Mattêuse 12
12
Jêsusib sernârninganik ilinniartiminik. Aggait toᴋungajut âᴋikpait Sabbateme. Kigusingit ajoᴋertusingillo.
1Taipsomane Jêsusib perortut ᴋakᴋôjaksat apᴋotigivait Sabbateme; ilinniartingillo kâleramik, sulugainernik nusuksivut nerrivlutiglo.
2Farisêerit tamanna takogamitsuk, oᴋautivât: Ahâk ilinniartitit Sabbateme pijaksaungitomik piniarput.
3Oᴋautivaille: Atuarsilaungilasê Davidib iliorninganik, kâlerame, ilangillô?
4Gûdib iglunganut iterame, ᴋakᴋôjallo takojaksat nerrivait; nerrivlugit perᴋojaungigalloarame, ilangillônêt, ajoᴋertuijut kissimik?
5Perᴋojanelônêt atuarsilaungilasê, ajoᴋertuijut Sabbateogalloartilugo katimaviksoarme Sabbatemik sujukserᴋôrninginik, passidlaartaunatiglô?
6Oᴋaupapsele; tamânêtoᴋarpok katimaviksoarmit anginersaujomik.
7Tamannale ᴋaujimagupsiuk sunaumangât: nâpkiningnek ᴋuvigivara, tunergutit pinagit, passijaksaungitut passidlarajalaungilase.
8Inûb Erninga Sabbatemuttauk Nâlegauvok.
9Tagvangallo sivumuarame, katimavinganut iterpok.
10Ahâglo, inuᴋarpok tagvane aggalingmik iglunginik toᴋungajunik. Apersorpâllo oᴋarlutik: Sabbateotilugo inûlikleriaᴋ idluarᴋâ? Passitiksarsiorlutik tâpsomunga.
11Oᴋautivaille: Nelipse, saugatuamik piliub, itersamut katakpat Sabbateme, tigunago ᴋagvertinasuangipaûk?
12ᴋanok angitigijomik tagva inuk saukamit ivlernarnersaungilâk? Tamanna pivlugo ajungituliak Sabbateme idluingilak.
13Tagva inuk tâmna oᴋautivâ: Aggaktit issakit. Issakpaillo; âᴋiktaulerpullo iglungititut ilivlutik.
14Tagva Farisêerit anivut oᴋaᴋatigêlerdlutik ilioriaᴋarnermingnik inuaromavlugo.
15Jêsusible tamanna tukkisigamiuk, tagvangat aularpok. Inugasaksuillo malingmatsuk, ilûnaita âᴋikpait,
16Inerterpaillo, oᴋautaujomanane inungnut.
17Nalautsilerᴋovlugit nalautaijub Jesaiasib oᴋausingit, oᴋarmat:
18Ahâk, tagva kivgara, anerilauktara nagligijaralo, tâmna tarnima ᴋuviagijanga: Anernimnik ilijivigijomavara, nalojullo oᴋâlaviginiarpait idluarnermik.
19Aivajomananalo ᴋaggudlarniangilak, nippingalo tussartauniangilak apᴋosineâlungine.
20Iviksoak suvlolik naviksimajok serᴋomimaringniangilâ, mannerlo aumalik ᴋaminianginivâ, idluarnek ajugaᴋangitilerᴋârnago.
21Atingalo nalojut nerriuginiarpât.
22Tagva Sâtanaselingmik tautungitomik oᴋarungnangitomiglo tâpsomunga âtsivut; pijungnaitilugolo, tautungitok oᴋarungnangitorlo oᴋalertipâ tautulertilugolo.
23Inuillo ilûnatik tataminiarput, oᴋarlutiglo: Tâmna Davidib Erneringilaûk?
24Farisêerille, tamanna tussaramitsuk, oᴋarput: Sâtanasit anitipait, Beelzebubib, Sâtanasit ataningata, pitsartuninganut kissianut.
25Jêsusible issumangit ᴋaujimagamigit, oᴋautivait: Ataniovît nalît ingmingnut illagêgungnairtut nunguniarput; iglugasaillo iglullônêt nalît ingmingnut illagêgungnairtut, sôngojungnairput.
26Sâtanasib Sâtanaseoᴋatine anitikuniuk, ingminut akkerartorpok; ᴋanorle ataniovinga soᴋosinginajarᴋâ?
27Uvangale tagva Sâtanasit anitikupkit Beelzebubekut, kinakut ᴋitorngapse anitipatigîk? Tamanna pivlugo taipkoa erᴋartortigijomârpase.
28Sâtanasille Gûdib Anerningagut anitikupkit, Gûdib nâlegauviata tagva tikisimavâse.
29ᴋanorlônêt sangijoksûb iglinganut inuk iterajarᴋâ, perᴋutinginiglo aᴋsârdlugo; sangijoksoak ᴋelaksorᴋâruniuk kissiane, kingorngagut tâva iglungata perᴋutitangit aᴋsârnigarilugît?
30Uvamnik illaᴋaromangitub akkerartorpânga, katersoiᴋatigingitaralo siamartitsivok.
31Tamanna pivlugo oᴋaupapse: Inuit ajorningit mitauteᴋarningillo tamaita issumagijaujungnairomârput; Anernermigle ajunginermit inuit mitauteᴋarningit issumagijaujungnainiatsangilat.
32Inûblo Erninganik oᴋauteᴋaluktok issumagijaujungnainiarpok. Anernermigle ajunginermik oᴋauteᴋalûtilik issumagijaujungnainiangilak, naliutomelônêt tamattomane, naliutomelônêt pijomârtome.
33Napârtomik ajungitomik ilijigupse, ajungitunik paungaᴋarniarpok; napârtomigle piungitomik ilijigupse, piungitunik paungaᴋarniarpok. Paunganginit napârtok ilitarijauvok.
34Ilipse ᴋuglugiangojârtut ivajangit, ᴋanok ajungitunik oᴋarungnarᴋisê, piungitôgapsê? Omatib tattajutinginik ᴋanek oᴋasôngovok.
35Inuk ajungitok ajungitunik sakᴋertitsivok ômatime tattatjutinginit ajungitunit; inuglo piungitok piungitunik sakᴋertitsivok ômatime tattatjutinginit piungitunit.
36Oᴋaupapsele, uvluksak erᴋartuivik naliutikpat, inuit kiojuksaujomârmatta oᴋautsitik piungitut ilûnaita pivlugit.
37Oᴋautsitit maliklugit idluarnerartaujomârpotit, oᴋautsitillo maliklugit erᴋartortaujomârpotit.
38Tagva aglangnik ilisimajut Farisêerillo ilangit kiovut oᴋarlutiglo: Ajoᴋertuijok, nalunaikutamik takojomadlarpogut ilingnit,
39Kiovaille oᴋautivlugillo: Ukkuarâluit assiniartut nalunaikutamik takojomavut; tunitjivioniangilalle nalautaijub Jônasib nalunaikutangata assianik.
40Sorlo Jônase uvlune pingasune unnuanalo pingasune arviub nânganêlaungmat; taimâktauk Inûb Erninga uvlune pingasune unnuanalo pingasune nunab iluanêtsomârpok.
41Ninivemiut uvluksame erᴋartuivingme kinguvângoᴋatigêt ukkua illagivlugit sakᴋeromârput, erᴋartorlugillo; Jônasib oᴋâlaningit maliklugit ᴋaᴋialeramik; ahâglo, tamânêtoᴋarpok Jônasemit anginersaujomik.
42Uvluksame erᴋartuivingme kinguvângoᴋatigêt ukkua illagivlugit ataniub nulianga ângat pijok sakᴋeromârpok erᴋartorlugillo; nunamit ungasiktomêtomit pigame, Salomob silatuninga tussariartorlugo; ahâglo, tamânêtoᴋarpok Salomomit anginersaujomik.
43Anernek idluitok inungmit anigame, ingergavok sunaᴋangitokut, merngoerserviksarsiorlune, nagvâranalo.
44Oᴋarpok tagva: Iglumnut ᴋemalauktamnut uteromavunga. Tikinamiuglo pêjaiviomajok sannersimajorlo pinnarnarsimajorlo tikipâ.
45Tagva ailerpok, anernernik assiminik 7 nik, ingminit ajornersaujunik illaksarsivlune; iteramiglo tagvanêtualerput; kingorngagut inuk tâmna ajulualerpok sivorlermit. Taimâktauk kinguvângoᴋatigêt kassêtoᴋsuit ukkua itsomarivut.
46Sulle taimâk inungnut oᴋâlatilugo, ahâk anânangalo ᴋatangutingillo angutit silatânêput, oᴋaᴋatigijomavlugo.
47Tagva ilangata oᴋautivâ: Ahâk, anânat ᴋatangutitillo angutit silatânêput, oᴋaᴋatigijomavlutillo.
48Tamattomingale oᴋautjine kiovâ: Kina anânagâ? Kikkullo ᴋatangutikkâ?
49Agganalo issaklugit ilinniartiminut, oᴋarpok: Ahâk tagga anânagâ ᴋatangutikkalo.
50Atâtama ᴋilangmêtub pijomajanganik maliktok, tâmna nukarivara, najagivaralo, anânagivaralo.
Currently Selected:
Mattêuse 12: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
