Lucas 7

Capitanpa wätëninta Jesús kachakätsinqan

Mateo 8.5-13; Juan 4.43-54

1Nunakunata yachatsir usharirnam Capernaúm markaman Jesús ëwarqan. 2Tsëchömi Roma capitanpa kuyë wätënin lástima qeshyar wanukïkarqan. 3Tsë capitannam Jesús rurashqankunata musyarir precisaq Israel nunakunata Jesúsman kacharqan tsë wätëninman ëwar kachakëkatsinanpaq.

4Pëkunanam ëwarnin Jesústa kënö niyarqan: <<Tëtë, tsë capitán alli kanqan rëkur wätëninta kachakëkatsillë. 5Pëqa markantsiktapis alläpa kuyarmi sinagögantsiktapis ruratsimushqa>>.

6Tsënö rowayaptinnam pëkunawan Jesús ëwarqan. Wayiman chëkäyaptinnam yanasankunata capitán kacharqan Jesústa kënö niyänanpaq: <<Tëtë, manash afanakullankinatsu. Mana Israel nuna karshi wayinman yëkullänëkita mantsakullan. 7Tsëshi kikinqa shallämurquntsu. Tsëpa rantinqa këllapitash mandëkullanki wätënin kachakärinanpaq. 8Pëpis mandaqninpa munëninchöshi këkan. Y pëpa munëninchöshi soldädunkunapis këkäyan. Jukninta <ëwë> niptinshi ëwayan. Jukninta <shamï> niptinpis ëwanshi. Wätëninta <këta rurë> niptinpis ruranshi>>.

9Tsënö ninqanta wiyëkurnam Jesús kushikur qatiraqninkunata kënö nirqan: <<Noqam niyaq: Pënö markäkamuq nunataqa manam Israel nunakunachö tarirqütsu>>.

10Capitán kachanqan nunakuna kutïkurnam wätëninta kachakashqatana taririyarqan.

Pajupa wawanta Jesús kawaritsinqan

11Tsëpitanam discïpulunkunawan Jesús ëwarqan Naín markaman. Pëkunawanmi atskaq nunakunapis ëwayarqan. 12Markaman yëkïkarnam Jesús tinkurqan wanushqata pampaq atskaq nunakuna apëkaqkunawan. Tsë wanushqaqa karqan pajupa japallan ollqu wawanmi. 13Jesúsnam warmita rikärir ankuparnin nirqan: <<Ama waqallëtsu>>.

14Tsënö nir kirmata yatëkuptinnam wantïkaqkuna shäräriyarqan. Tsënam Jesús kënö nirqan: <<¡Jövin, sharkï!>>

15Tsënö niptinnam kawarirkur parlar qallëkurqan. Pajutanam kawarishqatana wawanta qoykurqan. 16Tsëta rikarmi llapan nunakuna mantsakäkuyarqan y Diostam alabayarqan kënö: <<¡Poderyuq profëtam yurimushqa! ¡Teyta Diosmi kuyashqan nunakunaman shamushqa!>>

17Tsëmi llapan Judeachö y jinantin markakunachö Jesús rurashqankunata musyariyarqan.

Bautizakuq Juanpa discïpulunkuna Jesúsman ëwayanqan

Mateo 11.2-6

18Jesús rurashqankunata musyëkurmi Bautizakuq Juanta discïpulunkuna willayarqan. Tsënam ishkaq discïpulunkunata qayarir 19Señor Jesúsman tapukuq kacharqan kënö nir: <<¿Qamkush kanki Teyta Dios kachamushqan Cristo o juktaraqkush shuyäyäshaq?>>

20Jesúsman chärirnam kënö niyarqan: <<Bautizakuq Juanmi tapuyänaqpaq kachayämarqun. ¿Qamkush kanki shamunanpaq kaq Cristo o juktaraqkush shuyäyäshaq?>>

21Tsë höranam Jesúsqa kachakätsirqan atskaq qeshyaqkunata, jipaqkunata, supëyuq nunakunata y atskaq wiskukunatapis.

22Tsënam Jesús kënö nirqan: <<Kutir wiyayashqëkita y rikäyashqëkita Juanta willayanki. Wiskukunam rikäyan. Purita mana puëdiqkunam puriyan. Leprawan qeshyaqkunam kachakäyan. Mana wiyaqkunam wiyayan. Wanushqankunam kawariyämun. Waktsakunam Teyta Diospa alli willakïninta wiyëkäyan. 23Yarpashqannö mana ruraptïpis mana ajayashpa noqaman markäkuq nunaqa kushishqam kawanqa>>.

Bautizakuq Juan Diospa profëtan kanqan

Mateo 11.7-15

24Juanpa discïpulunkuna kutiriyaptinnam nunakunata Jesús nirqan: <<¿Imaqtaq chusyaqman ëwayarqëki? ¿Vientuwan shoqush kuyuqta rikaqku? 25¿Imaqtaq ëwayarqëki? ¿Alli ratashnin yakashqa nunata rikaqku? Musyayashqëkinöpis alli ratashnin yakashqa nunakunaqa reypa wayinchömi kayan. 26Tsëpinqa ¿ima rikaqtaq ëwayarqëki? ¿Profëta rikaqku? ¡Awmi! Noqam niyaq: Pënöqa manam mëqan profëtapis kashqatsu. 27Juanta kachamunanpaqmi kënö qellqarëkan: <Nänita pitsaqnö nunakuna alistakuyänanpaqmi willakuqnïta puntëkita kachashaq>.#Mal. 3.1.

28<<Noqam niyaq: Llapan profëtakunapitapis Bautizakuq Juanqa mas käyikuqmi. Tsënö këkaptinpis Teyta Diospa mandakïninman tsëraq yëkuqkunam Juanpitapis mas käyiyan>>.

29(Juan willakunqanta wiyëkurmi impuestu cobraqkunapis Teyta Diosta cäsukur Juan bautizananpaq ëwayarqan. 30Fariseukunawan ley yachatsikuqkunaqa Diosta mana cäsurmi bautizakuyarqantsu.)

Bautizakuq Juanpaq y Jesúspaq nunakuna parlayanqan

Mateo 11.16-19

31Mastam Jesús nirqan: <<Kanan tiempu nunakunata ¿imamanraq iwalatsïman? ¿Imamanraq iwalayan? 32Pëkunaqa pläzachö pukllaq wamrakunanömi kayan. Tsë wamrakunam qaparipa niyan: <Pinkulluta tocayaptïpis manam tushuyankitsu. Aya pampë qotsukunata qotsuyaptïpis manam waqayankitsu>. Tsë wamrakunanöllam kanan tiempu nunakunapis kayan. 33Bautizakuq Juan tantata mana mikuptinmi y vïnuta mana upuptinmi <¡pëqa supëpa munëninchömi këkan!> niyanki. 34Nunapa Tsurin mikuq upuq kaptinnam niyanki: <¡Këqa alläpa mikuqmi y upuqmi! ¡Impuestu cobraqkunapa y jutsasapakunapa yanasanmi!> 35Tsënö niyaptikipis discïpulükunapa alli kawakïninmi Juanta y noqata Teyta Dios kachayämashqanta käyitsiyäshunki>>.

Atska jutsanta perdonashqa kaqkuna Teyta Diosta mas kuyayanqan

36Tsëpitanam juk fariseo Jesústa invitarqan wayinchö mikuyänanpaq. Chärirnam mësaman Jesús täkurirqan. 37Fariseupa wayinchö Jesús mikïkanqanta musyarirmi prostitüta warmi alabastro rumipita rurashqa pömuchö perfümin tsarashqa chärirqan. 38Jesúspa qepanman qonqurikïkur waqaptinmi chakinkunaman weqin shuturqan. Tsë shutushqantanam aqtsanwan tsakiratsir Jesúspa chakinta mutsëkuryan apashqan perfümita jicharqan.#7.38 Tsë witsan nunakuna patsaman kikitëkurmi mikuyaq. Tsënö mikuyaptinmi Jesúspa chakin perfümita jicharqan.

39Tsëta rikëkurnam Jesústa invitaq fariseo shonqunllachö kënö yarparqan: <<Kë nuna rasunpa Diospa profëtan karninqa musyanmanmi kë yataqnin warmi alläpa mana alli ruraq kanqanta>>.

40Tsënam Jesús nirqan: <<Simón, jukta willashqëki>>.

Pënam nirqan: <<Willëkallämë, rabí>>.

41Tsënam Jesús nirqan: <<Ishkaq nunakunash juk nunapa jaqan kayänaq, jukninshi pitsqa pachak (500) junaq uryananpaq y jukninnash pitsqa chunka (50) junaq uryananpaq. 42Ishkanpis mana pagakïta puëdiyaptinshi perdonëkunaq. Mä, kanan nimë. ¿Mëqan nunataq mas kuyanqa tsë qellë prestakuq nunata?>>

43Simónnam nirqan: <<Mas atska jaqanta perdonanqan kaqchi>>.

Tsënam Jesús nirqan: <<Rasuntam ninki>>.

44Tsënö nirirnam warmita rikëkur Simónta nirqan: <<Kë warmi rurashqanta ¿rikarqunkiku? Wayikiman chämuptï manam yakuta qomarqunkitsu chakïta paqarinäpaq. Kë warmiqa chakïkunata weqinwan paqamurmi aqtsanwan tsakitsimurqun. 45Qamqa manam napamarnï mutsamarqunkitsu. Pëmi sï wayikiman yëkamushqanpita mana dejëta chakïta mutsamushqa. 46Peqämanpis manam aceitita jichamurqunkitsu. Pëmi sï perfümita chakïman jichamushqa. 47Tsëmi niq: Kë warmiqa atska jutsanta perdonëkuptïmi alläpa kuyamarnï tsënö rurarqun. Wakinkunaqa jutsannaq kayashqanta yarparmi ichiklla kuyayäman>>.

48Warmitanam nirqan: <<Llapan jutsëkikunatam perdonëkuq>>.

49Tsënam pëwan mësachö këkaqkuna kikinkunapura ninakuyarqan: <<¡Pitaq pëqa nunapa jutsanta perdonananpaq!>>

50Jesúsnam warmita nirqan: <<Noqaman markäkurmi salvakurirqunki. Kananqa kushishqana ewkï>>.

Currently Selected:

Lucas 7: qwhB

Highlight

Copy