ROMANOS 9

Na cua ngusubi ycui' Ndyosi ji'i̱ ngu' judío cha' caca ngu' ñati̱ ji'i̱ Ni

1Ñati̱ nu ntsu'u cha' ji'i̱ lo'o Cristo laca na', bi' cha' xcui' cha' liñi ta na' lo'o cu'ma̱; si'i cha' cuiñi nchcui' na'. Xtyi'i ycui' Ndyosi ngua'ni cha' ngua'ya cha' hique na', bi' cha' liñi tsa cha' nu ta na' lo'o ma̱ juani. 2Xñi'i̱ tsa ti' na', ti'í tsa ntsu'u tyiquee na' xqui'ya ngu' judío tya'a na'; 3tyucui tyiquee na' tyaja'a̱ na' cha' masi tyanu yabe' nu ntsu'u ji'i̱ ngu' bi' hichu̱' ycui' ca na', masi nga'aa ña'a̱ Cristo jna' tsiya' ti nti' na', si jua'a̱ ti taca cua'ni lyaá Ni ji'i̱ ngu' tya'a quichi̱ tyi na' bi'. 4Laca ngu' bi' la cui' tya'a ñati̱ ji'i̱ jyo'o cusu' Israel, ñati̱ ji'i̱ nu ya̱a̱ chalyuu nde loo la; sca ti tañi ntsu'u ji'i̱ ngu' lo'o jyo'o bi', lo'o jua'a̱ cua nda ycui' Ndyosi chacuayá' cha' caca ngu' bi' ñati̱ ji'i̱ ycui' Ni. Tlyu tsa cha' nu ngua'ni Ni, cha' ntaja'a̱ ycui' Ni tyi'i̱ Ni lo'o ngu' bi'. Cua ngüiñi cha' ji'i̱ ycui' Ndyosi lo'o ngu' bi'; cua ngulo Ni cña ji'i̱ Moisés, lcaa ña'a̱ cña nu culo yu ji'i̱ ngu' bi'; cua nda Ni cha' lo'o ngu' bi', ñi'ya̱ nu caca lo'o cua'ni tlyu ngu' ji'i̱ ycui' Ni; lo'o jua'a̱ yala la nda Ni cha' lo'o ngu' bi', ñi'ya̱ nu caca ji'i̱ Cristo nu ntsu'u cha' ca̱a̱ nde loo la. 5Sñi' jyo'o cusu' ji'na laca ngu' bi'. Nu lo'o ngula Cristo chalyuu ngua Ni ñati̱, la cui' tya'a ngu' Israel ngua yu li'. La cui' jua'a̱ laca Cristo ycui' Ndyosi nu laca loo ji'i̱ lcaa na tsiya' ti, bi' cha' lcaa tyempo ndu'ni tlyu ngu' ji'i̱ Ni. Chañi tsa cha' bi'.

6Si'i na ngujlyaa ti' ycui' Ndyosi cha' nu nguxquiñi Ni lo'o ngu' Israel tya sa'ni la, cha' nu cua'ni lyaá Ni ji'i̱ ngu'; pana nu tya'a ñati̱ ji'i̱ jyo'o Israel nu ya̱a̱ chalyuu nde loo la ni, ná lcaa ngu' bi' ndaquiya' ngu' ji'i̱ cha' nu nchcui' ycui' Ndyosi, ñi'ya̱ ndaquiya' ycui' jyo'o Israel ji'i̱ cha' bi' cua sa'ni la. 7Lo'o jua'a̱ si'i cua ña'a̱ ca ñati̱ tya'a ji'i̱ jyo'o Abraham nu chañi ca laca ngu' judío. Ná stu'ba ngua'ni jyo'o Abraham lo'o lcaa sñi' yu, cha' cua nda ycui' Ndyosi cha' lo'o yu tya tsubi' la ndi'ya̱: “Sca ti sñi' nu'u̱, nu Isaac ni, ji'i̱ bi' tucuá na' cha' ji'i̱; jua'a̱ tucuá na' cha' ji'i̱ lcaa ñati̱ nu tyu'ú ji'i̱ yu tyempo nde loo la”, nacui̱ ycui' Ndyosi ji'i̱ Abraham. 8Jua'a̱ nchca cuayá' ti' na cha' ná caca ngu' sñi' ycui' Ndyosi sca ti xqui'ya cha' tya'a ñati̱ ji'i̱ jyo'o Abraham lo'o ji'i̱ jyo'o Israel laca ngu'; sca ti si tyucui tyiquee ngu' jlya ti' ngu' cha' cua'ni Ni lcaa cña nu ngüiñi cha' ji'i̱ Ni lo'o ngu' tya sa'ni la cha' cua'ni Ni, li' chañi cha' laca ngu' ñati̱ ji'i̱ ycui' Ni. 9Nde laca cña nu cua ngüiñi cha' ji'i̱ ycui' Ndyosi lo'o jyo'o Abraham cua sa'ni li': “Chaca yija̱ tya̱a̱ na'”, nacui̱ Ni ji'i̱ Abraham. “Hasta ca li' ta na' sca sñi' nu'u̱ lo'o ma' Sara.”

10Cua nchcui' ycui' Ndyosi cha' bi' lo'o nu Isaac bi'. Clyo'o jyo'o cusu' Isaac bi' ngua naa Rebeca. Lo'o li' ngula tucua tya'a sñi' nu Rebeca bi' lo'o sca ti sti ngu'. 11-13Masi tya lyiji cala nu sube bi', tya lyiji cuna ngu' ni sca cha' tso'o, ni sca cha' cuxi, li' ndacha' ycui' Ndyosi ji'i̱ Rebeca: “Nu cala clyo ni, bi' caca msu ji'i̱ nu cuañi' la”, nacui̱ Ni. Ndi'ya̱ cha' nu nscua lo quityi lo'o nchcui' ycui' Ndyosi ji'i̱ tyucuaa nu sube bi': “Tyaca'a tsa Jacob 'na”, nacui̱ Ni, “pana nga'aa ndiya ti' na' ji'i̱ Esaú tsiya' ti”. Jua'a̱ ndyanu cha', cha' ntsu'u chacuayá' ji'i̱ ycui' Ndyosi cha' subi Ni ji'i̱ cua ña'a̱ ca ñati̱ nu nti' ycui' Ni; si'i xqui'ya cña nu ndyu'ni ti na caca na ñati̱ ji'i̱ ycui' Ndyosi lacua.

14¿Ha tso'o ñacui̱ na cha' ná liñi ndu'ni ycui' Ndyosi lacua? Ná taca chcui' na jua'a̱. 15Nde laca cha' nu nda Ni lo'o Moisés tya sa'ni la: “Cua ña'a̱ ca ñati̱ nu nti' na' cua'ni tya'na ti' na' ji'i̱, bi' laca ñati̱ nu cua'ni tya'na ti' na' ji'i̱”, nacui̱ Ni. “Tso'o nti' na' ña'a̱ na' ji'i̱ cua ña'a̱ ca ñati̱ nu ntsu'u tyiquee na' ña'a̱a̱ ji'i̱.” 16Bi' cha' laca cha' si'i na ndu'ni clyu ti' ycui' Ndyosi ji'na xqui'ya cha' nu ndiya ti ti' na ji'i̱ Ni, si'i na ndu'ni clyu ti' Ni ji'na xqui'ya cha' nguula tsa ndyu'ni na cña ji'i̱ Ni; laca cha' tya'na ti ti' Ni ña'a̱ Ni ji'na, bi' cha' ngua'ni lyaá Ni ji'na. 17Ntsu'u sca cha' nu nscua lo quityi cusu', la cui' cha' nu nda ycui' Ndyosi lo'o jyo'o rey ji'i̱ ngu' Egipto nu ngua li': “Cua nda na' chacuayá' jinu'u̱ cha' caca nu'u̱ rey”, nacui̱ Ni, “cha' caca cuayá' ti' nu'u̱ cha' nguula tsa cña nu ndu'ni na' chalyuu. Lo'o jua'a̱ caca cuayá' ti' ñati̱ tyucui ña'a̱ chalyuu tilaca laca na'”, nacui̱ Ni ji'i̱ rey bi'. 18Ca cuayá' ti' na li', cha' tya'na ti' Ni ña'a̱ Ni ji'i̱ cua ña'a̱ ca ñati̱ nu nti' Ni cua'ni tya'na ti' Ni ji'i̱; jua'a̱ ndacu̱' Ni cha' ji'i̱ cua ña'a̱ ca ñati̱ nu nti' ti Ni tacu̱' Ni cha' ji'i̱, cha' nga'aa cuna ngu' cha' ji'i̱ Ni.

19¿Ni cha' laca nsta ycui' Ndyosi qui'ya ji'i̱ ñati̱ chalyuu lacua, si jua'a̱ ná nchca ji'na tsiya' ti cua'ni na xi xa' la cha', si jua'a̱ cua laca ngusubi ycui' Ndyosi ji'i̱ ña'a̱ ñati̱ nu nti' ti Ni ji'i̱? 20Pana na nu laca na ñati̱ chalyuu ti, ná tso'o si xlyú na cha' jua'a̱ hichu̱' ycui' Ndyosi. Ñi'ya̱ laca sca quityu̱' ni, ná nchca ji'i̱ quityu̱' bi' xlyú cha' hichu̱' ñati̱ nu ngüiñá ji'i̱ lo'o yuu; ná nchca chcui' quityu̱' bi' ndi'ya̱: “¿Ni cha' laca ngüiñá nu'u̱ jna' jua'a̱?” 21Ntsu'u chacuayá' ji'i̱ cuityi yuu cha' cuiñá ma' na laca nu nti' ma' cuiñá ma' lo'o yuu ji'i̱. Taca ji'i̱ ma' cuiñá ma' sca quityu̱' tso'o nu quiña'a̱ nga'a̱, lo'o jua'a̱ taca ji'i̱ ma' cuiñá ma' sca quityu̱' nu canta' ti ña'a̱, si jua'a̱ nti' ma'; masi lo'o la cui' tya'a yuu ndya' nu tso'o bi', lo'o jua'a̱ ndya' nu canta' ti bi'.

22Ngua ti' ycui' Ndyosi culu'u Ni ji'na ñi'ya̱ ña'a̱ xcube' Ni ji'i̱ ñati̱ cuxi, cha' ca cuayá' ti' na cha' nguula tsa cña nu ndu'ni Ni. Ndalo tsa tyiquee Ni ji'i̱ ñati̱ cuxi bi', masi cua ntsu'u tsa chacuayá' ji'i̱ ycui' Ndyosi cha' ca ñasi̱' Ni ji'i̱ ngu', cha' jua'a̱ cuityi̱ Ni ji'i̱ ngu' tsiya' ti. 23Pana ngua ti' Ni cha' caca cuayá' ti' na ñi'ya̱ tlyu tsa cha' tso'o nu ndyu'ni Ni lo'o na, cha' tya'na tsa ti' Ni ña'a̱ Ni ji'na. Tya tsubi' la cua ngusubi ycui' Ndyosi ji'na, cha' lo'o na caja cha' tso'o nu ntsu'u ji'i̱ ycui' Ndyosi ji'na. 24Ñati̱ ji'i̱ ycui' Ndyosi laca na; stu'ba ti ngusubi Ni ji'na, masi laca na ngu' judío, masi laca na ngu' xa' tsu'. 25Bi' laca cha' nu nguscua jyo'o Oseas lo quityi, nu lo'o nacui̱ ycui' Ndyosi ndi'ya̱:

Cusubi na' ji'i̱ ñati̱ nu caca ñati̱ jna', masi si'i jua'a̱ ngua ngu' nquicha';

la cui' ñati̱ nu ná ntsu'u tyiquee na' ña'a̱ na' ji'i̱ nquicha',

la cui' ngu' bi' tso'o tsa caca tyiquee na' ña'a̱ na' ji'i̱ ngu' juani, nacui̱ Ni.

26Lcaa quichi̱ su nacui̱ ji'i̱ ngu' bi' tya tsubi' la: “Si'i ñati̱ ji'i̱ ycui' Ndyosi laca ma̱”,

ca bi' ñacui̱ ji'i̱ ngu' juani: “Sñi' ycui' Ndyosi nu lu'ú ca laca ma̱”.

27-28Lo'o jua'a̱ ntsu'u chaca cha' nu nchcui' jyo'o Isaías ji'i̱ ngu' Israel ndi'ya̱: “Ná ndu'ni cha' masi quiña'a̱ tsa ñati̱ tyu'ú ji'i̱ Israel nde loo la; masi ñi'ya̱ laca yusi̱ nu ndi'i̱ to' tyujo'o, tsa lo cua tya'a ñati̱ caca na. Cua nacui̱ ycui' Ndyosi nu Xu'na na cha' yala ti cuityi̱ Ni ji'na nu lo'o xcube' Ni ji'na, pana tya tyanu xi tya ñati̱ tya'a na nu cua'ni lyaá Ni ji'na.” 29La cui' jua'a̱ nchcui' Isaías chaca cha' ndi'ya̱:

Tya sa'ni la ndye cha' tsiya' ti ji'i̱ ngu' quichi̱ Sodoma lo'o ji'i̱ ngu' quichi̱ Gomorra;

la cui' jua'a̱ taca cua'ni tye ycui' nu Xu'na na ji'i̱ lcaa ngu' Israel tya'a na.

Pana cua nda Ni chacuayá' clyaá tucua sna tya'a ti ngu' tya'a na, xqui'ya cha' tya'na tsa ti' Ni ña'a̱ Ni ji'na.

Ná ntaja'a̱ ngu' judío xñi ngu' cha' tso'o nu nda Jesucristo lo'o ngu'

30Ndi'ya̱ ñacui̱ na lacua: Cua ngua tso'o cresiya ji'i̱ ngu' xa' tsu' cuentya ji'i̱ ycui' Ndyosi, xqui'ya cha' ngusñi ngu' cha' ji'i̱ Jesús, masi si'i ngu' judío laca ngu' bi'; ngua tso'o cresiya ji'i̱ ngu' bi' xqui'ya cha' jlya ti' ngu' cha' nu nchcui' ycui' Ndyosi, si'i na ngua'ni tsa ngu' cña cha' caca tso'o cresiya ji'i̱ ycui' ca ngu'. 31Pana nu ngu' nu ngutu'ú ji'i̱ jyo'o Israel ni, ná ngujui ñi'ya̱ caca tso'o cresiya ji'i̱ ngu' cuentya ji'i̱ ycui' Ndyosi; cua ndyuna ngu' cha' nu nda Ni lo'o ngu' nquicha', pana ná ndaquiya' ngu' lcaa cha' bi'. 32¿Ni cha' laca ná ngua tso'o cresiya ji'i̱ ngu' judío lacua? Laca cha' ná jlya ti' ngu' cha' taca ji'i̱ Jesús cua'ni cho'o ji'i̱ cresiya ji'i̱ ñati̱. Nti' nu ngu' judío bi' cha' caca tso'o cresiya ji'i̱ ngu' cuentya ji'i̱ ycui' Ndyosi laja lo'o ndyu'ni ti ngu' cña nu ngulo jyo'o Moisés ji'i̱ ngu'. Ngua cuxi cha' ji'i̱ ngu' li', ñi'ya̱ laca si cua nclyú ti'i̱ ngu' chu̱' sca quee nu ntsiya cla'be tyucui̱i̱ su ndya'a̱ ngu'. 33Cha' ji'i̱ quee bi' nscua sca cha' lo quityi cusu', nu nchcui' ndi'ya̱:

Sta na' sca quee nu xtyii tyucui̱i̱ su ndya'a̱ ngu' Israel, ngu' quichi̱ Sión bi', nacui̱ ycui' Ndyosi.

Jesús laca ñi'ya̱ laca quee bi', lo'o jua'a̱ ta Jesús sca cha' tyuju'u ti' ji'i̱ ngu' bi'; tyu̱u̱ tya'a ngu' bi' ca tyuju'u ti' ngu' xqui'ya Jesús bi'. Pana ná ntsu'u cha' caca taja ti' ngu' ji'i̱ Jesús, si cua ngusñi ngu' cha' ji'i̱.

Currently Selected:

ROMANOS 9: cta

Highlight

Copy