ROMANOS 8

Chalyuu cucui nu ntsu'u ji'i̱ ngu' xqui'ya Xtyi'i ycui' Ndyosi

1Pana juani ni, ndi'ya̱ ngua'ni ycui' Ndyosi: Nga'aa ndyanu yabe' hichu̱' na, si stu'ba ntsu'u cha' ji'na lo'o Jesucristo; nga'aa taca ji'i̱ nu cuxi nu ntsu'u chalyuu cojolaqui ji'na juani, cha' Xtyi'i ycui' Ndyosi laca loo ji'na lo'o ndi'i̱ na nde chalyuu. 2Nu lo'o laca Xtyi'i ycui' Ndyosi loo ji'na, li' caja chalyuu cucui ji'na xqui'ya Jesucristo, cha' stu'ba ntsu'u cha' ji'na lo'o Ni; na cua ngulo Ni ji'na ya' nu cuxi nu ndyu'ni cha' chcuna' chalyuu ji'na. 3Cua ngua'ni Ni sca cha' tlyu nu ná ngua cua'ni nu cha' cusu' nu nda jyo'o Moisés lo'o ñati̱ nu ngua sa'ni. Ná ngua cña cha' bi', xqui'ya cha' cuxi tsa tyiquee ñati̱ chalyuu na; pana ngua ji'i̱ ycui' Ndyosi cua'ni cha' tlyu bi', nu lo'o nda Ni ji'i̱ Sñi' ycui' ca Ni ya̱a̱ chalyuu re cha' ngua ñati̱. Nda Ni ji'i̱ nu Jesús bi' ya̱a̱, cha' caca yu sca msta̱ lu'ú; bi' laca msta̱ nu ngua ji'i̱ cuityi̱ qui'ya nu ntsu'u ji'na. Ngua Jesús ñati̱; stu'ba ti ngua yu ñi'ya̱ laca cua ña'a̱ ca ñati̱ chalyuu, cha' jua'a̱ ngua ji'i̱ yu cua'ni tye yu ji'i̱ qui'ya nu ntsu'u ji'i̱ ñati̱ cuxi na. Bi' cha' ngua Ni ñati̱. 4Lo'o nu juani taca cua'ni na cña nu ngulo Ni ji'na, la cui' cña laca nu nchcui' cha' cusu' bi' cha' cua'ni na; taca cua'ni na ji'i̱ juani, xqui'ya cha' nga'aa caca cojolaqui nu cuxi nu ntsu'u chalyuu ji'na, cha' Xtyi'i ycui' Ndyosi laca loo ji'na lo'o ndi'i̱ na chalyuu juani.

5Nu lo'o cua'ni na ñi'ya̱ nu ndu'ni ñati̱ chalyuu ti, la cui' cha' cuxi nu ntsu'u ji'i̱ ñati̱ bi', bi' laca loo ne' cresiya ji'na li'; pana si Xtyi'i ycui' Ndyosi laca loo ji'na lo'o ndi'i̱ na chalyuu, li' taca taquiya' na ji'i̱ lcaa cha' nu nchcui' ycui' Ndyosi. 6Chcuna' chalyuu ji'na, si xcui' cua'ni na cha' cuxi nu ntsu'u nde chalyuu ti; pana caja chalyuu cucui ji'na cha' ti̱ ti tyi'i̱ tyiquee na, si taquiya' na ji'i̱ lcaa cha' nu nchcui' ycui' Ndyosi. 7Tya'a cusu̱u̱ ycui' Ndyosi laca na, si ña'a̱ ti ndu'ni na cha' cuxi ñi'ya̱ nu ndu'ni ñati̱ chalyuu ti; ná nchca ji'na tsiya' ti taquiya' na ji'i̱ cha' nu nda ycui' Ni lo'o na, si ña'a̱ ti tya nti' na cua'ni na cha' cuxi. 8Bi' cha' ná taca ji'na cua'ni na cña nu nti' ycui' Ni cha' cua'ni na, si tiji̱' tsa ti' na ji'i̱ cha' cuxi nu ntsu'u chalyuu.

9Nga'aa si'i jua'a̱ ndi'i̱ ma̱ juani, nga'aa nchca tiji̱' ti' ma̱ ji'i̱ cha' cuxi nu ntsu'u nde chalyuu; stu'ba ntsu'u cha' ji'i̱ ma̱ lo'o ycui' Ndyosi juani, cha' cua nda ycui' Ndyosi Xtyi'i Ni cha' tyanu ne' cresiya ji'i̱ ma̱. Lo'o jua'a̱ ná ntsu'u cha' ji'na lo'o Cristo tsiya' ti, si bilya tyanu Xtyi'i ycui' Ni ne' cresiya ji'na, la cui' Xtyi'i nu ndyu'u ji'i̱ Cristo. 10Masi ngua'ni nu cuxi nu ntsu'u chalyuu cha' chcuna' chalyuu ji'i̱ ma̱, pana tya lu'ú ma̱ juani, xqui'ya cha' lu'ú Xtyi'i ycui' Ni ne' cresiya ji'i̱ ma̱ si ntsu'u cha' ji'i̱ ma̱ lo'o Cristo. Ndyanu Xtyi'i ycui' Ni lo'o ma̱ nu lo'o ngua tso'o cresiya ji'i̱ ma̱ cuentya ji'i̱ ycui' Ndyosi chacuayá' ji'i̱ Jesús. 11La cui' Xtyi'i ycui' Ndyosi laca bi', la cui' laca nu ngulo ji'i̱ jyo'o Jesús ca su ntsiya nguatsi', ndyu'ú yu chaca quiya' li'. Lo'o jua'a̱ cua nda ycui' Ndyosi Xtyi'i ycui' Ni cha' tyanu ne' cresiya ji'i̱ ma̱, cha' nu lo'o cajaa ma̱, li' cua'ni Ni cha' tyu'ú ma̱ chaca quiya' xqui'ya Xtyi'i ycui' Ni.

12Cu'ma̱ ngu' tya'a ntsu'u cha' ji'na lo'o Cristo, juani nga'aa caca ji'i̱ ñati̱ culo ngu' cña ji'na, cha' cua'ni na cha' cuxi ñi'ya̱ ndu'ni ñati̱ chalyuu ti. 13Chcuna' chalyuu ji'i̱ ma̱ si xcui' culana ma̱ ji'i̱ cha' cuxi lo'o ndi'i̱ ma̱ chalyuu; pana chacuayá' ji'i̱ Xtyi'i ycui' Ni taca tyiji̱loo ma̱ ji'i̱ cha' cuxi nu ntsu'u ji'i̱ ma̱, cha' nga'aa cua'ni la ma̱ ji'i̱. Caja chalyuu nu ná nga'a̱ cha' tye ji'i̱ ma̱ li'.

14Cua ña'a̱ ca na, cua laca na sñi' ycui' Ndyosi si ndu'ni na cua ña'a̱ ca cña nu nclyo Xtyi'i ycui' Ndyosi ji'na. 15Na cua nda ycui' Ndyosi Xtyi'i Ni ji'i̱ ma̱, cha' ndu'ni Xtyi'i Ni cha' caca ma̱ sñi' ycui' Ndyosi; ndu'ni bi' cha' ndi'ya̱ taca chcui' na lo'o ycui' Ndyosi: “Sti ya”, ñacui̱ na ji'i̱ Ni. Si'i cha' cuxi ndu'ni Xtyi'i Ni nu lo'o nclyo bi' cña ji'i̱ ma̱, si'i cha' xcutsi̱i̱ ji'i̱ ma̱ ñi'ya̱ nu ntsi̱i̱ ma̱ cua sa'ni la, si'i jua'a̱ cña ndu'ni nu bi'. 16Cha' nu ntsu'u ne' cresiya ji'na ni, stu'ba nchcui' cha' bi' lo'o cha' nu nda Xtyi'i Ni lo'o na, cha' cua laca na sñi' ycui' Ni. 17Nu lo'o cua laca na sñi' ycui' Ni, lo'o ji'na tyacua lcaa cha' tso'o nu ta Ni li', lcaa ña'a̱ cha' nu cua nda Ni ji'i̱ Cristo; pana si cua nti' na cha' stu'ba ti tyi'i̱ na lo'o Cristo ca su tlyu ca su ntucua Ni, li' ntsu'u cha' talo na lo'o ndyu'ni lya' ti' ngu' ji'na nde chalyuu ti, ñi'ya̱ ndalo ycui' Cristo lo'o ngua'ni lya' ti' ngu' ji'i̱ yu.

18Ntsu'u quiya' ndyiji xi cha' ti'í ji'na laja lo'o ndi'i̱ ti na nde chalyuu; pana xca ti cha' laca cha' bi', ná stu'ba laca cha' ti'í bi' lo'o cha' tso'o nu caja ji'na ca nde loo la, nti' na'. Lo'o jua'a̱ tya lyiji culu'u Ni lcaa cha' ji'na, ñi'ya̱ caca cha' tso'o bi' nde loo la. 19Lcaa ca na lu'ú nu cua ngüiñá ycui' Ndyosi nde chalyuu ni, ntajatya tsa na bi' ji'i̱ ycui' Ndyosi, ni jacua' culu'u Ni ji'i̱ ñati̱ chalyuu tilaca nu chañi cha' laca ngu' sñi' ycui' Ni. 20Cua ngunu'u̱ lcaa chalyuu; lcaa lo na nu ntsu'u nde chalyuu ni, ná lcaa na bi' ngua ñi'ya̱ nu ngua ti' ycui' Ndyosi cha' caca cha' bi' lo'o ngüiñá Ni ji'i̱. Cua nguxtyanu Ni chalyuu cha' tyanu jua'a̱ ti, masi si'i jua'a̱ ndiya ti' lcaa lo na nu ntsu'u chalyuu bi'. Pana ná nga'a̱ cha' tyanu cha' jua'a̱ tyucui tyempo; 21cua tyalaa ti sca tsa̱ nu tye lcaa cha' cuxi nu ndu'ni cha' quiñu'u̱ chalyuu, lcaa cha' cuxi nu laca loo ji'na. Lo'o li' tso'o tsa caca lcaa lo na nu ngüiñá Ni nde chalyuu, cha' stu'ba ti cua'ni lyaá Ni ji'i̱ nu na bi' lo'o ji'na nu laca na sñi' ycui' Ni. 22Tya lyiji caca cha' tlyu bi', pana jlo ti' na cha' ntsu'u tsa cha' ti'í, ntsu'u tsa cha' quicha ti' ji'i̱ lcaa na nu ngüiñá ycui' Ndyosi nde chalyuu. Ñi'ya̱ lo'o lijya̱ ti'í ji'i̱ sca nu cuna'a̱ cha' cua cala ti sñi', jua'a̱ ntsu'u cha' ti'í chalyuu juani. 23La cui' jua'a̱ lo'o lcaa tya'a na nu ntsu'u Xtyi'i ycui' Ndyosi ji'na, nxi'ya na ndi'i̱ na cha' ntsu'u tsa cha' ti'í ji'na juani. Na cua nda Ni Xtyi'i ycui' Ni ji'na lo'o ndi'i̱ na nde chalyuu, sca cha' tso'o nu nda Ni ji'na yala la laca. Laja li' ntajatya tsa na ji'i̱ tsa̱ tlyu bi', cha' cua'ni lyaá lyiji Ni ji'na, cha' xcutsa'a̱ Ni ji'i̱ tyucui ña'a̱ na li'. Lo'o li' ta Ni su tyi'i̱ na slo Ni, cha' cua laca na sñi' ycui' Ni. 24Jlya ti' na cha' ngua'ni lyaá Ni ji'na, masi nga'a̱ cha' jatya na ji'i̱ tsa̱ tlyu bi', cha' cua'ni tye Ni cña nu ndyu'ni Ni. Sca na nu ntajatya na ji'i̱ ni, lo'o cua na'a̱ na ji'i̱, cha' ndu'u tucua cha' bi', nga'aa nti' cha' jatya la na ji'i̱ li'; si'i na tya ntajatya na ji'i̱, na cua na'a̱ na ji'i̱ li'. 25Pana lo'o chañi cha' tya ntajatya na ji'i̱ sca cha', li' ntsu'u cha' talo na ji'i̱, masi tya lyiji ña'a̱ na ji'i̱, masi talo na tyiquee' ña'a̱ cuayá' nu ña'a̱ na ji'i̱ cha' cua ndyu'u tucua.

26Bi' cha' laca cha' nxtyucua Xtyi'i ycui' Ndyosi ji'na, cha' ná nchca ji'na tsiya' ti. Ná jlo ti' na ñi'ya̱ nu tso'o la chcui' na lo'o ycui' Ndyosi, pana Xtyi'i ycui' Ni laca nu nclu'u ji'na ñi'ya̱ nu chcui' na lo'o Ni. Cua jlo ti' Xtyi'i ycui' Ni cha' ti'i̱ tsa cha' nu ntsu'u tyiquee na, cha' ná ndyiji ñi'ya̱ caca chcui' na cha' bi' lo'o Ni; bi' cha' lo'o Xtyi'i ycui' Ndyosi nchcui' lo'o ycui' Ndyosi Sti na cuentya ji'na li'. 27Nclyotu̱ ycui' Ndyosi lcaa ca cha' nu ntsu'u ne' cresiya ji'i̱ ñati̱. Lo'o jua'a̱ jlo ti' Ni lcaa cha' nu nti' Xtyi'i ycui' Ni ta lo'o Ni, cha' nu lo'o ndijña nu bi' sca cha' ji'i̱ ycui' Ndyosi Sti na cuentya ji'na, stu'ba nti' Xtyi'i Ni lo'o lcaa cha' nu nclyacua ti' ycui' Ndyosi Sti na.

Nga'aa ntsu'u nu cuxi nu caca cua'ni cha' culaya' ycui' Ndyosi ji'i̱ ñati̱ ji'i̱ Ni

28Jlo ti' na cha' cua nda ycui' Ndyosi chacuayá' ñi'ya̱ caca lcaa cha' nu ndyaca chalyuu, cha' caca tso'o chalyuu su ndi'i̱ na si ntsu'u tyiquee na ña'a̱ na ji'i̱ Ni. Na cua ngusubi Ni ji'na juani, cha' caca na ñi'ya̱ nu ngua ti' Ni tya clyo cha' caca na. 29Masi tya lo'o nguxana chalyuu, tya li' jlo ti' ycui' Ni tilaca laca nu tyaja'a̱ xñi cha' ji'i̱ Ni nde loo la. Ngua ti' Ni cha' caca na ñi'ya̱ laca Jesús, Sñi' ycui' ca Ni, ngua ti' Ni cha' caca Jesús tya'a na; quiña'a̱ tsa tya'a sñi' ycui' Ni caca na li', pana loo la laca Jesús. 30Jua'a̱ ngua ti' Ni tya clyo la cha' caca na, bi' cha' ngusubi Ni ji'na. Nu lo'o cua ngusubi Ni ji'na, li' ngua'ni Ni cha' caca tso'o cresiya ji'na cuentya ji'i̱ Ni; nu lo'o ndye caca tso'o cresiya ji'na, li' ta Ni su tyi'i̱ na ca su tlyu ca su ntucua ycui' Ni.

31Lo'o cua ndyuna na lcaa cha' tso'o bi', li' taca ñacui̱ na cha' ná ntsu'u nu caca xu̱u̱ tya'a lo'o na, cha' ycui' Ndyosi laca nu ndi'i̱ lo'o na. 32Ná nda ycui' Ndyosi chacuayá' ji'i̱ Jesús cha' tya'a̱chu̱' yu ji'i̱ cña ji'i̱ Ni jua'a̱ ti, masi nu sca ti Sñi' ycui' Ni laca yu; nda Ni ji'i̱ yu cha' cajaa lo crusi cuentya ji'i̱ lcaa na lo'o tya'a na. Cua nda Ni lcaa cha' tso'o nu ji'i̱ ycui' ca Ni ji'i̱ Jesús, la cui' nu laca nu sca ti Sñi' ycui' Ni. Lo'o jua'a̱ sca ti cuayá' nu ta Ni cha' bi' ji'na, ñi'ya̱ lo'o nda Ni cha' bi' ji'i̱ Sñi' ycui' Ni. 33Ná tucui taca sta qui'ya ji'na lacua, cha' cua laca ngusubi ycui' Ndyosi ji'na; ycui' Ndyosi laca nu cua ngulo yabe' ji'i̱ lcaa qui'ya nu ntsu'u ji'na. 34Ná ntsu'u nu caca xcube' ji'na li', cha' xqui'ya na cua ngujuii Jesús, xqui'ya na cua ndyu'ú yu chaca quiya'. Lo'o juani ntucua Cristo la'a tsu' cui̱ ca su ntucua ycui' Ndyosi, ndijña yu cha' clyu ti' ji'i̱ ycui' Ndyosi Sti yu cuentya ji'na. 35Ni sca cha' cuxi nu ntsu'u chalyuu ná taca cua'ni cha' culaya' Cristo ji'na juani, cha' ntsu'u tsa tyiquee nu Cristo bi' ña'a̱ Ni ji'na. Ná sca caca ji'na, masi quicha tsa na, masi ti'í ti ndi'i̱ na chalyuu, masi xcube' tsa ngu' ji'na, masi ndyiji jbi'ña ji'na, masi tye ste' na ngusu̱, masi ntsu'u tsa cha' cuxi su ndi'i̱ ti na, masi cujuii ngu' ji'na; lcaa cha' bi' ná caca cua'ni cha' culaya' Cristo ji'na. 36Ndi'ya̱ nchcui' sca cha' nu nscua lo quityi ji'i̱ ycui' Ndyosi:

Xqui'ya ycui' Ndyosi, cua ña'a̱ ca hora ndyujuii ngu' ji'na.

Ndyu'ni ngu' lo'o na ñi'ya̱ si laca na xlya', la cui' xlya' nu ndya'a̱ lo'o ngu' ji'i̱ slo ñati̱ nu ndujuii ji'i̱.

37Masi jua'a̱, lye tsa ntyiji̱loo na ji'i̱ nu cuxi bi'; nga'aa nchca ji'i̱ nu cuxi bi' culo cña ji'na tsiya' ti xqui'ya Jesús, cha' ntsu'u tsa tyiquee Ni ña'a̱ Ni ji'na. 38Bi' cha' jlo ti' na' juani cha' nga'aa ntsu'u ni sca na nu caca cua'ni cha' culaya' ycui' Ndyosi ji'na, cha' ntsu'u tsa tyiquee Ni ña'a̱ Ni ji'na; masi cua ngujuii na, masi tya lu'ú na, ná culaya' Ni ji'na. Ni xca̱ ji'i̱ ycui' Ndyosi nu ntucua nde cua̱, ni sca cui'i̱ nu laca loo nde lo yuu, ná nchca ji'i̱ tsiya' ti cua'ni cha' culaya' Ni ji'na. Masi chalyuu su ndi'i̱ na juani, masi chalyuu nu caca nde loo la, ná culaya' Ni ji'na. Ná ntsu'u nu laca loo nde chalyuu nu nchca ji'i̱ culo ji'na ya' nu Xu'na na; 39ná sca na nu ntsu'u nde cua̱, ná sca na nu ntsu'u nde qui'ñi ne' yuu, ná sca na tyucui ña'a̱ chalyuu nu ngüiñá ycui' Ndyosi, ná caja ñi'ya̱ nu culo ji'na ya' Jesucristo nu Xu'na na, cha' ntsu'u tsa tyiquee Ni ña'a̱ Ni ji'na.

Currently Selected:

ROMANOS 8: cta

Highlight

Copy