Smart Guys 31
31
Wat King Lemuel Learn From His Muddah
1Had one king, his name Lemuel. Dis some tings he tell, da same heavy kine stuff his muddah teach him fo make um come good. She wen tell um:
2“My bebe, you lissening o wat?
I wen born you, cuz I wen make one strong promise to God.
3You strong, but no go wase yoa time fooling aroun wit da wahines,
Da kine wahines dat can jam up king guys.
4“No good, Lemuel, no good fo king guys wen dey go drink wine.
No good, wen da govmen leada guys go drink up da beer.
5Bumbye wen dey drink, dey foget bout da rules from long time befo,
An dey change um so da rules no good fo da peopo dat suffa plenny.
6Good, you can go give beer to da almos mahke kine peopo.
Good, you can go give wine to da kine peopo dat suffa plenny all da time an no can handle.
7Dey can suck um up,
Fo bumbye foget dat dey no mo notting,
An dey no need tink too much bout all da kine trouble dey get.
8“Go talk to da judge fo da peopo dat need help fo tell good kine wat dey gotta tell.
Fo make shua da hard luck peopo still get dea rights.
9‘Open yoa mout an judge da right way.
Make shua da peopo dat no mo notting
An da ones dat stay suffa get dea rights.’ ”
Da Bestes Kine Wife
10Da good kine wahine dat stay strong inside,
Wea you can find dat kine wife?
Her, worth way mo den plenny ruby stones.
11Da husban, he know he can trus her.
Wit her, he no need notting.
12Cuz a her, good kine tings goin happen to him all da time,
An not bad kine tings.
13She go all ova da place
Fo buy da bestes kine stuff fo make clotheses.
She buy da wool fo make yarn, an thread fo make linen.
She feel good wen she make stuff wit her hands.
14She go out, bring back food from far place,
Jalike da big kine boats dat bring stuff from all ova.
15Still yet dark, wen she get up,
She get out da food an give um to erybody inside da house.
She tell da helpa girls wat dey gotta do fo dat day.
16She make one plan bout wat fo do with some land she see,
An den she go buy um.
She use her money fo plant one grape farm.
17She make ready fo go work,
She stay strong, az why she can do eryting.
18She make shua she goin make good money
Cuz she check um out all da time.
Az why she work nite time
An no pio da light till late.
19In one hand she get da stuff fo make da thread,
She use da odda hand fo turn da stick fo twis da thread.
20She put out her hands fo show her aloha
Fo help da peopo dat no mo notting.
An fo help out da peopo dat stay suffa.
21Wen get snow, she no need worry bout nobody inside her house,
Cuz all dem get da bestes kine warm clotheses.
22She make fancy kine cova fo make da bed look nice.
She ony wear good kine linen clotheses, an purple kine jalike one queen.
23In da place wea all da importan guys hang out,
Da older leada guys fo dat whole place,
Dey know da husban
Cuz he one a dem.
24She make da fancy kine linen cloth fo sell
An belts fo da store guys fo sell.
25Wen you look at her, you can tell awready
She stay strong inside
An peopo get plenny respeck fo her.
Wen peopo tell her bad stuff goin happen bumbye,
She ony laugh, cuz she no sked.
26Wen she talk, she show dat she know wat fo do erytime.
Wen she teach, she show aloha erytime.
27She watch eryting dat stay go on inside her house,
Fo make shua eryting stay good.
She no suffa jalike da lazy kine peopo.
28Da kids go tell erybody, “Oua muddah,
She erytime do good tings!
Az why she stay good inside.”
Her husban, he tell erybody she da bestes too.
29He tell: “Get plenny wahines dat come strong inside,
But you, you mo betta den all a dem!”
30Get wahines dat talk nice to you,
But az all bulai.
Get wahines, dey good looking,
But fo ony short time.
Da kine wahine dat stay sked fo no do wat Da One In Charge tell,
Az good, erybody tell good tings bout her.
31Good you guys give her plenny good stuff
From all da hard work she do!
Good all da importan peopo from ery place, tell how awesome she stay,
Cuz dey know bout all da stuff she do!
Currently Selected:
Smart Guys 31: HPB
Highlight
Share
Copy
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
