Mattêuse 13
13
Adsiujunik sunatuinarnik Gudib nâlegauvia pivlugo.
1Uvlorme tâpsomane Jêsuse iglomit anigame, tesseksûb kiglinganut ingitjartorpok.
2Inugasaksuillo nelipsarmatsuk, umiarmut ikivok ingilarmelo, inugasaksuit ilûnatik tessesûb kiglinganêtilugit.
3Sunatuinarniglo oᴋarvigivait adsiujutigut, oᴋarlunalo: Ahâk, karngasuijok karngasuijartorpok.
4Karngasuitilugolo, ilangit apᴋosinermut katakput, tingmitjallo pukkumalukpait.
5Ilangillo ᴋairtomut ivjokitomut katakput; perortersârpullo, ivjokinamik.
6Seᴋinerle nuingmat, kunorlersârput, amâᴋanginamiglo pannilerput.
7Ilangit katakput ukpigait kakilautilit akornganut; ukpigaillo kakilautilit, peroramik, toᴋopait.
8Ilangillo katakput nunamut ivjoriktomut, perorsiaksaᴋalerpullo sulugainermingne: ilangit 100 nik, ilangit 60 nik, ilangit 30 nik.
9Tussâjungnik siutelik tussarle.
10Ilinniartingitalo tikipât oᴋarlutiglo: Sôk adsiujutigut oᴋarvigivigît?
11Kiovait oᴋautivlugillo: Ilipse Gûdib nâlegauvingata nalonarninganik ᴋaujititauvose; taipkoale tamattominga tunitjiviongilat.
12Peᴋartok tunitjivioniarpok peᴋaluarᴋovlugo; peᴋangitorle aᴋsârtauniarpok pinganik.
13Tamanna pivlugo adsiujutigut oᴋarvigivakka. Ijinut uitajanut tautungimatta, siutinullo angmajunut tussangimata; tukkisinatiglo.
14Taipkonungalo Jesaiasib nalautainingit nalautsimalerput, imaitut: Siutipsingnut tussaromârpase, tukkisinagolo; ijipsingnullo takojomârpase ilitarinagolo.
15Inuit ukkua ômatingit mangaidlarmata, siutimingnullo tussânerludlarput sikungilarmiglo; ijimingnut takoᴋonagit, siutimingnullo tussarᴋonagit sâgiarᴋonagillo ikajortauvlutik uvamnut.
16Piloridlarpulle ijise, tautukamik, siutiselo, tussâgamik.
17Âhamarik, oᴋaupapse: Nalautaijut idluartullo unuktut takojase takojomadlalaukpât, takolaungnagolo; tussâjaselo tussaromadlalaukpât, tussalaungnagolo.
18Mâna adsiujok tussarsiuk karngasuijomik:
19Tussartokarpat oᴋautsinik nâlegauvingmik, tukkisinagillo, tagva Sâtanasib oᴋautsit pêjariartorpait ômatânut karngautigimajut; tâmnauvok, apᴋosiniub senianut karngautigimajok.
20Karngautigimajok ᴋairtomut ivjokitomut, tâmnauvok, oᴋautsinik tussartok, ᴋuviasuklunalo tamakkoninga illaliorsârtok.
21Amâᴋanginamele ilumine, nakimarnivok; kappianartokalerangat unangmiklertokalerangallônêt oᴋausek pivlugo sinaungasarailerpok.
22Ukpigaille kakilautilit akornganut karngautigimajok, tâmnauvok, oᴋautsinik tussartok, silaksûblo mattoma pinginik siaklernerub, akluitsomanerublo uivêrinarningata oᴋautsit ipitipait, sulugainertâranalo perorsiaksatalingnik.
23Ivjoriktomulle karngautigimajok, tâmnauvok, oᴋautsinik tussartok tukkisivlunalo, sulugainertârlunalo perorsiaksatalingnik; ilangat 100 lingnik, ilangalle 60 lingnik, ilangat 30 lingnik.
24Adsiujub tâpsoma assianik oᴋarvigivait oᴋarlunalo: Gûdib nâlegauvia inuktun-ipok, perorsiaksamaringnik karngasuijotut perorsêvingminut.
25Inuille siniktilugit, akkerartorte perornerluktuksanik karngasuijartorpok perorsiaksamarît akornganut, aulalarmelo.
26Perorsiaksamarît perormatta singaileᴋalilarmiglo; perornerluktokulluittauk nuilerput.
27Kivgat tagva angajoᴋâmingnut tikiput, oᴋarlutiglo: Nâlegak, karngasuilaungilatît perorsiaksamaringnik perorsêvingnût? Nakit perornerluktuksaᴋarnerᴋâ?
28Kiovait: Akkerartortib âsit tamanna pivâ. Kivgangita oᴋautivât: Uvaptingnulle tamakkoa nusugiartorᴋovigît?
29Kiovait: Aukak, perorsiaksamarît nusuᴋassiutiniarasigik, perornerluktokulluit nusulerupsigik.
30Tammarmik perorᴋatigêkilit, katersivik naliuterᴋârtinago: katersivigle naliutilerpat, kibluijut oᴋautigomavakka: Perornerluktokulluit katerᴋârsigik, ᴋepidlugillo ikoalaklugit; perornitsiariktulle katersorsigik ᴋematulivimnut.
31Adsiujomik assianik oᴋarvigivait, oᴋarlumelo: Gûdib nâlegauvia mustardib karngasûtiksatangatut-ipok; inuk tâpsominga tigusivok ilivlugolo perorsêvingminut.
32Unârsuk mingnerovok perorsiaksanit tamainit; perorangamele anginerovok assiminit perorsianit makpatâvangnit, napârtôlerlunalo, tingmitjallo ᴋilaub atânêtut ineᴋariartorput akerungita akorngane.
33Adsiujomik assianik oᴋarvigivait: Gûdib nâlegauvia ᴋakᴋôjat pudjusautingatut-ipok; arnak tâpsominga tigusivok akkudlugolo sanaugarmut, ôktut pingasuertorlugo, pudjutipâlo ilûnât.
34Tamakkoninga tamainik Jêsus oᴋarpok inungnut adsiujutigut, adsiujulle atornagit oᴋarvigingilait.
35Nalautaijub oᴋausingit nalautsilerᴋovlugit, oᴋarmat: Adsiujunik oᴋaromavunga, silab pigiarninganit nalonalauktut unipkautigivlugit.
36Tagva Jêsusib inuit aularᴋovait, angergarlunalo. Ilinniartingitalo tikipât, oᴋarlutiglo: Adsiujomik mattominga nalojungnaititigut, perornerluktokulluit perorsêvingmêtut pivlugit.
37Kiovait oᴋautivlugillo: Perornitsiariktuksanik karngasuijok tagva Inûb Erninga.
38Perorsêvik tagva silaksoak. Perornitsiariktut tagva nâlegauvingme ᴋitorngaujut. Perornerluktut tagva ajortub ᴋitorngangit.
39Akkerartorte ukkuninga karngasuijok tagva Sâtanase. Katersivik tagva silaksûb mattoma naggatiksanga. Kibluijut tagva Engelit.
40Sorlo inuit nusujôngungmagit perornerluktut, ikomamullo ikoalaklugit, taimaitsomârivok silab mattoma naggatiksangane.
41Inûb Erningata Engeline tilijomârpait; taipkoalo sinaungajut tamaita idluitulijullo katitsomârpait.
42Kiaksaumullo ikomalingmut egitsomârpait; tagvane ᴋeavaksoadlarneᴋaromârpok aglerulârneᴋaromârlunalo.
43Idluartulle seᴋinertut ᴋaumatigijomârput Atâtamik nâ. legauviane. Tussâjungnik siutelik tussarle.
44Ama Gûdib nâlegauvia perᴋutemariktut ivlernartotut, perorsêvingme ijersimajotun-ipok. Inûb tâmna nagvâleramiuk ijerpâ; ᴋuviasungnermullo perᴋutine tamaita niorvgutigivait, perorsêviglo tâmna pisiarivlugo.
45Ama Gudib nâlegauvia niuverniartotut, ajungitunik sapangaksiortotun-ipok.
46Sapangarlo pivianartok nagvâramiuk, perᴋutine tamaita niorvgutigivait, tâmna pisiarivlugo.
47Ama Gûdib nâlegauvia nulutjatitut, imânut ningititaumajutitun-ipok, sunatuinarnik nuluartitsivaktutitut.
48Tattatarangatale, sitjamut ᴋakᴋitipait, ikterdlutiglo ajungitut katilerpait ᴋattaujamut, piungitulle egipait.
49Taimaitsomârivok silaksûb naggatiksangane. Engelit avititsartoromârpait idluitut idluartunit,
50Egidlugillo kiaksaumut ikomalingmut; tagvane ᴋeavaksoadlarneᴋaromârpok aglerulârneᴋaromârlunalo.
51Jêsusiblo aperivait: Tamakkoa tamaita tussâvisigîk? Kiovât: Ahaila, Nâlegak.
52Tagva oᴋautivait: Tamanna pivlugo aglangnik ilisimajut naliat, nâlegauvingmik ᴋilangmêtomik ilisimajoᴋ, angajoᴋâtut, perᴋuteᴋarvingminit nutâniglo nutaungituniglo sakᴋertitsijotun-ipok.
53Jêsusiblo adsiujut tamakkoa nâgamigit, tagvangat aularpok.
54Nunaminut pivlune, katimavingine ajoᴋertorpait; tataminialerpullo oᴋarlutiglo: Oma silatunine tatamnartulininalo nakit pivagît?
55Igloliortib erneringilaûk? Anânanga Marîamik atteᴋangilâᴋ? Katangutingillo Jâko, Jôseselo, Sîmonalo, Jûdaselo;
56Najangillo, ilûnatik uvaptingnêngilât? Nakit tamadja ilûnât pivaûk?
57Sinaungajutigivâllo. Jêsusible oᴋautivait: Nalautaijok nunaᴋatingita iglomioᴋatingitalo kamaginginersarivât assinginit tamainit.
58Tagvanalo unuktunik tatamnartulingilak okpinginingat pivlugo.
Currently Selected:
Mattêuse 13: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
