ROMANOS 10

1Cu'ma̱ ngu' tya'a ntsu'u cha' ji'na lo'o Jesús, tyucui tyiquee na' lye tsa nchcui' tya'na na' lo'o ycui' Ndyosi, cha' cua'ni lyaá Ni ji'i̱ ngu' judío tya'a na'. 2Liñi tsa cha' nu chcui' na' ji'i̱ ngu' bi', cha' tso'o tsa ndu'ni tlyu ngu' ji'i̱ ycui' Ndyosi nquicha', pana ná jlo tso'o ti' ngu' ñi'ya̱ laca cña nu nti' Ni cha' cua'ni ngu'; 3ná nchca cuayá' ti' ngu' bi' ñi'ya̱ ndu'ni Ni cha' ca tso'o cresiya ji'i̱ ñati̱ cuentya ji'i̱ ycui' Ni. Xa' ña'a̱ nti' ngu' bi'; cha' ji'i̱ ycui' ca ngu' nclyana ngu' ñi'ya̱ caca tso'o cresiya ji'i̱ ngu', cha' ná ntaja'a̱ ngu' jlya ti' ngu' ji'i̱ cña nu ndyu'ni ycui' Ndyosi. 4Pana cua ñaa Jesús chalyuu juani, cua ngusñi na cha' ji'i̱ yu, bi' cha' taca ca tso'o cresiya ji'na cuentya ji'i̱ ycui' Ndyosi; nga'aa nti' cha' taquiya' tsa na cha' cusu' nu cua nda jyo'o Moisés bi', cha' si jua'a̱ taca ca tso'o cresiya ji'na.

5Ndi'ya̱ laca cha' nu nguscua jyo'o Moisés lo quityi lo'o nchcui' yu ñi'ya̱ caca tso'o cresiya ji'na, si taquiya' na lcaa cha' cusu' bi': “Tso'o ti tyi'i̱ na chalyuu, si cua'ni na lcaa ca cña nu ngulo ycui' Ndyosi ji'na”. Jua'a̱ nchcui' quityi bi'. 6Pana chaca cha' nscua lo quityi ñi'ya̱ caca ca tso'o cresiya ji'na lo'o xñi ti na cha' ji'i̱ Jesús; ndi'ya̱ nchcui' quityi bi': “Ná nga'a̱ cha' tsaa na tsaana na ji'i̱ Cristo ca su ntucua ycui' Ndyosi nde cua̱”, nacui̱ quityi, “cha' tya̱a̱ lo'o na ji'i̱ Cristo nde lo yuu. 7Ná nga'a̱ cha' tsaa na tsaana na ji'i̱ Cristo ca su ntsiya jyo'o”, nacui̱ quityi, “cha' tya̱a̱ lo'o na ji'i̱ nde lo yuu chaca quiya'.” 8Ndi'ya̱ ntsu'u cha' lo'o jlya ti' na ji'i̱ Ni: “Cacua tsa ntsu'u cha' ji'i̱ Jesús ji'na. Taca tyu'u cha' ji'i̱ Cristo nde tu'ba na, taca tyu'u cha' bi' nde ne' cresiya ji'na.” Bi' laca cha' tso'o nu ta na lo'o ngu', cha' taca cua'ni lyaá Ni ji'na ji'i̱ nu cuxi, si chañi cha' xñi na cha' ji'i̱ Jesús. 9Tsa bi' ti cha' nti', cha' cacha' na ji'i̱ ngu' cha' Jesús laca nu Xu'na na, lo'o jua'a̱ tyucui tyiquee na jlya ti' na cha' ngua'ni ycui' Ndyosi cha' ndyu'ú Jesús chaca quiya' ca su nguatsi'. Li' taca ji'i̱ Ni cua'ni lyaá Ni ji'na, 10cha' nde ne' cresiya ji'na ntsu'u cha' ji'i̱ Jesús nu cua ngusñi na, lo'o la cui' jua'a̱ nde tu'ba na ntsu'u cha' ji'i̱ Jesús nu nchcui' na lo'o ñati̱; li' taca ca tso'o cresiya ji'na cuentya ji'i̱ ycui' Ndyosi, lo'o jua'a̱ cua'ni lyaá Ni ji'na ji'i̱ lcaa cha' cuxi nu ntsu'u chalyuu.

11Cua nscua chaca cha' lo quityi ji'i̱ ycui' Ndyosi ndi'ya̱: “Ni tsaca na, tya'a ngusñi na cha' ji'i̱ ycui' Ndyosi, ná ntsu'u cha' caca taja ti' na ji'i̱ Ni li'”. Jua'a̱ nchcui' quityi. 12Sca ti cuayá' tyacua cha' bi' ji'i̱ ngu' judío, la cui' jua'a̱ tyacua cha' bi' ji'i̱ ngu' xa' tsu', cha' sca ti ycui' Ndyosi nu Xu'na na laca loo ji'i̱ lcaa ñati̱ chalyuu; sca ti cuayá' tso'o tsa ndu'ni Ni lo'o lcaa ñati̱ nu jña cha' clyu ti' ji'i̱ ycui' Ni chacuayá' ji'i̱ Jesús. 13Ndi'ya̱ ndyu'u cha' nu nscua lo quityi cusu': “Cua'ni lyaá Ni ji'i̱ lcaa ñati̱ nu jña cha' clyu ti' ji'i̱ Ni chacuayá' ji'i̱ ycui' nu Xu'na na”. 14Pana ná caca chcui' ngu' lo'o ycui' Ndyosi chacuayá' ji'i̱ Jesús si bilya xñi ngu' cha' ji'i̱ yu; jua'a̱ ná caca xñi ngu' cha' ji'i̱ Jesús si bilya cuna ngu' cha' bi'; ni ná caca cuna ngu' cha' bi' si bilya caja ñati̱ nu ta cha' bi' lo'o ngu'. 15Pana ná tucui caca ji'i̱ tsaa cha' ta cha' bi' lo'o xa' la ngu' si ná culo Ni cña ji'i̱ cha' tsaa. Ndi'ya̱ nchcui' quityi cusu': “Tso'o tsa nti' na lo'o tyalaa ngu' slo na cha' ta ngu' cha' tso'o ji'i̱ ycui' Ndyosi lo'o na, cha' culu'u ngu' ñi'ya̱ caca cha' ti̱ ti tyi'i̱ tyiquee na”. Jua'a̱ nchcui' quityi.

16Ná ndyuna tso'o lcaa ñati̱ cha' nu nda na lo'o ngu', nu lo'o ndacha' na ji'i̱ ngu' ñi'ya̱ cua'ni lyaá Ni ji'i̱ ñati̱. La cui' jua'a̱ ngua lo'o jyo'o Isaías cua sa'ni. “Ndyosi Xu'na ya, ná tucui ndu̱ tsiya' ti nu ngusñi cha' jinu'u̱ nu nchcui' ya lo'o ngu'”, nacui̱ jyo'o bi'. 17Pana nu na ni, cua ngusñi na cha' ji'i̱ Jesús nu ngua tya clyo, tya lo'o ndyuna na cha' tso'o nu cua nchcui' ngu' lo'o na cha' ji'i̱ Cristo.

18Nti' na' xcuane na' sca cha' ji'i̱ cu'ma̱: ¿Ha bilya cuna ngu' judío cha' ji'i̱ Cristo lacua? Cua ndyuna ngu', cha' cua nscua sca cha' lo quityi cusu' nu nchcui' ndi'ya̱:

Tyucui ña'a̱ chalyuu nguañi cha' nu nda ngu' lo'o;

lcaa se'i̱ ndyalaa cha' nu nchcui' ngu', masi ca su cua tyijyu' la cua ndyalaa cha' bi'.

Jua'a̱ nchcui' quityi. 19Chaca cha' xcuane na' ji'i̱ ma̱ li': ¿Ha ná nda ngu' judío cuentya ñi'ya̱ ndyu'u cha' bi' lacua? Sa'ni tsa nguscua jyo'o Moisés cha' ji'i̱ ngu' bi', ndi'ya̱ nchcui' quityi bi':

Cua'ni na' cha' caca liye' ti' ma̱ ña'a̱ ma̱ ji'i̱ xa' ñati̱ nu si'i ñati̱ tso'o laca ngu' nti' ma̱, nacui̱ Ni.

Nacui̱ ma̱ cha' ple tsa ngu'; ná nchca cuayá' ti' ngu', nti' ma̱.

Ta na' cha' ñasi̱' ti' ji'i̱ ma̱, xqui'ya cha' cua ngusñi ñati̱ bi' cha' jna'; masi cu'ma̱ ni, ná nti' ma̱ cuna ma̱ cha' jna', nacui̱ Ni.

20Lo'o jua'a̱ liñi tsa cha' nu nda jyo'o Isaías nu ngua sa'ni cuentya ji'i̱ ycui' Ndyosi:

La cui' ñati̱ nu bilya clyana ngu' cha' 'na, cua ngujui cha' jna' ji'i̱ ngu' juani, nacui̱ Ni.

Masi bilya jña ngu' sca cha' tso'o jna', cua nclyu'uloo na' ji'i̱ ngu' bi' juani.

21Pana xa' ña'a̱ nguscua jyo'o Isaías cha' ji'i̱ ngu' Israel: “Tyucui tsa̱ ngusi'yana na' ji'i̱ ngu'”, nacui̱ Ni, “pana ná ndaquiya' ngu' bi' 'na tsiya' ti; xcui' na nxu̱u̱ tya'a ti ngu' lo'o na'”. Jua'a̱ nchcui' quityi.

Currently Selected:

ROMANOS 10: cta

Highlight

Copy