Lucas 6

Jamakï junaqpaq Jesús poderyuq kanqan

Mateo 12.1-8; Marcos 2.23-28

1Jamakï junaqchömi murushqa trïgukuna kuchunpa discïpulunkunawan Jesús pasëkäyarqan. Tsëpa pasarmi discïpulunkuna espïgata pallarir makinkunachö qaqurir uchuyarqan. 2Fariseukunanam tsëta rikarnin kënö niyarqan: <<¿Imanirtaq jamakï junaq këkaptin leynintsikta mana cäsur trïguta pallëkäyanki?>>

3Jesúsnam nirqan: <<¿Manaku imëllapis leyiyarqunki yanapaqninkunawan mallaqar David imata rurashqantapis? 4Davidshi Teyta Diospa wayinman yëkur Diospaq churayashqan tantata mikunaq.#1Sam. 21.1-6. Tsënöllash yanapaqninkunatapis qaranaq. Tsë tantaqa manam David ni pëwan këkaq nunakuna mikuyänanpaqtsu karqan, sinöqa sacerdötikunalla mikuyänanpaqmi>>.#Lev. 24.9.

5Tsëpitanam Jesúsqa kënö nirqan: <<Nunapa Tsurinqa jamakï junaqpaqpis poderyuqmi këkan>>.

Makin tsakishqa nunata jamakï junaqchö Jesús kachakätsinqan

Mateo 12.9-14; Marcos 3.1-6

6Tsëpitanam juk jamakï junaqchö sinagögaman yëkur Jesús yachatsikurqan. Tsëchömi allawka kaq makin tsakishqa nunapis këkarqan. 7Tsëta rikarmi ley yachatsikuqkuna y fariseukuna Jesústa rikarëkäyarqan jamakï junaqchö kachakätsiptinqa tsë achäquilla contran shäriyänanpaq.

8Tsënö yarpäyanqanta musyarirninnam makin tsakishqa nunata Jesús nirqan: <<Sharkur nunakunapa chöpinman shäkuri>>.

Niptinnam tsë nuna shäkurirqan. 9Tsëpitanam nunakunata Jesús tapurqan: <<Jukta tapuyashqëki. Jamakï junaqchö ¿allitaku o mana allitaku rurashwan? Nuna mayintsikta ¿salvashwanku o <wanukutsunpis> nishwanku?>>

10Tsënam nunakunata rikärir makin tsakishqa nunata kënö nirqan: <<¡Makikita pallari!>>

Pallarkuptinmi makin kachakärirqan. 11Fariseukunanam piñakurkur Jesústa acusayänanpaq parlayarqan.

Chunka ishkaqta apostolnin kayänanpaq Jesús akranqan

Mateo 10.1-4; Marcos 3.13-19

12Tsë junaqkunanam jirkaman Jesús ewkur waraqninpi Teyta Diosman mañakurqan. 13Patsa waräriptinnam discïpulunkunata qayarqan y chunka ishkaqtam akrarqan apostolnin kayänanpaq. 14Pëkunam kayarqan Simón (pëtam Jesús shutitsirqan Pedro nishpa), Simónpa wawqin Andrés, Santiago, Juan, Felipe, Bartolomé, 15Mateo, Tomás, Alfeupa tsurin Santiago, Zelote niyanqan Simón, 16Santiagupa tsurin Judas y Judas Iscariote. Pëmi Jesústa rantikurqan.

Atskaq qeshyaqkunata Jesús kachakätsinqan

Mateo 4.23-25

17Apostolninkunawan jirkapita Jesús urämurnam pampachö tarirqan discïpulunkunawan atskaq nunakuna këkäyaqta. Tsëmanmi jinantin Judea provinciapita, Jerusalénpita y lamar kuchunchö Tiro y Sidón markakunapita atskaq nunakuna shayämushqa kayarqan. Pëkunam Jesús yachatsikushqanta wiyëta munar y qeshyaqkunata kachakätsinanta munarnin shayämushqa kayarqan. 18Tsëchömi supë jipatsishqan nunakunata Jesús kachakätsirqan. 19Puëdiq këninwan llapan qeshyaqkunata kachakätsiptinmi llapan nunakuna Jesústa yatëta munayarqan.

Kushikïkunapaq y llakikïkunapaq Jesús willapäkunqan

Mateo 5.1-12

20Tsëchönam discïpulunkunata rikëkur Jesús kënö nirqan: <<Waktsakuna, kushishqam kawayanki. Qamkunapaqmi Teyta Diospa mandakïninqa.

21<<Kushishqam kawayanki, mallaqaqkuna. Qamkunaqa manam mallaqäyankitsu.

<<Kushishqam kawayanki, waqakuqkuna. Qamkunaqa manam llakikuyankinatsu.

22<<Kushishqam kawayanki Nunapa Tsurinman creyiyanqëkipita chikiyäshuptiki, qarquyäshuptiki, allqutsayäshuptiki y manakaqpaq churayäshuptikipis. 23Tsënö kaptinpis kushikuyë. Qamkunataqa gloriachömi Dios alläpa shumaq premiuta qoyäshunki. Qamkunatanömi chikiyäshuqnikikunapa unë castankunapis Teyta Diospa profëtankunata jipatsiyarqan>>.

24<<¡Allaw, rïcukuna! Qamkunaqa kë vïdallachömi kushikïchö kayanki.

25<<¡Allaw, pacha junta këkaqkuna! Qamkunaqa mallaqäyankim.

<<¡Allaw, kushikur asikachäkuqkuna! Qamkunaqa alläpa llakikurmi waqakuyanki.

26<<¡Allaw, llapan nunakuna alabashqa kaqkuna! Qamkunatanöllam uli profëtakunatapis unë castëkikuna alabayarqan.

Chikimaqnintsikta kuyanantsikpaq Jesús yachatsikunqan

Mateo 5.38-48; 7.12

27<<Wiyëkämaqkuna, qamkunatam niyaq: Chikiyäshuqnikikunata kuyayanki. Mana allipa rikäyäshuptikipis alli rikäyanki. 28Ashayäshuptikipis allipa parlapäyanki. Manakaqta niyäshuptikipis pëkunapaq Teyta Diosta mañakuyanki. 29Qaqllëkikunachö laqyëkuyäshuptiki juknin lädu qaqllëkikunatapis kamapïkuyanki. Ponchïkikunata qochiyäshuptiki camisëkikunatapis qoykuyanki. 30Imata mañakuyäshuptikipis qoykuyanki. Imëkita qochiyäshuptikipis ama <kutitsimë> niyankitsu. 31Imanömi nuna mayiki shumaq rikäyäshunëkita munayanki, tsënölla qamkunapis nuna mayikikunata shumaq rikäyë.

32<<Kuyanakuyashqëkillawan kuyanakurqa ¿ima allitataq rurayanki? Jutsasapakunapis kuyanakuyashqanllawanqa kuyanakuyanmi. 33Allipa rikäyäshuqnikikunallawan alli kawarqa ¿ima allitataq rurayanki? Jutsasapakunapis tsënöllaqa kawayanmi. 34Sitsun prestakuyanki: <Pëqa imallachöpis kutiratsimanqam> nishpa ¿ima allitataq rurayanki? Tsënöllaqa kutitsiyänanta shuyarar jutsasapakunapis prestanakuyantaq.

35<<Qamkunaqa chikiyäshuqnikikunata kuyayanki. Pëkunapaq allillata rurayanki. Mana imata kutitsiyäshunëkita shuyarashpa imatapis qoykuyanki. Tsënö rurayaptikiqa Diosmi alläpa shumaq premiuta qoyäshunki. Pëqa mana payllä nikuqkunatapis y jutsasapakunatapis ankupanmi. Tsëmi qamkunapis ankupäkuq karqa puëdiq Teyta Diospa wamrankuna kayanki. 36Teytëki ankupäkuq kashqannö qamkunapis ankupäkuq kayë>>.

Nuna mayintsikta mana juzganapaq Jesús ninqan

Mateo 7.1-5, 17-20; 12.34-35

37<<Teyta Dios mana juzgayäshunëkipaq nuna mayikikunata ama juzgayëtsu. Tsënölla mana tumpashqa kayänëkipaq ama tumpayëtsu. Nuna mayikikunata perdonayaptikiqa qamkunatapis Teyta Dios perdonayäshunkim. 38Nuna mayikikunata qarëkuyaptikiqa Teyta Diosmi qamkunatapis tupuman junta junta tapsïkur ramë ramë qarakuq cuenta mas atskata qoykuyäshunki. Imanöllam qamkunapis nuna mayikikunata tratayanki tsënöllam qamkunatapis Dios tratayäshunki>>.#Mat. 7.2.

39Tsënö nirirnam iwalatsikïpa Jesús kënö yachatsikurqan: <<¿Juk wisku nunata wisku mayin pushanmantsuraq? Wisku mayinlla pushaptinqa ishkanmi pözuman jeqakurkuyanqa.#6.39 Jesucristo tsënö nirqan manakaqman churaq nunakunata wiskuman iwalatsirmi. 40Manam ni mëqan discïpulupis maestrunpita mas yachaqtsu. Tsë discïpuluqa yachakurir maestrunnöllam kanqa.#6.40 Tsënö yachatsirqa kënö ninantam Jesús nirqan: Yachatsishuqniki nuna mayinta manakaqman churaq kaptinqa qampis nuna mayikita manakaqman churëtam yachakunki.

41<<Nawikikunachö jatun qeru yakarëkaptinqa ¿imanirtaq nuna mayikikunapa nawinchö ichik achu këkaqta rikapëkäyanki? 42Nawikikunachö jatun qeru yakarëkaptinqa ¿imanöparaq kënö niyankiman: <Nawikipita achuta jorqaramushaq>? ¡Alli tukuq nunakuna! Puntata nawikikunachö këkaq qerutaraq jorquyë. Tsëran alli rikäyanki nuna mayikipa nawinpita achuta jorquyänëkipaq.#6.42 Kë textuchöqa nuna mayintsikpa jutsankunata nawinchö këkaq achumanmi iwalatsin. Kikintsikpa jutsantsiktanam nawintsikchö këkaq qeruman iwalatsin. Nawintsikpita qeruta jorqunantsikpaq nirqa jutsantsikkunata jaqirinantsikpaqmi nikan. Tsënöpam käyitsimantsik jukta juzganantsikpa rantin kikintsikpa jutsantsikkunata jaqirinantsikpaq kashqanta.

43<<Alli montiqa manam mana alli frütata wayuntsu ni mana alli montipis alli frütata wayuntsu. 44Wayïninpitam imanö monti kanqantapis reqintsik. Manam kashakunapitatsu hïgusta pallantsik ni shirakakunapitatsu#6.44 Wakin nunakunaqa shirakunapitatsu niyanmi. üvasta pallantsik. 45Alli nunaqa shonqun allita yarpashqantam parlan y mana alli nunaqa shonqun mana allita yarpashqantam parlan. Nunaqa shonqunchö yarpanqantam allita o mana allitapis parlan.

Cäsukuq nuna y mana cäsukuq nuna imanö kanqanpis

Mateo 7.24-27

46<<Yachatsikïnïkunata mana rurëkarqa ¿imanirtaq <Señornï, Señornï> niyämanki? 47Yachatsikunqäta cäsukuqkuna imanö kayashqantapis kanan käyitsiyashqëki. 48Juk nunash wayinta shäritsinanpaq qaqaman chashqanyaq oqtirïkur cimientuta patsätsinaq. Qaqa jananchö alli rurashqa kaptinshi mayu atskayar wakwarninpis tsë wayitaqa kuyutsinaqtsu. 49Juk nunanash cimientunnaqta aqusha jananllachö wayita sharkatsinaq. Tsënö kaptinshi mayu atskayar wakwaptin tsë wayi ras juchurinaq. Tsëshi pasëpa ankupëpaq kanaq. Tsënömi nishqäkunata mana cäsumaq nunapis kanqa>>.

Currently Selected:

Lucas 6: qwhB

Highlight

Copy