Lucas 5

Atska pescädukunata Pedro tsarinqan

Mateo 4.18-22; Marcos 1.16-20

1Juk kutinam Genesaret lamar#5.1 Genesaret qochaqa Galilea qochapa juk kaq shutinmi karqan. kuchunchö Jesús yachatsikïkarqan. Teyta Diospa willakïninta wiyëta munarninnam atskaq nunakuna ëllukarnin kichkinakur Jesústa tanqayarqan. 2Tsënam yakuchö ishkë barcu tëkaqta Jesús rikarirqan. Pescädu tsariqkunanam barcunkunapita yarqurir atarräyankunata qocha kuchunchö taqshëkäyarqan. 3Tsënam Simónpa#5.3 Simónpa juk kaq shutinmi Pedro karqan. barcunman Jesús lloqarkur rowarqan qocha kuchunpita mas ruriman yëkatsinanpaq. Yëkuriyaptinnam täkurir nunakunata tsëpiq yachatsirqan.

4Yachatsikur usharirnam Simónta nirqan: <<Kanan mas ruriman yëkur atarräyëkikunata jitayë pescäduta tsariyänëkipaq>>.

5Simónnam nirqan: <<Tëtë, waraqninpim pescayarqü y manam jukllëllatapis tsariyarqütsu. Tsënö kaptinpis qam nimanqëki rëkurmi atarräyäta jitashaq>>.

6Jitarirnam atska pescäduta tsarïkuyarqan cäsi atarräyapis rachinqanyaq. 7Tsënam juknin barcuchö yanaqinkunata sëñaswan qayarqan yanapayänanpaq. Chärirmi ishkan barcukuna hundinashqanyaq pescädukunata winayarqan. 8Tsëta rikëkurnam Simón Pedro Jesúspa nöpanman qonqurikur nirqan: <<Tëtë, nöpalläpita witikurillë. Jutsasapa nunam kallä>>.

9Tsënö nirqan yanaqinkunawan tsëläya atska pescäduta tsariyanqanpita mantsakashqa karmi. 10Tsënöllam mantsakäyarqan Zebedeupa tsurinkuna Santiaguwan Juanpis. Pëkunam Simónpa pescädu tsariq mayinkuna kayarqan. Jesúsnam Simónta nirqan: <<Ama mantsakëtsu. Noqam yachatsiyashqëki nunakunata pescayänëkipaq>>.

11Tsënö niptinnam pläyaman barcunkunata jorqarïkur tsëchö llapanta jaqirïkur Jesúswan ewkuyarqan.

Leprawan qeshyaq nunata Jesús kachakätsinqan

Mateo 8.1-4; Marcos 1.40-45

12Juk markachö Jesús këkaptinnam leprawan qeshyaq nuna chärirqan. Jesústa rikärirnam urkunpis patsaman chanqanyaq qonqurikur kënö nirqan: <<Tëtë, munarninqa kachakëkatsillämë>>.

13Tsënö rowakuptinnam Jesús yatëkur nirqan: <<Munämi kachakashqa kanëkita>>.

Tsënö niptinmi tsë höra kachakärirqan. 14Tsënam Jesús nirqan: <<Kachakätsishqaqta ama pitapis willankitsu. Tsëpa rantinqa sacerdötiman ëwë kachakashqëkita rikäshunëkipaq. Tsëpita Moisés qellqashqanchö nishqannölla purificäkunëkipaq ofrendëkita templuman apë. Tsënöpam kachakashqëkita musyayanqa>>.#Lev. 14.1-32.

15<<Ama willakunkitsu>> nikaptinpis jinantinchömi nunakuna musyariyarqan. Tsëmi atskaq ëllukëkuyarqan yachatsikushqankunata wiyayänanpaq y qeshyaqkunatapis kachakätsinanpaq.

16Jesúsqa imëpis chusyaqkunata ëwarmi Teyta Diosman mañakuq.

Purita mana puëdiq nunata Jesús kachakätsinqan

Mateo 9.1-8; Marcos 2.1-12

17Juk wayichö Jesús yachatsikïkaptinnam fariseukuna y ley yachatsikuqkuna tsëchö tëkäyarqan. Pëkunaqa Galileachö jinantin markakunapita, Judea provinciapita y Jerusalénpita shayämushqam kayarqan. Diospa poderninmi Jesúschö karqan qeshyakuqkunata kachakätsinanpaq.

18Purita mana puëdiq nunata kirmawan nunakuna chäratsirnam Jesúspa nöpanman yëkatsita munayarqan. 19Atskaq nunakuna kichkiyaptinmi punkupa yëkatsita puëdiyarqantsu. Tsëmi wayi jananman lloqaratsir wayi qataraqta kicharir kirmantawan Jesúspa nöpanman urätsiyarqan.

20Tsë nunakuna pëman markäkuyashqanta musyarmi qeshyëkaq nunata Jesús kënö nirqan: <<Llapan jutsëkipita perdonashqanam kanki>>.

21Tsënam ley yachatsikuqkuna y fariseukuna kënö nir yarpakachäyarqan: <<¡Pitaq kë nunaqa Dios tukunanpaq! Teyta Diosllam jutsa ruraqkunataqa perdonan>>.

22Tsënö yarpäyashqanta musyarmi Jesús kënö nirqan: <<¿Imanirtaq tsënö yarpëkäyanki? 23¿Mëqantaq mas sasa? ¿Nunapa jutsankunata perdonëku? ¿O qeshyaqta kachakätsiku? 24Nunapa Tsurinqa kë patsachö nunakunata perdonananpaq puëdiqmi këkan. Tsëtam kanan musyayanki>>.

Tsëpitanam purita mana puëdiq nunata kënö nirqan: <<¡Sharkï! Kirmëkita aparkur wayikiman ewkï>>.

25Tsënam llapan rikarëkäyaptin tsë höra kachakashqana sharkurqan. Tsëpitanam kirmanta aparkur Teyta Diosta alabarnin wayinman ewkurqan. 26Tsëta rikëkurnam nunakuna kushikur Teyta Diosta alabayarqan. Alläpa mantsakarmi niyarqan: <<¡Kë nuna ruranqantanöqa manam imëpis rikarquntsiktsu!>>

Discïpulun kananpaq Levíta Jesús qayanqan

Mateo 9.9-13; Marcos 2.13-17

27Tsëpita ewkurmi Jesús rikarqan Leví shutiyuq nuna#5.27 Levípa juk kaq shutinmi Mateo karqan. impuestuta cobrar tëkaqta. Pëtam kënö nirqan: <<Qatimë>>.

28Tsënö niptinmi llapanta jaqirïkur Jesúswan ewkurqan.

29Tsëpitanam Jesúspaq Leví wayinchö ruratsirqan juk mikupakïta. Tsëchönam impuestuta cobraqkuna y mas nunakunapis Jesúswan mikïkäyarqan. 30Tsëta rikëkurmi fariseukuna y ley yachatsikuqkuna Jesúspa discïpulunkunata penqaparnin niyarqan: <<¿Imanirtaq qamkuna impuestu cobraqkunawan y jutsasapa nunakunawanpis mikuyanki y upuyanki?>>

31Jesúsnam nirqan: <<Sänu kaqkunaqa manam mëdicuta wanayantsu, sinöqa qeshyaqkunallam. 32Noqaqa manam jutsannaq nunakunamantsu shamurqü, sinöqa jutsasapa nunakunamanmi jutsankunata jaqiriyänanpaq shamurqü>>.

Ayünupaq y mushuq yachakïpaq Jesús käyitsinqan

Mateo 9.14-17; Marcos 2.18

33Tsëpitanam Jesústa kënö tapuyarqan: <<Juanpa discïpulunkuna y fariseukunapa discïpulunkunaqa Teyta Diosta mañakurmi imëpis ayunayan. Qampa discïpulïkikunaqa ¿imanirtaq ayunayantsu?>>

34Jesúsnam nirqan: <<Casakuq jövin këkaptinqa casakï fiestaman invitashqakuna ¿ayunayanmantsuraq? 35Tsënö kaptinpis casakuq jövinta wanuratsiyaptinqa ayunayanqam>>.

36Tsënö nirirnam iwalatsikïpa kënö yachatsikurqan: <<Manam pipis mushuq ratashta rutuntsu makwa ratashta remendananpaq. Tsënö rurarqa mushuq ratashtam perdiratsin. Tsënöllam mushuq ratashpita rutunqan ratashqa makwa ratashchö shumaqtsu rikakun.

37<<Tsënölla manam pipis tsëraq rurashqa vïnuta makwa kuntuman winantsu. Winaptinqa vïnu poqurmi ushakäratsinqa. Tsënö kaptinqa vïnupis y kuntupis ushakanqam. 38Tsëmi tsëraq rurashqa vïnutaqa mushuq kuntuman winantsik.#5.38 Makwa ratashta y makwa kuntuta Jesucristo iwalatsirqan unë costumbrinkunamanmi. Mushuq ratashta y tsëraq rurashqa vïnutanam iwalatsirqan kikinpa yachatsikïninman. Tsënö iwalatsirmi nirqan pëpa yachatsikïnin mushuq kar unë costumbrinkunaman mana iwalanqanta. [Tsënö rurashqaqa vïnupis y kuntupis manam ushakanqatsu.]

39<<Tsënöllam poqushqa vïnuta upurirqa tsëraq rurashqa vïnuta pipis upïta munantsu <poqushqa vïnum mas alliqa> nirnin>>.

Currently Selected:

Lucas 5: qwhB

Highlight

Copy