordlutik malikpât iglugasaksoarnit.
14Jêsuselo niugame, inugasaksuillo takogamigit, ilapsugidlarpait, ᴋanimajiangillo âᴋikpait.
15Uvluklilermalle, ilinniartingita tikipât, oᴋautivlugolo: Tamâne sunataᴋangimat, uvluklilermallo; inuit makkoa aularlit, niuvervingnut nerᴋiksarsiniariartorᴋovlugit nangminek.
16Jêsusible oᴋautivait: Aijariaᴋangilat; ilipse nerᴋiksanginik tunitjivigisigik.
17Kiovât: ᴋakᴋôjaᴋarpogut tallimainarnik, mingeriângniglo maggûngik.
18Oᴋautivaillo: Kaisigik uvamnut.
19Iviksukkanullo inuit ikterᴋovait, ᴋakᴋôjallo taipkoa tallimat mingeriâglo maggûk tiguvait, ᴋilangmullo ârlorpok ᴋujalivlune, ᴋakᴋôjallo avgorpait, ilinniartiminullo tunivlugit; ilinniartingitalo inungnut tunivait.
20Ilûnatiglo nerrivut, kâgungnairlutiglo, amiakullo katersorpait, amârgaujat 12 it tattalugit.
21Nerrilauktulle angutainait 5,000 iovut, arnallo sorutsillo kitinagit.
22Jêsusiblo ilinniartine erinesâlerdlugit umiarmut ikiorᴋaᴋolerpait, sivorlerijomagamigit akianut, inuit aularterᴋârnagit.
23Inuillo aulartinamigit, inutôvlune ᴋakᴋamut majorarpok, tuksiariartor une. Unnulermallo, tagvane kissimeovok.
24Umiarlo tesseᴋsûb ᴋerᴋanêlerêput, malliksoarnullo nangialerdlutik, anore aggormatsuk.
25Pigârvingitale sitamangane Jêsusib tikilerpait imab ᴋangagut pisuklune.
26Imablo ᴋângagut pisuktok ilinniartingita takogamitsuk, kakkilâdlarput oᴋarlutiglo: Ijoro-una! erᴋsinermullo niplialerput.
27Tuavidlunele Jêsusib oᴋarvigivait niplerlunalo: Maksualeritse, uvangauvunga, erᴋsinase.
28Pêtrusible kiovâ oᴋarlunalo: Nâlegak, igvioguvit, ᴋaiᴋolunga ilingnut imab ᴋângagut.
29Oᴋarporlo: ᴋailerit! Pêtruselo umiarmit niovok, imâgullo pisuklune, Jêsuse tikitsomavlugo.
30Aᴋᴋunaᴋsoarle takogamiuk, ᴋoaᴋsârpok kivililarmelo niplialerpok, oᴋarlunalo: Nâlegak ikajunga!
31Jêsusible tuavidlune aggane issakpait, tigulâlo oᴋautivâ: Okpernikitotit, sôk inertuivêt?
32Umiarmullo ikingmanik, ᴋassûmivok tâva.
33Umiarmêtulle pâmaktervigijartorpât, oᴋarlutiglo: Âhamarik, Gûdib ernerivâtit.
34Ikâramiglo, Genêzaretemiut nunanganut pivut.
35Nunablo tâpsoma inungita ilitarigamitsuk; nunamut ilûnânut tiliklerput; ᴋanimajullo sunatuinait âpait tâpsomunga.
36Tuksiarvigivlugolo, annorângata sinâ aktortaukovlugo taipkonunga. Ilûnatiglo, tâpsominga aktuijut, pijungnailerput.
Currently Selected:
Mattêuse 14: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
