Hosea 9
9
1Kuviasuklutit, Israêle, ᴋiggertarniarnak inôᴋatigêksoatitut, Gudît tunulugo assiniaravit, assiniarnerub akkiksanga ungagidlarangne senaugaksat issiptervingine tamaine.
2Senaugaksat katjugvingata paungallônêt iptêjaivingata aᴋeartortiniangilait, tâmnalo ajoᴋsalârpoᴋ vainemik nutâmik.
3Nâlekablo nunangane ineᴋartuksaungilat; Efraimele utertuksauvoᴋ Egiptenemut, nerᴋemiglo ivsornartomik nerrijuksauvut Assiriame.
4Tunergutiksanik vainemik kovisijuksaungilat Nâlekamut, tunergutingillo ôtaksat ᴋuvianarniangilat tâpsomunga: tunergutingit ilingalârput tâpkonunga sorlo ogguartut nerᴋiksanginik; ilûnatik tagvangat nerrijut ivsornartitaulârput: nerᴋiksangit nangminermingnut ilingalârput, Nâlekab iglunganut itertuksaungilat.
5Kanoᴋ ilingalârᴋisê uvlorme katimaviojome kuksasungnartome, Nâlekablo nerrimârvingata uvlunganê?
6Takoitse, ᴋemâvut asserortaunermit, Egiptenible katersoromârpait: Memfisiblo iluveromârpait: perortut ônartut pigilârpait perᴋutingit silbereojut: ukpigaillo kakilautilit tupinginêlârput.
7Uvlut nelipsaivît tikiput, uvlut akkiniarvît tikiput: Israêlib tamanna ᴋaujilârpâ: nelautaijoᴋ silaitôvoᴋ, angut anernermik pilik issumairutivoᴋ, idluitulinivît unurningit pivlujit, ômisungnerlo angijôdlarmat.
8Efraimib Gude terliarasuarpâ; nelautaijoᴋ tingmiarniartib nigangatut ipoᴋ apᴋotingine tamaine, ômisungnerlo gudingata iglunganêpoᴋ.
9Sôngojomik idluitiput nangminermingnik sorlo Gibiab uvlungine; idluituliningit tâpsoma erᴋaumalârpait, nelipsalârpaillo ajorningit.
10Israêle naipilauᴋpara sorlo vaineliksat paungangit sunaᴋajuitome; atâtase takolauᴋpakka sorlo paungatannait innerᴋârtut paungatannaᴋuteme pijariortome: tikilauᴋpulle Baal-peoremut, kangunartomullo ingmikôrtiput, ungagijingititullo maᴋojungnartigijôvut.
11Efraimib pinnarnarninga tingmiaᴋtut tingisilârpoᴋ: erniangojoᴋarniangilaᴋ, singaijoᴋarniangilaᴋ, pitatsertaujoᴋarniangilarlo.
12Kitorngatik perorsâraloarpatigiglônêt, sulle ᴋitorngairutilârpakka, inuᴋarungnaiᴋovlugo: ilâ kapianarmêk tâpkoa aularuma tâpkonangat!
13Efraim taimaipoᴋ sorlo Tirus takosimagapko, nunatsiariktome ilijauvoᴋ: taimaigaloartilugole Efraimib ᴋitorngane toᴋotsijomut anititaksarivait.
14Nâlegaᴋ, tunitjivigikit: sumik tunitjijomavêt? Tunitjivigikit igliamik singaijungnangitomik iviangîniglo imuᴋangitunik.
15Idluiningat ilûnane Gilgalemêpoᴋ; tagvane ômigivakka: piniarningita idluitoᴋsôningit pivlugit ᴋenugigomavakka iglumnit: nagligijungnairomavakka; angajoᴋâᴋsoangit ilûnatik tapatojoᴋsôvut.
16Efraim annaujauvoᴋ, amânga panerpoᴋ, paungatârungnainiarpoᴋ; ilâ, ᴋitorngigaloarpatta sulle igliangita paungangit ungagijaujut toᴋotsomavakka.
17Gudima ajaktoromârpait, nâlalaungimatta tâpsominga: saksârtôjomârput inôᴋatigêksuit akorngane.
Currently Selected:
Hosea 9: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.